ನಾನ್ “ವೆಜ್” ಅಂದ್ರೂ ಪ್ರಾಬ್ಲಂ…!

ನಾನ್ ವೆಜ್ ತಿಂದ್ರೆ ಹಾಗಾಗುತ್ತೆ ಹೀಗಾಗುತ್ತೆ ಅನ್ನೋದು ಹಳೆ ಕಥೆ. ಆದ್ರೆ ಈಗ ಪ್ಯೂರ್ ವೆಜ್ ತಿನ್ನೋರಿಗೂ ಏನೇನೋ ಆಗುತ್ತಂತೆ. ಹೌದು ಸಸ್ಯಾಹಾರ ಸೇವನೆಯಿಂದ ಹೃದಯ ಸಂಬಂಧಿ ಖಾಯಿಲೆ ಮತ್ತು ಕ್ಯಾನ್ಸರ್ ಬರುತ್ತಂತೆ. ಈ ಹಿಂದೆ ಮಾಂಸಹಾರ ಸೇವನೆಯಿಂದ ಇಂಥ ಸಮಸ್ಯೆಗಳು ಬರುತ್ತೆ ಅಂತ ಕೇಳಿದ್ವಿ ಆದ್ರೆ ಈಗ ಪ್ಯೂರ್ ವೆಜಿಟೇರಿಯನ್ ಗಳು ಸೇಫ್ ಅಲ್ಲ ಅನ್ನೋ ಆಘಾತಕಾರಿ ಅಂಶವನ್ನು ಸಂಶೋಧನೆಯೊಂದು ಹೊರಹಾಕಿದೆ.

ಅಮೇರಿಕಾದ ಯೂನಿವರ್ಸಿಟಿಯೊಂದು ಪುಣೆಯಲ್ಲಿ ಮಾಡಿದ ಸರ್ವೆಯಿಂದ ಈ ವಿಚಾರ ಬೆಳಕಿಗೆ ಬಂದಿದೆ. ಪುಣೆಯ ಬರೋಬ್ಬರಿ ಒಂದು ಸಾವಿರ ಜನ ಶುದ್ಧ ಸಸ್ಯಾಹಾರಿಗಳು ಮತ್ತು ಅಮೇರಿಕಾದ ಪಕ್ಕಾ ಮಾಂಸಹಾರಿಗಳನ್ನ ಸಮೀಕ್ಷೆಗೊಳಪಡಿಸಿದಾಗ ಈ ವಿಚಾರ ಗೊತ್ತಾಗಿದೆ. ನಾನ್ ವೆಜ್ ಪ್ರಿಯರಿಗಿಂತ ವೆಜ್ ಪ್ರಿಯರಲ್ಲೇ ಶೇ.70 ರಷ್ಟು ಹೃದಯ ಸಂಬಂಧಿ ಕಾಯಿಲೆ ಇರೋದು ಗೊತ್ತಾಗಿದೆ.

ಸಸ್ಯಾಹಾರದಲ್ಲಿನ ಕೆಲ ಅಂಶಗಳು ಜೀನ್ ನಲ್ಲಿಬದಲಾವಣೆ ತರುತ್ತಿದ್ದು, ಅದು ಕ್ಯಾನ್ಸರ್ ಮತ್ತು ಹೃದಯ ಸಂಬಂಧಿ ಕಾಯಿಲೆಗೆ ಆಹ್ವಾನ ನೀಡುತ್ತಂತೆ. ಸದ್ಯ ಇವರ ಈ ಸರ್ವೆ ಸಸ್ಯಹಾರಿಗಳ ಎದೆಯಲ್ಲಿ ನಡುಕ ಹುಟ್ಟಿಸಿದೆ.

ಆದ್ರೆ ಈ ಸಂಶೋಧನೆಯನ್ನ ಭಾರತೀಯ ವೈದ್ಯರು ಸುತಾರಾಂ ಒಪ್ಪುತ್ತಿಲ್ಲ. ಅಮೇರಿಕಾದ ಬದಲು ಭಾರತದಲ್ಲಿನ ಮಾಂಸಹಾರಿಗಳ ಜೊತೆಯೇ ಹೋಲಿಕೆ ಮಾಡಬೇಕಾಗಿತ್ತು ಅನ್ನೋದು ಅವರ ವಾದ.

ಒಟ್ಟಿನಲ್ಲಿ ಇಂಥ ವರದಿಗಳಿಂದ ಯಾವುದು ತಿನ್ನಬೇಕು ಯಾವುದು ಬಿಡಬೇಕು ಅನ್ನೋ ಗೊಂದಲ ಸೃಷ್ಠಿಯಾಗಿದೆ. ಉಸಿರಾಡೋ ಗಾಳಿಯೂ ಕಲುಷಿತವಾಗಿರೋ ಇಂದಿನ ದಿನಗಳಲ್ಲಿ ಯಾವುದು ಸೇಫ್ ಅನ್ನೋದೆ ಯಕ್ಷ ಪ್ರಶ್ನೆಯಾಗಿದೆ.