ಮನಿ ಪ್ಲಾಂಟ್ ಮನೆಗೆ ಸೊಬಗೋ ಮನಿಯ ಸಂಕೇತವೋ???

ಮನಿ ಪ್ಲಾಂಟ್ ಗಿಡದ ಬಗ್ಗೆ ತಿಳಿಯದ ವ್ಯಕ್ತಿಗಳಿಲ್ಲ, ಮನೆಯ ಒಳಾಂಗಣ ಹಾಗೂ ಹೊರಾಂಗಣ ವಿನ್ಯಾಸಕ್ಕಾಗಿ ಸಾಮಾನ್ಯವಾಗಿ ಇದನ್ನು ಬೆಳೆಸುತ್ತಾರೆ. ಆದರೆ ಇದು ಸಂಪತ್ತು, ಆರೋಗ್ಯ, ಅದೃಷ್ಟ ಹಾಗೂ ಯಶಸ್ಸನ್ನು ಹೊತ್ತು ತರೋ ಲಕ್ಕಿ ಪ್ಲಾಂಟ್ ಎಂಬುದಾಗಿಯೂ ಫೆಂಗ್ ಶುಯಿ ಶಾಸ್ತ್ರ ಹೇಳುತ್ತದೆ. ಇದನ್ನು ಮಲಬಾರ್ ಚೆಸ್ಟ್ನಟ್ ಅಥವಾ ಸಾಬಾ ನಟ್ ಎಂದೂ ಹೇಳಲಾಗುತ್ತದೆ, ಇದರ ಬಗೆಗಿನ ಕೆಲವೊಂದು ಸತ್ಯಗಳು ಇಲ್ಲಿವೆ ನೋಡಿ.

ದಟ್ಟವಾಗಿ ಬೆಳೆಸುವುದಾದಲ್ಲಿ ಮನಿ ಪ್ಲಾಂಟ್ ಸಾಧಾರಣವಾಗಿ 50-60 ಫೀಟ್ ಎತ್ತರ ಬೆಳೆಯಬಲ್ಲುದು,ಆದರೆ ಸಣ್ಣ ಸಣ್ಣ ಕುಂಡಗಳಲ್ಲಿ ನೀವು ಬೆಳೆಸಿದಲ್ಲಿ ಇದು ಕೇವಲ 10-15 ಫೀಟ್ ಎತ್ತರಕ್ಕಷ್ಟೇ ಏರಬಲ್ಲುದು. ಇದೊಂದು ಕುತೂಹಲಕಾರಿ ವಿಷ್ಯಗಳಲ್ಲೊಂದು.

ಇದರ ಪ್ರತೀ ಕವಲುಗಳಲ್ಲಿ ಐದು ಎಲೆಗಳಿದ್ದು ಇದು ಸಾಧಾರಣವಾಗಿ 12 ಇಂಚ್ ಉದ್ದ ಬೆಳೆಯುತ್ತದೆ, ಹಾಗೂ ಇವುಗಳು ಶುಭ್ರ ಹಸಿರು ಬಣ್ಣದಲ್ಲಿದ್ದು ಹೊಳೆಯುವಂತಿರುತ್ತದೆ.

ಮನಿ ಪ್ಲಾಂಟ್ ನ ಕೆನೆ ಬಣ್ಣದ ಹೂವುಗಳು ಗಾಢ ಸುಗಂಧವನ್ನು ಹೊಂದಿದ್ದು, ಇವುಗಳು ಈ ಕಾರಣಕ್ಕಾಗಿಯೇ ದುಂಬಿಗಳು, ಬಾವಲಿಗಳು ಹಾಗೂ ಚಿಟ್ಟೆಗಳನ್ನು ತನ್ನೆಡೆಗೆ ಸೆಳೆಯುತ್ತವಂತೆ.
ಇನ್ನೂ ಒಂದು ಆಶ್ಚರ್ಯಕರ ಸಂಗತಿ ಏನೆಂದರೆ ಇದಕ್ಕೆ ಬೀಜಗಳೂ ಇವೆಯಂತೆ, ಸಾಮಾನ್ಯವಾಗಿ ನಮಗೆ ಈ ಬೀಜಗಳು ಕಾಣಸಿಗದಿದ್ದರೂ ಸಹಾ, ಇವುಗಳು ಬೀಜಕೋಶದ ಒಳಗೆ ಬೆಳೆಯುತ್ತವೆ ಹಾಗೂ ಕ್ರಮೇಣ ಬೆಳೆಯುತ್ತಾ ಹೋಗಿ ಒಡೆದು ನೆಲಕ್ಕೆ ಬೀಳುತ್ತದಂತೆ.

ಫೆಂಗ್ ಶುಯಿ ಶಾಸ್ತ್ರದಂತೆ, ಇವುಗಳಲ್ಲಿರೋ 5 ಎಲೆಗಳು 5 ಸಂಕೇತವನ್ನು ಸೂಚಿಸುತ್ತದಂತೆ, ಅವು ಆಕಾಶ, ಗಾಳಿ, ನೀರು, ಬೆಂಕಿ ಹಾಗೂ ಭೂಮಿಯಂತೆ ಎಂದೂ ಹೇಳಲಾಗುತ್ತದೆ, ಆದ ಕಾರಣ ಈ ಸಂಕೇತವನ್ನು ಹೊಂದಿದ ಮನಿ ಪ್ಲಾಂಟ್ ಇದರ ಒಡೆಯನಿಗೆ ಯಶಸ್ಸು ಹಾಗೂ ಸಂತೋಷವನ್ನು ನೀಡುತ್ತದಂತೆ.
ಇನ್ನೂ ಒಂದು ಆಶ್ಚರ್ಯಕರವಾದ ವಿಷ್ಯವೇನೆಂದರೆ, ಇದರ ತಾಜಾ ಎಲೆಗಳನ್ನು ಆಹಾರವಾಗಿಯೂ ಬಳಸುತ್ತಾರಂತೆ, ಎಲೆಗಳನ್ನು ತರಕಾರಿಗಳಾಗಿಯೂ ಹಾಗೂ ಅಡುಗೆಯಲ್ಲಿ ಉಪಯೋಗಿಸುವ ಒಂದು ವಿಧದ ಪದಾರ್ಥವಾಗಿಯೂ ಬಳಸುವುದುಂಟಂತೆ. ಇದಲ್ಲದೆ ಇದರ ಬೀಜಗಳೂ ಸಹಾ ಶೇಂಗಾ ಬೀಜದ ರುಚಿಯನ್ನು ಹೊಂದಿದ್ದು, ಇದನ್ನು ಹುರಿದು ತಿಂಡಿಯಂತೆ ಸವಿಯಲಾಗುತ್ತದಂತೆ. ಹಾಗೂ ಬೀಜವನ್ನು ಹುಡಿ ಮಾಡಿ ಇದನ್ನು ಬೇಕಿಂಗ್ ತಿಂಡಿಗಳಲ್ಲಿ ಹಿಟ್ಟಿನಂತೆ ಬಳಸಲಾಗುತ್ತದಂತೆ.