ಕೃಷಿಯಿಂದ ಹಿಡಿದು ಬಾಹ್ಯಾಕಾಶದವರೆಗೆ ಮಹಿಳೆ ಇಂದು ಎಲ್ಲ ಕ್ಷೇತ್ರಗಳಲ್ಲೂ ತನ್ನ ಪ್ರತಿಭೆಯಿಂದ ಮಿಂಚುತ್ತಿದ್ದಾಳೆ. ತೊಟ್ಟಿಲು ತೂಗಲೂ ಸೈ, ಗನ್ ಹಿಡಿದು ಶತ್ರುಗಳನ್ನು ಸದೆಬಡಿಯಲೂ ಸೈ ಇಂದಿನ ನಾರಿ. ಮಹಿಳೆಯ ಕ್ರಿಯಾಶೀಲತೆಗೆ ಸಾಟಿಯೇ ಇಲ್ಲ. ಹೀಗಾಗಿಯೇ ಅತ್ಯಂತ ಹೆಚ್ಚು ಸಂಬಳ ನೀಡುವ ಕೆಲಸಗಳು ಸಹ ಮಹಿಳೆಯರನ್ನೇ ಹುಡುಕಿಕೊಂಡು ಬರುತ್ತಿರುವುದು ಆಶ್ಚರ್ಯವೇನೂ ಅಲ್ಲ.
ಮದುವೆಯಾದ ನಂತರ ಸಂಸಾರ ನೋಡಿಕೊಳ್ಳುವ ಸಲುವಾಗಿ ಮಹಿಳೆಯರು ತಮ್ಮ ಕೆಲಸ ಬಿಟ್ಟು ಬಿಡುವಂತೆ ಅವರನ್ನು ಒತ್ತಾಯಿಸಲಾಗುತ್ತದೆ ಎಂಬ ದೃಷ್ಟಿಕೋನ ಇತ್ತೀಚೆಗೆ ಬದಲಾಗುತ್ತಿದೆ. ಇತ್ತೀಚಿನ ಕೆಲ ಸಮೀಕ್ಷೆಗಳು ಹಾಗೂ ಅಂಕಿ-ಅಂಶಗಳಿಂದ ತಿಳಿದ ಪ್ರಕಾರ ಮಹಿಳೆಯರು ಮದುವೆಯ ನಂತರ ಸಂಸಾರವನ್ನು ನೋಡಿಕೊಳ್ಳುತ್ತ ಅತ್ಯಂತ ಉನ್ನತ ಹುದ್ದೆಗಳಲ್ಲಿ ಕಂಪನಿಗಳಲ್ಲಿ ಯಶಸ್ವಿಯಾಗಿ ಕೆಲಸವನ್ನೂ ಮಾಡುತ್ತಿದ್ದಾರೆ.
ಯಾವುದೇ ಹೆಣ್ಣು ಮಗಳ ಜೀವನ ಮಟ್ಟವು ಬಹುತೇಕ ಆಕೆಯ ಆರ್ಥಿಕ ಸ್ವಾತಂತ್ರ್ಯವನ್ನು ಅವಲಂಬಿಸಿರುತ್ತದೆ ಎಂಬುದು ಸತ್ಯ. ಮಹಿಳೆ ಆರ್ಥಿಕವಾಗಿ ಸಬಲೆಯಾಗಿದ್ದಲ್ಲಿ ಆಕೆ ತನ್ನ ಹೆಚ್ಚಿನ ಅಗತ್ಯಗಳಿಗೆ ಸಂಗಾತಿಯನ್ನು ಅವಲಂಬಿಸುವುದು ತಪ್ಪುತ್ತದೆ. ಇದರಿಂದ ಒಟ್ಟಾರೆಯಾಗಿ ಕೌಟುಂಬಿಕ ಸಂಬಂಧವು ಚೆನ್ನಾಗಿದ್ದು, ಅದರಿಂದ ಆರೋಗ್ಯಕರ ಸಮಾಜ ನಿರ್ಮಾಣಕ್ಕೆ ದಾರಿಯಾಗುತ್ತದೆ. ಸಶಕ್ತ ಸಮಾಜದಿಂದ ಸದೃಢ ಭಾರತ ದೇಶ ನಿರ್ಮಾಣವೇನೂ ಕಷ್ಟವಲ್ಲ.
ವಿಭಿನ್ನ ವಲಯಗಳಲ್ಲಿ ಮಹಿಳೆಯರಿಗೆ ಲಭ್ಯವಿರುವ ಆಕರ್ಷಕ ಉದ್ಯೋಗವಕಾಶಗಳು, ವಿಭಿನ್ನ ಔದ್ಯೋಗಿಕ ವಲಯದಲ್ಲಿ ಮಹಿಳೆಯರಿಗೆ ಸೂಕ್ತವಾದ ಹಾಗೂ ಹೆಚ್ಚು ಸಂಬಳ ನೀಡುವ ಆಕರ್ಷಕ ಉದ್ಯೋಗಗಳು ಯಾವುವು, ಸಂಬಳ ಎಷ್ಟು ಎಂಬುದನ್ನು ಇಲ್ಲಿ ತಿಳಿಯೋಣ ಬನ್ನಿ..
ವೈದ್ಯಕೀಯ ಶಿಕ್ಷಣ ಪಡೆಯುವುದು ಅಷ್ಟೊಂದು ಸುಲಭದ ಮಾತಲ್ಲ. ಇತರ ಎಲ್ಲ ಮಾದರಿಯ ಶಿಕ್ಷಣಕ್ಕೆ ಹೋಲಿಸಿದರೆ ವೈದ್ಯಕೀಯ ಶಿಕ್ಷಣ ತೀರಾ ಸುಧೀರ್ಘವಾದುದು. ಹೀಗಾಗಿಯೇ ಈ ವೃತ್ತಿ ಮಹಿಳೆಯರಿಗೆ ಸೂಕ್ತವಲ್ಲ ಎಂಬ ದೃಷ್ಟಿಕೋನ ಸಮಾಜದಲ್ಲಿತ್ತು. ಆದರೆ ಬದಲಾದ ಕಾಲಘಟ್ಟದಲ್ಲಿ ಈ ಮನೋಸ್ಥಿತಿ ಬದಲಾಗುತ್ತಿದ್ದು ವೈದ್ಯ ವೃತ್ತಿಗೆ ಮಹಿಳೆಯೇ ಹೆಚ್ಚು ಸೂಕ್ತ ಎಂಬ ಧೋರಣೆ ಕಾಣಿಸುತ್ತಿದೆ. ವೈದ್ಯೆಯಾದವಳು ಭಾವನಾತ್ಮಕವಾಗಿ ರೋಗಿಗಳೊಂದಿಗೆ ತುಂಬಾ ಚೆನ್ನಾಗಿ ಬೆರೆತು ರೋಗಿಯ ರೋಗ ವಾಸಿ ಮಾಡಬಲ್ಲಳು ಎಂದು ತಿಳಿದು ಬಂದಿದೆ. ಜೊತೆಗೆ ಪುರುಷರಷ್ಟೇ ಸಮಾನವಾಗಿ ಮಹಿಳೆಯೂ ಸಮರ್ಥವಾಗಿ ವೈದ್ಯಕೀಯ ಶಿಕ್ಷಣ ಪಡೆದು ಅದರಲ್ಲಿ ಯಶಸ್ವಿಯಾಗಬಲ್ಲಳು ಎಂಬುದು ಸಾಬೀತಾಗಿದೆ.
ಹ್ಯೂಮನ್ ರಿಸೋರ್ಸ್ ಅಥವಾ ಮಾನವ ಸಂಪನ್ಮೂಲ ಅಭಿವೃದ್ಧಿ ವಿಭಾಗವು ಮಹಿಳೆಯರಿಗೆ ಹೇಳಿ ಮಾಡಿಸಿದ ಮತ್ತೊಂದು ವಿಭಾಗವಾಗಿದೆ. ಉತ್ತಮ ಸಂವಹನ ಹಾಗೂ ಭಾಷಾ ಕೌಶಲವಿರುವ ಮಹಿಳೆಯರಿಗೆ ಈ ಕೆಲಸ ಹೆಚ್ಚು ಸೂಕ್ತವಾಗಿದೆ. ಹ್ಯೂಮನ್ ರಿಸೋರ್ಸ್ ವಿಷಯದಲ್ಲಿ ಪದವಿ ಅಥವಾ ಸ್ನಾತಕೋತ್ತರ ಪದವಿಯ ಅಧ್ಯಯನದ ನಂತರ ಈ ಕೆಲಸದಲ್ಲಿ ಜೀವನ ಕಂಡುಕೊಳ್ಳಬಹುದು.
ಶಿಕ್ಷಣ ಕಲಿಸುವುದು ಮಹಿಳೆಯರಿಗೆ ಸೂಕ್ತವಾದ ವೃತ್ತಿಯಾಗಿದೆ. ತನ್ನಲ್ಲಿ ಸಹಜವಾಗಿರುವ ಕಾಳಜಿ, ಸೂಕ್ಷ್ಮ ಸಂವೇದನೆಗಳ ಮೂಲಕ ಶಿಕ್ಷಕಿಯಾದವಳು ವಿದ್ಯಾರ್ಥಿಗಳೊಂದಿಗೆ ತುಂಬಾ ಚೆನ್ನಾಗಿ ಬೆರೆತು ಶಿಕ್ಷಣ ನೀಡುತ್ತಾಳೆ ಎಂಬುದು ಸಾಬೀತಾಗಿರುವ ಸಂಗತಿಯಾಗಿದೆ. ನಿರ್ದಿಷ್ಟ ವಿಷಯದಲ್ಲಿ ಪದವಿ ಅಥವಾ ಸ್ನಾತಕೋತ್ತರ ಪದವಿಯ ನಂತರ ಶಾಲಾ ಶಿಕ್ಷಕಿಯಾಗಿ ಹಾಗೂ ಕಾಲೇಜುಗಳಲ್ಲಿ ಉಪನ್ಯಾಸಕಿಯಾಗಿ ವೃತ್ತಿ ಜೀವನ ಆರಂಭಿಸಬಹುದು.
ಭಾರತದ ಬ್ಯಾಂಕಿಂಗ್ ಹಾಗೂ ವಿಮಾ ವಲಯ ಸತತ ಏಳಿಗೆ ಕಾಣುತ್ತಿದ್ದು, ಈ ಕ್ಷೇತ್ರದಲ್ಲಿ ಮಹಿಳೆಯರಿಗೆ ಸೂಕ್ತವಾದ ಸಾಕಷ್ಟು ಉದ್ಯೋಗವಕಾಶಗಳಿವೆ. ಪದವಿ ಅಥವಾ ಸ್ನಾತಕೋತ್ತರ ಪದವಿ ಪಡೆದವರು ಈ ಕ್ಷೇತ್ರಕ್ಕೆ ಲಗ್ಗೆ ಇಡಬಹುದು. ಸಾರ್ವಜನಿಕ ವಲಯದ ಬ್ಯಾಂಕಿನಲ್ಲಿ ಕ್ಲರ್ಕ್ ಹುದ್ದೆ ಪಡೆದರೂ ಉತ್ತಮ ಸಂಬಳದೊಂದಿಗೆ ಗುಣಮಟ್ಟದ ಜೀವನ ನಡೆಸಬಹುದು. ಹಾಗೆಯೇ ವಿಮಾ ವಲಯದಲ್ಲಿಯೂ ವ್ಯಾಪಕ ಅವಕಾಶಗಳು ಮಹಿಳೆಯರಿಗಾಗಿಯೇ ಮೀಸಲಾಗಿವೆ.
ಆಧುನಿಕ ಜಗತ್ತಿನಲ್ಲಿ ಗ್ಲಾಮರ್ ಕ್ಷೇತ್ರವು ಅತ್ಯಂತ ಬೇಡಿಕೆಯ ವಲಯವಾಗಿದೆ. ಗ್ಲಾಮರ್ ಹಾಗೂ ಮಹಿಳೆ ಎರಡೂ ಒಂದಕ್ಕೊಂದು ಬೆಸೆದ ವಿಷಯಗಳಾಗಿವೆ. ಆದರೆ ಈಗಿನ ಜಗತ್ತಿನಲ್ಲಿ ಮಹಿಳೆ ಕೇವಲ ಮಾಡೆಲಿಂಗ್ ಮಾತ್ರವಲ್ಲದೆ ಈ ಕ್ಷೇತ್ರದ ಬ್ಯಾಕ್ ಎಂಡ್ ಕೆಲಸಗಳಲ್ಲಿಯೂ ಪರಿಣಿತಿ ಸಾಧಿಸುತ್ತಿದ್ದಾಳೆ. ಫ್ಯಾಶನ್ ಡಿಸೈನಿಂಗ್, ಮೀಡಿಯಾ ಡಿಸೈನಿಂಗ್, ಡೈರೆಕ್ಷನ್ ಹಾಗೂ ಪ್ರೊಡಕ್ಷನ್‌ಗಳಲ್ಲಿಯೂ ಮಹಿಳೆಯರು ಉನ್ನತಿಗೇರುತ್ತಿದ್ದಾರೆ. ಉತ್ತಮ ಕ್ರಿಯಾಶೀಲತೆ ಹೊಂದಿದ ಮಹಿಳೆಯರಿಗೆ ಈ ಕ್ಷೇತ್ರ ಸೂಕ್ತವಾಗಿದೆ.
ಹಣಕಾಸು ವಿಭಾಗದಲ್ಲಿ ಪದವಿ ಅಥವಾ ಅದಕ್ಕೂ ಹೆಚ್ಚಿನ ಉನ್ನತ ಶಿಕ್ಷಣ ಪಡೆದ ಹೆಣ್ಣು ಮಕ್ಕಳಿಗೆ ಈ ಕ್ಷೇತ್ರದಲ್ಲಿ ಅತ್ಯಂತ ಸೂಕ್ತವಾದ ಉದ್ಯೋಗವಕಾಶಗಳು ಲಭ್ಯವಿವೆ. ಇನ್ವೆಸ್ಟಮೆಂಟ್ ಬ್ಯಾಂಕಿಂಗ್, ರಿಟೇಲ್ ಬ್ಯಾಂಕಿಂಗ್, ಅನಾಲಿಟಿಕ್ಸ್ ಕಂಪನಿಗಳು ಸೇರಿದಂತೆ ಇನ್ನೂ ಹಲವಾರು ಹಣಕಾಸು ಕ್ಷೇತ್ರದ ಕಂಪನಿಗಳಲ್ಲಿ ಮಹಿಳೆಯರು ಉನ್ನತ ಹುದ್ದೆಗಳಿಗೇರಬಹುದು.
ಸ್ಥಿರತೆ, ಭದ್ರತೆ ಹಾಗೂ ಬೆಳವಣಿಗೆಗಳ ದೃಷ್ಟಿಯಿಂದ ನೋಡಿದರೆ ಸರ್ಕಾರಿ ಕೆಲಸಕ್ಕಿಂತ ಮಿಗಿಲಾದುದು ಮತ್ತೊಂದಿಲ್ಲ. ಹೀಗಾಗಿಯೇ ಇಂದಿಗೂ ಸರ್ಕಾರಿ ನೌಕರಿ ಎಂಬುದು ಇಂದಿಗೂ ಬಹುತೇಕರ ಅತಿ ಪ್ರಿಯವಾದ ನೌಕರಿಯಾಗಿದೆ. ಮಹಿಳೆಯರಿಗಂತೂ ಸರ್ಕಾರಿ ನೌಕರಿಗಳಲ್ಲಿ ಮೀಸಲಾತಿಗಳೂ ಲಭ್ಯವಿರುವುದರಿಂದ ಮಹಿಳೆಯರು ಈ ನೌಕರಿಗಳ ಬಗ್ಗೆ ಗಮನ ಹರಿಸುವುದು ಈ ಹಿಂದೆಂದಿಗಿಂತಲೂ ಇಂದು ಹೆಚ್ಚು ಅಗತ್ಯವಾಗಿದೆ.
ವೆಬ್‌ಸೈಟ್ ಡಿಸೈನ್ ಅಥವಾ ಸಾಫ್ಟವೇರ್ ಡೆವಲಪ್‌ಮೆಂಟ್ ಕ್ಷೇತ್ರವು ಮಹಿಳೆಯರಿಗೆ ಉತ್ತಮ ಭವಿಷ್ಯ ನೀಡಬಲ್ಲ ಕ್ಷೇತ್ರವಾಗಿದೆ. ಸಾಫ್ಟವೇರ್ ಹಾಗೂ ಸಂಬಂಧಿಸಿದ ವಿಷಯದಲ್ಲಿ ಉತ್ತಮ ಪರಿಣಿತಿ ಇದ್ದಲ್ಲಿ ಆಫೀಸಿಗೆ ಹೋಗದೆ ವರ್ಕ್ ಫ್ರಂ ಹೋಂ ಮಾದರಿಯಲ್ಲಿಯೇ ಮಹಿಳೆಯರು ಸಾಫ್ಟವೇರ್ ಡೆವಲಪ್‌ಮೆಂಟ್ ಕೆಲಸದಲ್ಲಿ ತೊಡಗಿಸಿಕೊಳ್ಳಬಹುದು. ಈಗ ಆನ್ಲೈನ್‌ನಲ್ಲಿಯೇ ಕೋಡಿಂಗ್ ಕೋರ್ಸ್‌ಗಳು ಲಭ್ಯವಿರುವುದರಿಂದ ಮಹಿಳೆಯರು ಈ ಕ್ಷೇತ್ರದಲ್ಲಿ ಸುಲಭವಾಗಿ ಪರಿಣಿತಿ ಸಾಧಿಸಬಹುದು.
ಜರ್ನಲಿಸಂ ಅಥವಾ ಪತ್ರಿಕೋದ್ಯಮಿಯಾಗುವುದು ಇನ್ನೊಂದು ಆಕರ್ಷಕ ವೃತ್ತಿಯಾಗಿದೆ. ಇತ್ತೀಚೆಗೆ ಮಹಿಳೆಯರೇ ಹೆಚ್ಚಾಗಿ ಈ ಕ್ಷೇತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಉತ್ತಮ ಸಂಬಳದ ಕೆಲಸದ ಜೊತೆಗೆ ಸಮಾಜವನ್ನು ತಿದ್ದುವ ಕೆಲಸ ಮಾಡುವ ಅವಕಾಶ ದೊರಕುವುದು ಈ ಕ್ಷೇತ್ರದ ವಿಶೇಷತೆಯಾಗಿದೆ. ಇತ್ತೀಚಿನ ಆಗುಹೋಗುಗಳ ಬಗ್ಗೆ ಹಾಗೂ ರಾಜಕೀಯದ ಬಗ್ಗೆ ಆಳವಾದ ಜ್ಞಾನ ಹೊಂದಿರುವವರು ಮತ್ತು ಅತ್ಯುತ್ತಮ ಸಂವಹನ ಕೌಶಲ ಹೊಂದಿರುವವರಿಗೆ ಈ ಕ್ಷೇತ್ರ ಸೂಕ್ತವಾಗಿದೆ.
ಕಾಸ್ಮೆಟಿಕ್ ಅಥವಾ ಪ್ರಸಾಧನ ಸಾಮಗ್ರಿಗಳ ಮಾರಾಟದಲ್ಲಿ ಭಾರತವು ವಿಶ್ವದಲ್ಲಿಯೇ ಎರಡನೇ ಅತಿ ದೊಡ್ಡ ಮಾರುಕಟ್ಟೆಯಾಗಿದೆ. ಹೀಗಾಗಿ ಉತ್ತಮ ಬ್ಯೂಟಿ ಥೆರಪಿಸ್ಟ್ ಸಂಸ್ಥೆಯಿಂದ ತರಬೇತಿ ಪಡೆದ ಬ್ಯೂಟಿ ಟೆಕ್ನೀಶಿಯನ್‌ಗಳಿಗೆ ಭಾರತದಲ್ಲಿ ವಿಪರೀತ ಬೇಡಿಕೆಯಿದೆ. ಇನ್ನು ತರಬೇತಿ ಪಡೆದವರು ತಮ್ಮದೇ ಸ್ವಂತ ಬ್ಯೂಟಿ ಪಾರ್ಲರ್ ಹಾಗೂ ಸ್ಪಾ ಆರಂಭಿಸಿ ಕೈತುಂಬಾ ಗಳಿಸಬಹುದು.
ನರ್ಸಿಂಗ್ ವೃತ್ತಿಯು ಹಿಂದಿನ ಕಾಲದಿಂದಲೂ ಮಹಿಳಾ ವಿಶೇಷ ವೃತ್ತಿಯಾಗಿಯೇ ಮುಂದುವರೆದಿದೆ. ಈ ವೃತ್ತಿಯು ಆರಂಭಿಕವಾಗಿ ತುಸು ಕಷ್ಟಕರವೆನಿಸಿದರೂ ನಂತರದ ದಿನಗಳಲ್ಲಿ ಅನುಭವ ಹೆಚ್ಚಾದಂತೆ ಸುಗಮವಾಗುತ್ತದೆ. ಇದು ವೈದ್ಯಕೀಯ ಕ್ಷೇತ್ರದ ವೃತ್ತಿಯಾಗಿರುವುದರಿಂದ ವೃತ್ತಿ ಭದ್ರತೆ ಹಾಗೂ ಆದಾಯ ಭದ್ರತೆಗಳು ಇದರಲ್ಲಿ ಚೆನ್ನಾಗಿರುವುದು ವಿಶೇಷ.
ಮಹಿಳೆಯರಿಗೆ ತಾಳ್ಮೆ ಗುಣವು ದೈವದತ್ತವಾಗಿಯೇ ಹೆಚ್ಚಾಗಿರುವುದರಿಂದ ಅತಿಥಿ ಸತ್ಕಾರ ಕಾಳಜಿ ಅಥವಾ ಹಾಸ್ಪಿಟಾಲಿಟಿ ಕೆಲಸವು ಅವರಿಗೆ ಅತ್ಯಂತ ಸೂಕ್ತ ಎಂದು ಹೇಳಲಾಗುತ್ತದೆ. ಇನ್ನು ಮಹಿಳಾ ಗ್ರಾಹಕರೊಂದಿಗೆ ಸುಲಭವಾಗಿ ಸಂವಹನ ನಡೆಸಲು ಸಾಧ್ಯವಾಗುವುದರಿಂದ ಹೊಟೇಲುಗಳಲ್ಲಿ ರಿಸೆಷ್ಪನಿಸ್ಟ್‌ ಹುದ್ದೆಯಿಂದ ಹಿಡಿದು ವಿಮಾನಗಳಲ್ಲಿ ಏರ್ ಹೋಸ್ಟೆಸ್‌ ಆಗುವವರೆಗೂ ಮಹಿಳಾ ಸಿಬ್ಬಂದಿಗಳ ಪಾತ್ರ ಪ್ರಮುಖವಾಗಿದೆ. ಇನ್ನು ಕೆಲಸದೊಂದಿಗೆ ವಿಶ್ವಸಂಚಾರ ಮಾಡುವುದು, ಜಗತ್ತನ್ನು ವಿಶಾಲವಾಗಿ ನೋಡುವ ಅವಕಾಶ ಸಿಗುವುದು ಈ ಕೆಲಸದ ಹೆಗ್ಗಳಿಕೆಯಾಗಿದೆ.
ಇಂಟರ್ನೆಟ್‌ನ ಅಗಾಧ ಶಕ್ತಿಯಿಂದ ಈಗ ಹಲವಾರು ಕೆಲಸಗಳನ್ನು ಮನೆಯಿಂದಲೇ ಮಾಡಬಹುದಾಗಿರುವುದು ಒಂದು ರೀತಿಯ ದೇವರು ಕೊಟ್ಟ ವರವೆಂದೇ ಹೇಳಬಹುದು. ಬರವಣಿಗೆ, ಟ್ರಾನ್ಸಕ್ರಿಪ್ಷನ್, ಅನುವಾದ, ವರ್ಚುವಲ್ ಅಸಿಸ್ಟಂಟ್ ಅಥವಾ ಫ್ರೀಲಾನ್ಸ್ ಅಸಿಸ್ಟಂಟ್ ಹೀಗೆ ಹಲವಾರು ಕೆಲಸಗಳು ವರ್ಕ್ ಫ್ರಂ ಹೋಂ ಮಾದರಿಯಲ್ಲಿ ಲಭ್ಯವಿವೆ. ಸ್ಟಡಿ ಬೇ ಎಂಬ ಪೋರ್ಟಲ್‌ನಲ್ಲಿ ಯಾವುದೇ ಮಧ್ಯವರ್ತಿ ಇಲ್ಲದೆ ನೀವು ಫ್ರೀಲಾನ್ಸ್ ಕೆಲಸಗಳನ್ನು ಪಡೆಯಬಹುದು. ಇಂಥವೇ ಇನ್ನೂ ಹಲವಾರು ಪೋರ್ಟಲ್‌ಗಳಿದ್ದು ಅವುಗಳ ಬಗ್ಗೆ ತಿಳಿದುಕೊಳ್ಳಬಹುದು.
ಜನರ ಜೊತೆಗೆ ಬೆರೆಯುವುದು, ಉತ್ತಮ ಸಂವಹನ ಕೌಶಲ ಹಾಗೂ ಏಕಕಾಲಕ್ಕೆ ಅನೇಕ ಕೆಲಸಗಳನ್ನು ನಿಭಾಯಿಸುವ ಚಾಕಚಕ್ಯತೆ ಹೊಂದಿರುವವರಿಗೆ ಸೇಲ್ಸ್ ಹಾಗೂ ಮಾರ್ಕೆಟಿಂಗ್ ಕೆಲಸಗಳು ಸೂಕ್ತವಾಗಿವೆ. ಸೇಲ್ಸ್ ನಿಂದ ಹಿಡಿದು ಮಾರ್ಕೆಟಿಂಗ್ ಮ್ಯಾನೇಜರ್‌ವರೆಗೆ ಮಹಿಳೆಯರು ಈ ಕ್ಷೇತ್ರದಲ್ಲಿ ಹಲವಾರು ಹುದ್ದೆಗಳನ್ನು ಪಡೆಯಬಹುದಾಗಿದೆ. ಇನ್ನು ಕೆಲ ವರ್ಷ ಸೇಲ್ಸ್ ವಿಭಾಗದಲ್ಲಿ ಕೆಲಸ ಮಾಡಿದ ಮಹಿಳೆಯರು ನಂತರ ತಮ್ಮದೇ ಸ್ವಂತ ಉದ್ಯಮವನ್ನೂ ಆರಂಭಿಸಬಹುದು. ಈಗೀಗ ಎಲ್ಲ ಕಂಪನಿಗಳು ಆನ್‌ಲೈನ್‌ ಮಾರ್ಕೆಟಿಂಗ್‌ನತ್ತ ದೃಷ್ಟಿ ಹರಿಸಿರುವುದರಿಂದ ಡಿಜಿಟಲ್ ಮಾರ್ಕೆಟಿಂಗ್‌ನಲ್ಲಿ ಮಹಿಳೆಯರಿಗೆ ಸಾಕಷ್ಟು ಉದ್ಯೋಗವಕಾಶಗಳು ಸಿಗುತ್ತಿವೆ.
ಕೆಟ್ಟ ಜೀವನ ಶೈಲಿಯ ಕಾರಣದಿಂದ ಈಗೀಗ ಬಹಳಷ್ಟು ಜನ ಅತಿಯಾದ ತೂಕ ಅಥವಾ ಇನ್ನಿತರ ಸಮಸ್ಯೆಗಳಿಂದ ಬಳಲುತ್ತಿದ್ದಾರೆ. ಇಂಥವರು ಮತ್ತೆ ಉತ್ತಮ ಜೀವನ ಶೈಲಿಗೆ ಮರಳಲು ನಿಯಮಿತ ವ್ಯಾಯಾಮ ಮಾಡುವುದು ಅತಿ ಅಗತ್ಯವಾಗಿದೆ. ಇಂಥ ಪರಿಸ್ಥಿತಿಯಲ್ಲಿ ವ್ಯಾಯಾಮ ತರಬೇತುದಾರರು ಅಥವಾ ಫಿಟ್ನೆಸ್ ಟ್ರೇನರ್‌ಗಳಿಗೆ ಬಹಳಷ್ಟು ಡಿಮ್ಯಾಂಡ್ ಉದ್ಭವವಾಗಿದೆ. ಯಾವುದೇ ಡಿಗ್ರಿ ಶಿಕ್ಷಣ ಇಲ್ಲದಿರುವವರೂ ಸಹ ಯೋಗಾ ಕೋರ್ಸ್ ಮಾಡುವುದರ ಮೂಲಕ ಫಿಟ್ನೆಸ್ ಟ್ರೇನರ್ ಆಗಬಹುದು. ಜೊತೆಗೆ ಏರೊಬಿಕ್ಸ್ ಜಿಮ್ ಮತ್ತು ಜೂಂಬಾ ಕಲಿತು ಅದರ ಟ್ರೇನರ್ ಆಗಬಹುದು.
