ಹತ್ಯೆ ಪ್ರಕರಣಕ್ಕೆ ಸಂಬಂಧಪಟ್ಟಂತಹ ಪೊಲೀಸರೊಂದಿಗೆ ಫೇಸ್ಬುಕ್ ಪಾಸ್ವರ್ಡ್ ಹಂಚಿಕೊಳ್ಳಲು ನಿರಾಕರಿಸಿದ ಯುವಕ ಜೈಲು ಸೇರಿದ ಘಟನೆ ಲಂಡನ್ನಲ್ಲಿ ನಡೆದಿದೆ. ಶಾಲಾ ಬಾಲಕಿಯೊಬ್ಬಳ ಸಾವಿನ ಪ್ರಕರಣ ತನಿಖೆಗೆ ಈ ಶಂಕಿತ ಯುವಕ ತಡೆಯೊಡ್ಡಿರುವ ಹಿನ್ನಲೆಯಲ್ಲಿ ಬಂಧಿಸಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
13 ವರ್ಷದ ಶಾಲಾ ಬಾಲಕಿ ಲೂಸಿ ಮೆಕ್ಹಗ್ ಅವರನ್ನು ಇತ್ತೀಚೆಗೆ ಇರಿದು ಹತ್ಯೆಗೈಯಲಾಗಿತ್ತು. ಈ ಸಂಬಂಧ ಸ್ಟೀಫನ್ ನಿಕೋಲಸ್ ಎಂಬ ವ್ಯಕ್ತಿಯ ಮೇಲೆ ಪೊಲೀಸರಿಗೆ ಸಂಶಯ ಮೂಡಿತ್ತು. ಈ ಬಗ್ಗೆ ಪರಿಶೀಲಿಸಲು ಸಾಮಾಜಿಕ ತಾಣ ಫೇಸ್ಬುಕ್ ಪಾಸ್ವರ್ಡ್ ನೀಡುವಂತೆ ಪೊಲೀಸರು ಮನವಿ ಮಾಡಿದ್ದರು. ಆದರೆ ತನ್ನ ಪಾಸ್ವರ್ಡ್ ಶೇರ್ ಮಾಡಲು ಸ್ಟೀಫನ್ ನಿರಾಕರಿಸಿದ್ದಾನೆ. ಹೀಗಾಗಿ ಕಾನೂನಿನ ಮೂಲಕ ಕ್ರಮ ಕೈಗೊಳ್ಳಲು ನಿರ್ಧರಿಸಿದ ಪೊಲೀಸರು ಆತನನ್ನು ಬಂಧಿಸಿದ್ದಾರೆ ಅಂತ ತಿಳಿದುಬಂದಿದೆ.
ಬಾಲಕಿ ಮತ್ತು ಸ್ಟೀಫನ್ ನಡುವೆ ಯಾವುದಾದರೂ ಸಂಬಂಧವಿತ್ತೇ?, ತನ್ನ ಸಾಮಾಜಿಕ ತಾಣದಿಂದ ಖಾಸಗಿ ಸಂದೇಶಗಳನ್ನು ಲೂಸಿ ಮೆಕ್ಹಗ್ಗೆ ಕಳುಹಿಸಿದ್ದಾನೆಯೇ? ಎಂಬುದನ್ನು ಪತ್ತೆ ಹಚ್ಚಲು ಪೊಲೀಸರು ಸ್ಟೀಫನ್ನ್ನು ವಿಚಾರಣೆಗೆ ಒಳಪಡಿಸಿದ್ದರು. ಆದರೆ ಈ ಬಗ್ಗೆ ಹೆಚ್ಚಿನ ಮಾಹಿತಿ ನೀಡದೇ, ವಿಚಾರಣೆಗೆ ಸಹಕರಿಸದೇ ಇರುವುದರಿಂದ ತನಿಖಾ ನಿಯಮಗಳ ಕಾನೂನಡಿಯಲ್ಲಿ ದೋಷಿ ಎಂದು ಪರಿಗಣಿಸಿರುವ ಕೋರ್ಟ್ ಸ್ಟೀಫನ್ಗೆ 14 ತಿಂಗಳು ಜೈಲು ಶಿಕ್ಷೆ ವಿಧಿಸಿದೆ.
