ಭಾನುವಾರವೇ ರಜೆ ಏಕೆ…? ನಿಮಗೇನಾದ್ರು ಗೊತ್ತಾ…?

ಭಾನುವಾರ ಬಂತು ಅಂದ್ರೆ ಏನೋ ಒಂದು ರೀತಿಯ ಖುಷಿ, ನೆಮ್ಮದಿ, ಉತ್ಸಾಹ…! ವಾರ ಪೂರ್ತಿ ಶಾಲೆ, ಕಾಲೇಜು, ಕೆಲಸ ಅಂತ ಇದ್ದವರಿಗೆಲ್ಲಾ ಈ ದಿನ ರೆಸ್ಟ್ ತೆಗೆದುಕೊಳ್ಳುವ ಅವಕಾಶ..! ಹೌದು, ನಿಮಗೇನಾದ್ರು ಗೊತ್ತಾ…? ನಮ್ ಭಾರತದಲ್ಲಿ ಭಾನುವಾರವೇ ವಾರದ ರಜೆ ಏಕೆ ಅಂತ..? ಬೇರೆ ದಿನ ಯಾವತ್ತಾದ್ರು ರಜಾ ದಿನ ಅಂತ ಮಾಡಬಹುದಿತ್ತಲ್ಲಾ..?

ಕೆಲವರಿಗೆ ಗೊತ್ತಿರಬಹುದು..! ಭಾನುವಾರವೇ ರಜೆ ಸಂಪ್ರದಾಯ ಹೇಗೆ ಬೆಳೆದು ಬಂತು ಅನ್ನೋದು…! ಗೊತ್ತಿಲ್ದೇ ಇರೋರು ಮುಂದೆ ಓದಿ…

ನಮ್ಮಲ್ಲಿ ಪ್ರತಿ ಭಾನುವಾರ ರಜೆಯನ್ನು ಜಾರಿಗೆ ತಂದವರು ಭಾರತ ಟ್ರೇಡ್ ಯೂನಿಯನ್ ಚಳುವಳಿಯ ಪಿತಾಮಹ ಅಂತ ಕರೆಯಲ್ಪಡುವ ನಾರಾಯಣ್ ಮೇಘಾಜೀ ಲೋಖಂಡೇ. ನಾವಿಲ್ಲಿ ಇವರ ಸ್ಮರಣಾರ್ಥವಾಗಿ ಭಾರತೀಯ ಅಂಚೆ ಇಲಾಖೆ 2005ರ ಮೇ 3ರಂದು ಇವರ ಭಾವಚಿತ್ರ ಇರುವ ಪೋಸ್ಟಲ್ ಸ್ಟಾಂಪ್ ಅನ್ನು ಬಿಡುಗಡೆ ಮಾಡಿದ್ದನ್ನು ಸ್ಮರಿಸಬಹುದು.

1848ರಲ್ಲಿ ಮುಂಬೈನ ಥಾಣೆಯಲ್ಲಿ ಹುಟ್ಟಿದ ಇವರು ಭಾರತದ ಕಾರ್ಮಿಕ ಚಳುವಳಿಯ ಪ್ರಮುಖರು. ಪಾಶ್ಚಿಮಾತ್ಯ ದೇಶದಲ್ಲಿ ಶಿಕ್ಷಣ ಪಡೆದ ಮೊದಲ ಬ್ರಾಹ್ಮಣೇತರರು ಎಂಬಹಿರಿಮೆಗೆ ಪಾತ್ರರಾಗಿರೋ ಇವರು ಕಾರ್ಮಿಕರ ದನಿಯಾಗಿದ್ದವರು.
ಬ್ರಿಟಿಷ್ ಆಡಳಿತದ ಕಾಲದಲ್ಲಿ ವಾರದ ಅಷ್ಟೂ 7 ದಿನಗಳೂ ಕೂಡ ಕಾರ್ಮಿಕರನ್ನು ದುಡಿಸಿಕೊಳ್ಳುತ್ತಿದ್ದರು. ಇದನ್ನು ಖಂಡಿಸಿದ ನಾರಾಯಣ್ ಮೇಘಾಜೀ ಲೋಖಂಡೇ ವಾರದಲ್ಲಿ ಒಂದು ದಿನ ರಜೆ ನೀಡಲೇ ಬೇಕು ಅಂತ ಪಟ್ಟು ಹಿಡಿದರು..! ಬ್ರಿಟಿಷ್ ಸರ್ಕಾರದ ಮುಂದೆ ಬೇಡಿಕೆಯನ್ನಿಟ್ಟರೂ ಪ್ರಯೋಜನವಾಗಿಲ್ಲ. ಬ್ರಿಟಿಷರು ಲೋಖಂಡೇ ಅವರ ಬೇಡಿಯನ್ನು ಪುರಸ್ಕರಿಸಲಿಲ್ಲ.

1884ರಲ್ಲಿ ‘ಬಾಂಬೆ ಮಿಲ್ ಹ್ಯಾಂಡ್ಸ್ ಅಸೋಶಿಯೇಷನ್’ ಎಂಬ ಕಾರ್ಮಿಕ ಸಂಘಟನೆ ಸ್ಥಾಪಿಸಿ ಆ ಮೂಲಕ ವಾರದ ರಜೆ ಬೇಡಿಕೆ ಈಡೇರಿಕೆಗಾಗಿ ಆಗ್ರಹಿಸಿದರು. ಹತ್ತಾರು ಪ್ರತಿಭಟನೆಗಳ ಬಳಿಕ ಬ್ರಿಟಿಷರು ರಜೆ ನೀಡಲು ಒಪ್ಪಿದರು. ಅಂದಿನಿಂದ ಭಾನುವಾರ ಎಲ್ಲರಿಗೂ ವಾರದ ರಜೆ ನೀಡಲಾಗುತ್ತದೆ.