ATM ಎ ಟಿ ಎಂ- ಎನಿ ಟೈಂ ಮನಿ ಸಿಗಲ್ಲ…!

ಕ್ಯಾಶ್ ಯಾಕೆ ಎ ಟಿ ಎಂ ಇದೆಯಲ್ಲ ಅಂತ ಹೇಳ್ತಿದ್ದವರಿಗೆಲ್ಲ ಶಾಕ್ ಕಾದಿದೆ. ಎ ಟಿ ಎಂ ಅಂದ್ರೆ ಎನಿ ಟೈಂ ಮನಿ ಅನ್ನೋದು ಇನ್ನು ಮುಂದೆ ಸುಳ್ಳಾಗಲಿದೆ.ರಾತ್ರಿ ತಡವಾಗಿ ಎ ಟಿ ಎಂ ನಲ್ಲಿ ಹಣ ಪಡೆಯಲು ಇನ್ನು ಮುಂದೆ ಬ್ಯಾಂಕ್ ಗಳು ಸಹಕರಿಸುವುದಿಲ್ಲ. ಏಕೆಂದರೆ ಎ ಟಿ ಎಂ ಗಳಿಗೆ ನಗದು ಪುನರ್ ಭರ್ತಿ ಮಾಡುವುದಕ್ಕೆ ಸಂಬಂಧಿಸಿದಂತೆ ಹೊಸ ನಿಯಮಗಳಿಗೆ ಜಾರಿಗೆ ತರಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ.
ಒಂದೊಮ್ಮೆ ಈ ನಿಯಮ ಜಾರಿಗೆ ಬಂದದ್ದೇ ಆದಲ್ಲಿ ರೆಡಿ ಕ್ಯಾಶ್ ಇಟ್ಟುಕೊಳ್ಳದೆ ಎ ಟಿ ಎಂ ಅನ್ನ ಅವಲಂಬಿಸಿರೋ ಸಹಸ್ರಾರು ಮಂದಿಗೆ ನಿರಾಸೆಯಾಗೋದಂತೂ ಗ್ಯಾರಂಟಿ. ರಾತ್ರಿ 8 ರ ಬಳಿಕ ಎ ಟಿ ಎಂ ಗಳನ್ನ ಪುನರ್ ಭರ್ತಿ ಮಾಡಬಾರದು ಎಂಬ ಪ್ರಸ್ತಾಪವನ್ನು ಸರ್ಕಾರ ಗಂಭೀರವಾಗಿ ಪರಿಶೀಲಿಸುತ್ತಿದೆ.
ಅಲ್ಲದೆ ಹಣ ಸಾಗಿಸೋ ವ್ಯಾನ್ ನಲ್ಲಿ ಸಿಸಿಟಿವಿ ಮತ್ತು ಜಿಪಿಎಸ್ ಅಳವಡಿಕೆಯಾಗಿರಬೇಕು. ಒಂದು ಟ್ರಿಪ್ ನಲ್ಲಿ ಗರಿಷ್ಠ 5 ಕೋಟಿ ಅನ್ನಷ್ಟೇ ಕೊಂಡೊಯ್ಯಬಹುದು. ಯಾವುದೇ ಸನ್ನಿವೇಶವನ್ನು ಸಮರ್ಥವಾಗಿ ಎದುರಿಸುವಂತ ಇಬ್ಬರು ಸಶಸ್ತ್ರ ಗಾರ್ಡ್ ಗಳಿರಬೇಕು ಇತ್ಯಾದಿ ನಿಯಮಗಳನ್ನ ಜಾರಿಗೆ ತರುವ ಬಗ್ಗೆ ಕೇಂದ್ರ ಸರ್ಕಾರ ಚಿಂತನೆ ನಡೆಸಿದೆ.
ಸುರಕ್ಷತಾ ದೃಷ್ಠಿಯಿಂದ ಈ ಯೋಜನೆ ಸ್ವಾಗತಿಸುವಂತದ್ದೇ. ಒಂದೊಮ್ಮೆ ಈ ಯೋಜನೆ ಜಾರಿಗೆ ಬಂದರೆ ಸದಾ ಜೇಬಲ್ಲಿ ಎ ಟಿ ಎಂ ಇಟ್ಟುಕೊಂಡು ಓಡಾಡುತ್ತಿದ್ದ ಜನ ಅವಶ್ಯಕತೆಗೆ ತಕ್ಕಂತೆ ಹಣ ಇಟ್ಟುಕೊಳ್ಳಬೇಕಾಗತ್ತೆ. ಆದರೆ ಎ ಟಿ ಎಂ ಸಂಸ್ಕೃತಿಗೆ ಹೊಂದಿಕೊಂಡಿರೋ ಜನಕ್ಕೆ ಈ ಯೋಜನೆ ನುಂಗಲಾರದ ಬಿಸಿ ತುಪ್ಪವಾಗಿ ಪರಿಣಮಿಸಲಿದೆ.