ಸ್ಯಾಂಡಲ್ ವುಡ್ ಕಿಂಗ್ ಶಿವಣ್ಣ ಮತ್ತು ಕ್ರೇಜಿಸ್ಟಾರ್ ವಿ ರವಿಚಂದ್ರನ್ ಅವರು ತುಂಬ ವರ್ಷಗಳ ಹಿಂದೆ ಕೋದಂಡರಾಮ ಎಂಬ ಚಿತ್ರದಲ್ಲಿ ಒಟ್ಟಿಗೆ ಕಾಣಿಸಿಕೊಂಡಿದ್ದರು. ಆ ಕಾಲಕ್ಕೆ ಇಬ್ಬರು ದೊಡ್ಡ ನಟರಾಗಿದ್ದರಿಂದ ಈ ಮಲ್ಟಿಸ್ಟಾರರ್ ಚಿತ್ರ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿತ್ತು. ಇದಾದ ಬಳಿಕ ವಜ್ರಕಾಯ ಚಿತ್ರದ ಹಾಡೊಂದರಲ್ಲಿ ಜೊತೆಗೆ ಕಾಣಿಸಿಕೊಂಡಿದ್ದ ಈ ಜೋಡಿ ಬೇರೆ ಯಾವುದೇ ಚಿತ್ರಕ್ಕಾಗಿ ಒಂದಾಗಿರಲಿಲ್ಲ.
ಆದರೆ ಇದೀಗ ಮತ್ತೊಮ್ಮೆ ಈ ಜೋಡಿ ಸಿನಿಮಾವೊಂದಕ್ಕಾಗಿ ಒಂದಾಗುತ್ತಿದೆ. ಹೌದು ಶಿವಣ್ಣ ಮತ್ತು ರವಿಚಂದ್ರನ್ ಜೋಡಿ ಕನ್ನಡಿಗ ಎಂಬ ಸಿನಿಮಾಕ್ಕಾಗಿ ಒಂದಾಗುತ್ತಿದ್ದು ಕ್ರೇಜಿಸ್ಟಾರ್ ವಿ ರವಿಚಂದ್ರನ್ ಅವರು ನಾಯಕ ನಟನಾಗಿ ಈ ಚಿತ್ರದಲ್ಲಿ ಅಭಿನಯಿಸುತ್ತಿದ್ದಾರೆ.
ರವಿಚಂದ್ರನ್ ಅವರು ನಾಯಕ ನಟನಾಗಿ ಅಭಿನಯಿಸುತ್ತಿರುವ ಈ ಚಿತ್ರದಲ್ಲಿನ ಒಂದು ಗೀತೆಗೆ ಶಿವಣ್ಣ ಅವರು ದನಿ ನೀಡುತ್ತಿದ್ದು ಕನ್ನಡಿಗ ಚಿತ್ರಕ್ಕೆ ಸಾಥ್ ನೀಡಿದ್ದಾರೆ. ರವಿ ಬಸ್ರೂರು ಅವರ ಸ್ಟುಡಿಯೋದಲ್ಲಿ ಹಾಡಿನ ರೆಕಾರ್ಡಿಂಗ್ ನಡೆದಿದ್ದು ಶಿವಣ್ಣ ಅವರು ಚಿತ್ರದ ಕಥೆ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
