ಪ್ಲಾಸ್ಟಿಕ್ ಸರ್ಜರಿ ಆರಂಭಿಸಿದ್ದು ಮುನಿ ಸುಶ್ರುತ..!

ದೇವರು ಕೊಟ್ಟ ಸೌಂದರ್ಯಕ್ಕೆ ಸವಾಲಾಗಿ ಬಹುತೇಕರು ಪ್ಲಾಸ್ಟಿಕ್ ಸರ್ಜರಿ ಮಾಡಿಸಿಕೊಳ್ಳುವ ಸುದ್ದಿಯನ್ನು ಕೇಳಿದ್ದೇವೆ. ಮೈಕಲ್ ಜಾಕ್ಸನ್, ಐಶ್ವರ್ಯ ರೈ ಸೇರಿದಂತೆ ಅನೇಕ ಖ್ಯಾತನಾಮರು ಪ್ಲಾಸ್ಟಿಕ್ ಸರ್ಜರಿಯ ಮೊರೆ ಹೋಗಿದ್ದಾರೆ. ಅಪಘಾತಗಳಿಂದ ದೇಹ, ಮುಖ ನಜ್ಜುಗುಜ್ಜಾದಾಗ ಪ್ಲಾಸ್ಟಿಕ್ ಸರ್ಜರಿ ಅತ್ಯವಶ್ಯಕ. ಅಸಲಿಗೆ ಪ್ಲಾಸ್ಟಿಕ್ ಸರ್ಜರಿ ಇಂಗ್ಲೀಷರು ಕೊಟ್ಟಿರೋ ವರ ಅಂತ ಅದೆಷ್ಟೋ ಮಂದಿ ತಿಳಿದಿದ್ದಾರೆ. ಆದರೆ ಅದನ್ನ ಮೊಟ್ಟ ಮೊದಲಿಗೆ ಕಾರ್ಯರೂಪಕ್ಕೆ ತಂದವರು ಋಷಿಮುನಿಗಳು.

ನಮ್ಮ ದೇಶ ಅಯುರ್ವೇದದ ತವರು. ನಮ್ಮ ದೇಶದ ಋಷಿಮುನಿಗಳು ಅಗಾದ ಜ್ಞಾನವನ್ನು ಹೊಂದಿದ್ದರು. ಅವರ ಆಯುರ್ವೇದದಲ್ಲಿ ಕಂಡು ಹಿಡಿಯದ ಮದ್ದುಗಳಿಲ್ಲ. ಕಂಡು ಕೇಳರಿಯದ ವಿಷಯಗಳಿರಲಿಲ್ಲ. ಇತ್ತೀಚಿನ ದಿನಗಳಲ್ಲಿ ದೇಶ-ವಿದೇಶಗಳಲ್ಲಿ ಅವ್ಯಾಹತವಾಗಿ ಪ್ಲಾಸ್ಟಿಕ್ ಸರ್ಜರಿ ನಡೆಯುತ್ತಿದೆ. ಪ್ಲಾಸ್ಟಿಕ್ ಸರ್ಜರಿಯನ್ನು ಮೊದಲು ಗ್ರೀಕ್ ನ ಪೀಷಿಯೋಲಿಸ್ಟ್ ಎಡ್ವಿನ್ ಸ್ಮಿತ್ ಪ್ಯಾಪಿರಸ್ ಕ್ರಿಸ್ತಪೂರ್ವ 3000 ದಿಂದ 2500ದ ಕಾಲಘಟ್ಟದಲ್ಲಿ ಮೂಗನ್ನು ಸರಿಪಡಿಸಲು ಬಳಕೆ ಮಾಡಿದ್ದರಂತೆ.

ಆದರೆ ಜಗತ್ತಿಗೆ ಪ್ಲಾಸ್ಟಿಕ್ ಸರ್ಜರಿಯನ್ನು ಕ್ರಿಸ್ತಪೂರ್ವ 6ನೇ ಶತಮಾನದಲ್ಲಿ ತೋರಿಸಿಕೊಟ್ಟಿದ್ದು ಭಾರತದ ಮಹಾಜ್ಞಾನಿಗಳು. ಸುರೂಪಿಕಾ ಶಸ್ತ್ರ ಚಿಕಿತ್ಸೆಯನ್ನು ಎರಡೂವರೆ ಸಾವಿರ ವರ್ಷಗಳ ಹಿಂದೆ ಪ್ರಾರಂಭಿಸಿದ ಕೀರ್ತಿ ಭಾರತದ ವಾರಣಾಸಿಯ ಆಯುರ್ವೇದಾಚಾರ್ಯ ಸುಶ್ರುತನಿಗೆ ಸಲ್ಲಬೇಕು. ಸುಶ್ರುತನು ಆಯುರ್ವೇದ ವಿಜ್ಞಾನದ ತತ್ವಗಳನ್ನೆಲ್ಲ ಕ್ರೋಢಿಕರಿಸಿ ರಚಿಸಿದ `ಸುಶ್ರುತ ಸಂಹಿತೆ’ ಇಂದಿಗೂ ಮಹತ್ವದ್ದಾಗಿದೆ. ಇದರಲ್ಲಿ ಆತನ ನೂರಾರು ಶಸ್ತ್ರಚಿಕಿತ್ಸೆಗಳು, ಬಳಸುತ್ತಿದ್ದ ಮದ್ದುಗಳು, 101 ಉಪಕರಣಗಳ ಸಚಿತ್ರ ವಿವರಣೆಗಳಿವೆ.