ಕೊಹ್ಲಿ ಅಬ್ಬರಕ್ಕೆ ಕ್ರಿಕೆಟ್ ದೇವರ ಮತ್ತೊಂದು ರೆಕಾರ್ಡ್ ಉಡೀಸ್..!

ಕ್ಯಾಪ್ಟನ್​ ಕೊಹ್ಲಿ ತಾನಿರುವುದೇ ಕ್ರಿಕೆಟ್ ಜಗತ್ತನ್ನು ಆಳುವುದಕ್ಕೆ ಎಂದು ಮತ್ತೊಮ್ಮೆ ಸಾರಿದ್ದಾರೆ. ಕೊಹ್ಲಿಯ ರನ್​ ಗಳಿಕೆ ದಾಹಕ್ಕೆ ಕ್ರಿಕೆಟ್ ದೇವರ ಮತ್ತೊಂದು ರೆಕಾರ್ಡ್ ಚಿಂದಿಯಾಗಿದೆ.
ಮೊನ್ನೆ ಮೊನ್ನೆಯಷ್ಟೇ ಕ್ಯಾಪ್ಟನ್ ಕೊಹ್ಲಿ ಅತಿವೇಗವಾಗಿ 11 ಸಾವಿರ ರನ್​ ಗಡಿ ದಾಟಿದ ಸಾಧನೆಯನ್ನು ಮಾಡಿದ್ದರು. ಅಲ್ಲೂ ಸಚಿನ್ ರೆಕಾರ್ಡ್ ಪುಡಿಗಟ್ಟಿದ್ದರು. ಇಂದು ವೆಸ್ಟ್ ಇಂಡೀಸ್ ವಿರುದ್ಧ ನಡೆಯುತ್ತಿರುವ ಮ್ಯಾಚ್​ನಲ್ಲಿ ಮತ್ತೊಂದು ದಾಖಲೆಯನ್ನು ನಿರ್ಮಿಸಿದ್ದಾರೆ. ಅಂತರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಕೊಹ್ಲಿ 20 ಸಾವಿರ ರನ್​ಗಳ ಮೈಲುಗಲ್ಲು ನೆಟ್ಟಿದ್ದಾರೆ. ಟೆಸ್ಟ್, ಏಕದಿನ ಮತ್ತು ಟಿ20 ಮೂರೂ ಮಾದರಿಯ ಕ್ರಿಕೆಟ್​ನಿಂದ ಒಟ್ಟಾರೆಯಾಗಿ 417 ಇನ್ನಿಂಗ್ಸ್​ಗಳಲ್ಲಿ ಕೊಹ್ಲಿ 20 ಸಾವಿರ ರನ್ ಸಿಡಿಸಿದ್ದಾರೆ. ಈ ಮೂಲಕ ಕ್ರಿಕೆಟ್​ ಸಚಿನ್ ತೆಂಡೂಲ್ಕರ್ ದಾಖಲೆಯನ್ನು ಮಾತ್ರವಲ್ಲದೆ ಬ್ರಿಯಾನ್ ಲಾರ ಅವರ ದಾಖಲೆಯನ್ನು ಸಹ ಸರಿಗಟ್ಟಿದ್ದಾರೆ. ಸಚಿನ್ ತೆಂಡೂಲ್ಕರ್ ಮತ್ತು ಲಾರಾ 453 ಇನ್ನಿಂಗ್ಸ್ ಗಳಲ್ಲಿ ಈ ಸಾಧನೆ ಮಾಡಿದ್ದರು. ಕೊಹ್ಲಿ ಈಗ ಮೊದಲ ಸ್ಥಾನ ಅಲಂಕರಿಸಿದ್ದು, ಈ ಇಬ್ಬರು ಮಾಜಿ ಕ್ರಿಕೆಟಿಗರು ಜಂಟಿ 2ನೇ ಸ್ಥಾನದಲ್ಲಿದ್ದಾರೆ. 3ನೇ ಸ್ಥಾನದಲ್ಲಿ ಆಸ್ಟ್ರೇಲಿಯಾದ ಮಾಜಿ ನಾಯಕ ರಿಕಿ ಪಾಂಟಿಂಗ್ ಇದ್ದು, ಅವರು 468 ಇನ್ನಿಂಗ್ಸ್​​ ಗಳಲ್ಲಿ ಈ ಸಾಧನೆಯನ್ನು ಮಾಡಿದ್ದಾರೆ.
ಕೊಹ್ಲಿ 77 ಟೆಸ್ಟ್​​​​​​ಗಳಿಂದ 6,613ರನ್ ಗಳಿಸಿದ್ದಾರೆ. ಇದರಲ್ಲಿ 25 ಶಕತ, 20 ಅರ್ಧಶತಕಗಳಿವೆ. 231 ಏಕದಿನ ಕ್ರಿಕೆಟ್​ನಿಂದ 42 ಶತಕ, 52 ಅರ್ಧತಕದೊಂದಿಗೆ 11,087 ರನ್ ಮತ್ತು 67 ಟಿ20 ಪಂದ್ಯಗಳಿಂದ 2263 ರನ್ ಗಳಿಸಿದ್ದಾರೆ. ಅದರಲ್ಲಿ 20 ಅರ್ಧಶತಕಗಳು ಸೇರಿವೆ.