ಹಳೆಯ ಬಟ್ಟೆಗಳಿಂದ ಮನೆ ಒರೆಸುವುದು ಅಶುಭವೇ? ವಾಸ್ತು ಶಾಸ್ತ್ರ ಹೇಳುವುದೇನು?
ಮನೆ ಸ್ವಚ್ಛತೆಗೆ ಹಳೆಯ ಬಟ್ಟೆಗಳನ್ನು ಬಳಸುವುದು ಬಹುತೇಕ ಮನೆಗಳಲ್ಲಿ ಕಂಡುಬರುವ ಸಾಮಾನ್ಯ ಅಭ್ಯಾಸ. ಹಳೆಯ ಶರ್ಟ್, ಶಾಲು, ಟವಲ್ ಅಥವಾ ಇತರ ಬಟ್ಟೆಗಳನ್ನು ನೆಲ ಒರೆಸಲು ಅಥವಾ ಧೂಳು ತೊಳೆಯಲು ಉಪಯೋಗಿಸುವುದನ್ನು ಅನೇಕರು ಸಹಜವಾಗಿ ತೆಗೆದುಕೊಳ್ಳುತ್ತಾರೆ. ಆದರೆ ವಾಸ್ತು ಶಾಸ್ತ್ರದ ಪ್ರಕಾರ ಈ ಅಭ್ಯಾಸ ನಕಾರಾತ್ಮಕ ಪರಿಣಾಮಗಳನ್ನು ಉಂಟುಮಾಡಬಹುದು ಎಂದು ಹೇಳಲಾಗುತ್ತಿದೆ.
ವಾಸ್ತು ತಜ್ಞರ ಅಭಿಪ್ರಾಯದಂತೆ, ಪ್ರತಿಯೊಬ್ಬರ ಬಟ್ಟೆಯಲ್ಲೂ ಅವರ ವೈಯಕ್ತಿಕ ಶಕ್ತಿ ಹಾಗೂ ಕಂಪನಗಳು ಅಡಗಿರುತ್ತವೆ. ಆ ಬಟ್ಟೆಗಳನ್ನು ಅಶುದ್ಧ ಕಾರ್ಯಗಳಿಗೆ ಬಳಸುವುದರಿಂದ ಆ ಶಕ್ತಿ ನಕಾರಾತ್ಮಕವಾಗಿ ಪರಿವರ್ತನೆಯಾಗುತ್ತದೆ ಎಂಬ ನಂಬಿಕೆ ಇದೆ.
ಮಕ್ಕಳ ಬಟ್ಟೆಗಳಿಂದ ಮನೆ ಒರೆಸುವುದು:
ಮಕ್ಕಳು ವೇಗವಾಗಿ ಬೆಳೆಯುವ ಕಾರಣ ಅವರ ಬಟ್ಟೆಗಳು ಬೇಗ ಹಳೆಯದಾಗುತ್ತವೆ. ಇಂತಹ ಬಟ್ಟೆಗಳನ್ನು ಮನೆ ಒರೆಸಲು ಬಳಸುವುದು ವಾಸ್ತು ದೃಷ್ಟಿಯಿಂದ ಸೂಕ್ತವಲ್ಲ ಎಂದು ಹೇಳಲಾಗುತ್ತದೆ. ಮಕ್ಕಳ ಬಟ್ಟೆಗಳಲ್ಲಿ ಪಾವಿತ್ರ್ಯಪೂರ್ಣ ಶಕ್ತಿ ಇರುತ್ತದೆ. ಅವು ಅಶುದ್ಧ ಸ್ಥಳದ ಸಂಪರ್ಕಕ್ಕೆ ಬಂದರೆ ಮಕ್ಕಳ ಆರೋಗ್ಯ, ಮನೋಭಾವ ಮತ್ತು ಬೆಳವಣಿಗೆಯ ಮೇಲೆ ದುಷ್ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂಬ ನಂಬಿಕೆ ಇದೆ.
ವೃದ್ಧರು ಅಥವಾ ಮೃತ ವ್ಯಕ್ತಿಗಳ ಬಟ್ಟೆಗಳು:
ವೃದ್ಧರು ಬಳಸಿದ ಬಟ್ಟೆಗಳು ಅಥವಾ ಮೃತ ವ್ಯಕ್ತಿಗಳ ಬಟ್ಟೆಗಳನ್ನು ಸ್ವಚ್ಛತಾ ಕಾರ್ಯಗಳಿಗೆ ಬಳಸುವುದು ವಾಸ್ತು ನಿಯಮಗಳ ಪ್ರಕಾರ ಅಶುಭವೆಂದು ಪರಿಗಣಿಸಲಾಗಿದೆ. ಅಂತಹ ಬಟ್ಟೆಗಳು ಮನೆಯಲ್ಲಿ ನಕಾರಾತ್ಮಕ ಕಂಪನಗಳನ್ನು ಸೃಷ್ಟಿಸಿ, ಅಶಾಂತಿ, ಕಲಹ ಹಾಗೂ ಹಣಕಾಸಿನ ತೊಂದರೆಗಳಿಗೆ ಕಾರಣವಾಗಬಹುದು ಎಂದು ವಾಸ್ತು ಶಾಸ್ತ್ರ ತಿಳಿಸುತ್ತದೆ.
ಲಕ್ಷ್ಮೀ ದೇವಿಯ ಅನುಗ್ರಹ ಕಮ್ಮಿಯಾಗುವ ಭೀತಿ:
ಧಾರ್ಮಿಕ ಹಾಗೂ ವಾಸ್ತು ನಂಬಿಕೆಗಳ ಪ್ರಕಾರ, ಮನೆಯ ಸದಸ್ಯರ ಬಟ್ಟೆಗಳಿಂದ ನೆಲ ಒರೆಸುವುದರಿಂದ ಐಶ್ವರ್ಯ ಶಕ್ತಿ ಕುಗ್ಗುತ್ತದೆ. ಲಕ್ಷ್ಮೀ ದೇವಿಯ ಕೃಪೆ ಕಡಿಮೆಯಾಗುತ್ತದೆ ಎಂಬ ನಂಬಿಕೆಯಿದ್ದು, ಇದರಿಂದ ಬಡತನ ಮತ್ತು ಸಮಸ್ಯೆಗಳು ಎದುರಾಗಬಹುದು ಎಂದು ಹೇಳಲಾಗುತ್ತದೆ.
ವಾಸ್ತು ಪ್ರಕಾರ ಅನುಸರಿಸಬೇಕಾದ ಕ್ರಮ:
ವಾಸ್ತು ಶಾಸ್ತ್ರದ ಪ್ರಕಾರ ಹಳೆಯ ಬಟ್ಟೆಗಳನ್ನು ಮನೆ ಒರೆಸಲು ಬಳಸಬಾರದು. ಉತ್ತಮ ಸ್ಥಿತಿಯಲ್ಲಿರುವ ಬಟ್ಟೆಗಳನ್ನು ಬಡವರಿಗೆ ದಾನ ಮಾಡುವುದು ಶುಭಕರ. ಸಂಪೂರ್ಣ ಹಾಳಾದ ಬಟ್ಟೆಗಳನ್ನು ಸ್ವಚ್ಛವಾಗಿ ತೊಳೆದು ಸುಡುವುದು ಅಥವಾ ಮಣ್ಣಿನಲ್ಲಿ ಹೂಳುವುದು ಉತ್ತಮ ಕ್ರಮ ಎಂದು ಸಲಹೆ ನೀಡಲಾಗಿದೆ. ಮನೆ ಸ್ವಚ್ಛತೆಗೆ ಬಳಸುವ ಬಟ್ಟೆಗಳನ್ನು ಅದಕ್ಕಾಗಿ ತಯಾರಿಸಲಾದ ಅಥವಾ ಹೊಸ ಬಟ್ಟೆಗಳನ್ನೇ ಬಳಸುವುದು ಸೂಕ್ತವೆಂದು ವಾಸ್ತು ತಜ್ಞರು ಸೂಚಿಸಿದ್ದಾರೆ.
