ಕನ್ನಡದಲ್ಲಿ ಇನ್ನೂ 5 ನ್ಯೂಸ್ ಚಾನಲ್..!
ಈಗಾಗ್ಲೆ ಕರ್ನಾಟಕದಲ್ಲಿ ಹದಿನೈದು ಕನ್ನಡ ನ್ಯೂಸ್ ಚಾನಲ್ಗಳಿವೆ. ಎಲ್ಲಾ ವಾಹಿನಿಗಳು ಕ್ಷಣ ಕ್ಷಣಕ್ಕೂ ಬ್ರೇಕಿಂಗ್ ನ್ಯೂಸ್ ಕೊಡುತ್ತಲೇ ಇವೆ. ಆದ್ರೆ ಈಗ ಇಡೀ ಮಾಧ್ಯಮ ಲೋಕದ ಬ್ರೇಕಿಂಗ್ ನ್ಯೂಸ್ ಏನಂದ್ರೆ, ಕೆಲವೇ ತಿಂಗಳುಗಳಲ್ಲಿ ರಾಜ್ಯದಲ್ಲಿ ಇನ್ನೂ ಐದು ಕನ್ನಡ ನ್ಯೂಸ್ ಚಾನಲ್ಗಳು ಆರಂಭವಾಗುತ್ತಿವೆ. ಇದೇನಪ್ಪಾ ಅಂತಾ ಹುಬ್ಬೇರಿಸಬೇಡಿ. ಇದೇ ಅಕ್ಟೋಬರ್ 19ನೇ ತಾರೀಕು ಕನ್ನಡದ ಖ್ಯಾತ ನಿರೂಪಕ ಚಂದನ್ ಶರ್ಮಾ ನೇತೃತ್ವದಲ್ಲಿ ಪವರ್ ನ್ಯೂಸ್ ಟಿವಿ ಪರದೆಯ ಮೇಲೆ ಅಪ್ಪಳಿಸುತ್ತಿದೆ.
ಬಿಟಿವಿ ತೊರೆದು G6 ನ್ಯೂಸ್ ಮಾಡಲು ಹೊರಟಿದ್ದ ಚಂದನ್, ಈಗ ದಿಟ್ಟ ನಿರ್ಧಾರದ ಜೊತೆಗೆ ಪವರ್ ನ್ಯೂಸ್ ಮೂಲಕ ಆನ್ಸ್ಕ್ರೀನ್ಗೆ ಬರುತ್ತಿದ್ದಾರೆ. ಪ್ರದೀಪ್, ಪ್ರಶಾಂತ್ ಸೇರಿದಂತೆ ಅನುಭವಿ ಪತ್ರಕರ್ತರು ಪವರ್ ನ್ಯೂಸ್ನ ಪಿಲ್ಲರ್ಗಳಾಗಿದ್ದಾರೆ.
ಈಗಾಗ್ಲೆ ಡಿಜಿಟಲ್ ಮಾಧ್ಯಮದಲ್ಲಿ ಸಂಚಲನವನ್ನುಂಟು ಮಾಡಿರುವ ಫಸ್ಟ್ ನ್ಯೂಸ್ ಕೂಡ ಕೆಲವೇ ದಿನಗಳಲ್ಲಿ ಆನ್ಏರ್ ಆಗಲಿದೆ. ಪ್ರತಿಭಾನ್ವಿತ ವೃತ್ತಿಪರ ಪತ್ರಕರ್ತರನ್ನ ಹೊಂದಿರುವ ಫಸ್ಟ್ನ್ಯೂಸ್ ಬಗ್ಗೆ ಮಾಧ್ಯಮ ಲೋಕದಲ್ಲಿ ಇನ್ನಿಲ್ಲದ ನಿರೀಕ್ಷೆ ಇದೆ. ನವಂಬರ್ ಅಥವಾ ಡಿಸೆಂಬರ್ನಲ್ಲಿ ಫಸ್ಟ್ ನ್ಯೂಸ್ ಲಾಂಚ್ ಎನ್ನಲಾಗುತ್ತಿದೆ.
ಇವಿಷ್ಟೇ ಅಲ್ಲ, ಟೈಮ್ಸ್ ನೌ ಕೂಡ ಕನ್ನಡದಲ್ಲಿ ನ್ಯೂಸ್ ಚಾನಲ್ ಮಾಡಲು ತುದಿಗಾಲಲ್ಲಿ ನಿಂತಿದ್ದು, ಈಗಾಗ್ಲೆ ಒಂದು ಸುತ್ತಿನ ಸರ್ವೇ ಕಾರ್ಯ ಮುಗಿಸಿದೆ. ವಾಹಿನಿ ಆರಂಭಕ್ಕೆ ಬೇಕಾದ ಸಿದ್ಧತೆಗಳು ಕೂಡ ಮುಗಿದಿವೆ.
ಝೀ ಸಂಸ್ಥೆ ಕೂಡ ಕನ್ನಡ ಸುದ್ದಿ ವಾಹಿನಿ ಆರಂಭಕ್ಕೆ ತರಾತುರಿ ನಡೆಸಿದೆ. ಕಳೆದ ವಿಧಾನಸಭಾ ಚುನಾವಣೆ ಸಮಯಕ್ಕೆಲ್ಲಾ ಝೀ ನ್ಯೂಸ್ ಕನ್ನಡ ಆನ್ ಏರ್ನಲ್ಲಿ ಇರಬೇಕಿತ್ತು. ಕಾರಣಾಂತರಗಳಿಂದ ಆಗಲಿಲ್ಲ. ಆದ್ರೆ ಈಗ ಝೀ ಸಂಸ್ಥೆ ಕನ್ನಡ ನ್ಯೂಸ್ ಚಾನಲ್ ಬಗ್ಗೆ ತಲೆ ಕೆಡಿಸಿಕೊಂಡಿದೆ. ಈಗಾಗ್ಲೆ ಆರ್ಥಿಕ ಸಂಕಷ್ಟದಲ್ಲಿರುವ ಸುದ್ದಿ ವಾಹಿನಿಯನ್ನ ಖರೀದಿ ಮಾಡುವ ಬಗ್ಗೆಯೂ ಝೀ ಸಂಸ್ಥೆ ಒಂದು ಸುತ್ತು ಚಿಂತನೆ ನಡೆಸಿದೆ ಎನ್ನಲಾಗುತ್ತಿದೆ.
ಟೈಮ್ಸ್ ನೌ ಹಾಗೂ ಝೀ ನ್ಯೂಸ್ಗಳ ಜೊತೆಗೆ ಆಂಧ್ರಪ್ರದೇಶದ ಪ್ರತಿಷ್ಠಿತ ಮಾಧ್ಯಮ ಸಂಸ್ಥೆಯಾದ ಎಬಿನ್ ಆಂಧ್ರಜ್ಯೋತಿ ಸಂಸ್ಥೆ ಕೂಡ ಕನ್ನಡದಲ್ಲಿ ಸುದ್ದಿ ವಾಹಿನಿ ಆರಂಭಕ್ಕೆ ಚಿಂತನೆ ನಡೆಸಿದೆ. ಆಂಧ್ರದಲ್ಲಿ ಈಗಾಗ್ಲೆ ABN ನ್ಯೂಸ್ ಹಾಗೂ ಆಂಧ್ರಜ್ಯೋತಿ ಪತ್ರಿಕೆಗಳು ಮನೆ ಮಾತಾಗಿವೆ. ಹೀಗಾಗಿ ಕರ್ನಾಟಕದಲ್ಲೂ ABN ನ್ಯೂಸ್ ವಾಹಿನಿ ಆರಂಭಕ್ಕೆ ಸಂಸ್ಥೆಯ ಮುಖ್ಯಸ್ಥರು ನಿರ್ಧರಿಸಿದ್ದಾರೆ. ಒಟ್ಟಾರೆ ಕನ್ನಡದ ಸುದ್ದಿವಾಹಿನಿಗಳು ಆರ್ಥಿಕ ಸಂಕಷ್ಟಕ್ಕೆ ಗುರಿಯಾಗಿರುವ ಸಂರ್ಭದಲ್ಲಿ ಟೈಮ್ಸ್ ನೌ, ಝೀ ನ್ಯೂಸ್ ಹಾಗೂ ABN ರೀತಿಯ ನೆಟ್ವರ್ಕ್ ಚಾನಲ್ಗಳು ಕರ್ನಾಟಕಕ್ಕೆ ಕಾಲಿಡುತ್ತಿರುವುದು ಯುವ ಪತ್ರಕರ್ತರ ಮೊಗದಲ್ಲಿ ನಗು ಮೂಡಿಸುವಂತಾಗಿದೆ.