ಭಾರತದ ಮೇಲೆ ಗೂಬೆ ಕೂರಿಸಿದ ಪಾಕಿಸ್ತಾನ..!? ಈ ಜನ್ಮದಲ್ಲಿ ಇವ್ರಿಗೆ ಬುದ್ಧಿ ಬರಲ್ಲ ಬಿಡಿ..!!

ಪಂಜಾಬ್ ನ ಪಠಾಣ್ಕೋಟ್ ವಾಯುನೆಲೆ ಮೇಲೆ ನಡೆದಿದ್ದ ಉಗ್ರ ದಾಳಿಯಲ್ಲಿ ಪಾಕಿಸ್ತಾನದ ಕೈವಾಡವಿಲ್ಲ, ಅದು ಭಾರತವೇ ಆಯೋಜಿಸಿದ್ದು ಎಂದು ಪಾಕ್ ಜಂಟಿ ತನಿಖಾ ಆಯೋಗವು ತನ್ನ ವರದಿಯಲ್ಲಿ ಆರೋಪಿಸಿರುವುದಾಗಿ ಪಾಕಿಸ್ತಾನದ ಮಾಧ್ಯಮಗಳು ವರದಿ ಮಾಡಿವೆ. ವಾಯುನೆಲೆ ದಾಳಿಗೆ ಸಂಬಂಧಿಸಿದಂತೆ ಮೊದಲಿನಿಂದಲೂ ಪಾಕಿಸ್ತಾನ ಸಾಕ್ಷಾಧಾರಗಳು ಇಲ್ಲ ಎಂದು ಹೇಳುತ್ತ ಬರುತ್ತಿತ್ತು. ಆದ್ರೆ ಅದಕ್ಕೆ ಸಂಬಂಧಿಸಿದಂತೆ ಎಲ್ಲ ದಾಖಲೆಗಳನ್ನು ಭಾರತ ಪಾಕಿಸ್ತಾನಕ್ಕೆ ಒದಗಿಸಿತ್ತು. ಮೊಬೈಲ್ ನೆಟ್ ವರ್ಕ್ ನಿಂದ ಹಿಡಿದು ಅವರು ಮಾತನಾಡಿದ್ದ ಫೋನ್ ನಂಬರ್ ಗಳನ್ನು ಭಾರತ ಪಾಕ್ ಸರ್ಕಾರಕ್ಕೆ ನೀಡಿತ್ತು. ಅದರಲ್ಲೂ ಪ್ರಮುಖವಾಗಿ ಐಎಂ ಉಗ್ರ ಅಜರ್ ಮೊಹಮದ್ ವಾಯುನೆಲೆ ದಾಳಿಯ ಹೊಣೆಯನ್ನು ಹೊತ್ತಿದ್ದ. ಭಾರತ ಆತನ ವಿರುದ್ಧವೂ ಎಫ್ಐಆರ್ ದಾಖಲು ಮಾಡುವಂತೆ ಪಾಕ್ ಸರ್ಕಾರವನ್ನ ಒತ್ತಾಯಿಸಿತ್ತು. ಆಗ ಸಾಕ್ಷಿಗಳು ಸಾಲದು ನಾವೇ ಖುದ್ದು ಭಾರತದಲ್ಲಿ ಪರಿಶೀಲನೆ ಮಾಡಬೇಕು ಎಂದು ಪಾಕ್ ತನಿಖಾ ತಂಡ, ಭಾರತಕ್ಕೆ ಐದು ದಿನಗಳ ಭೇಟಿ ನೀಡಿ ಪರಿಶೀಲನೆ ನಡೆಸಿತ್ತು. ಆ ವೇಳೆಯೂ ಭಾರತದ ಎನ್ಐಎ ಅಧಿಕಾರಿಗಳು ಸಾಕಷ್ಟು ಮಾಹಿತಿಯನ್ನು ಪಾಕ್ ಅಧಿಕಾರಿಗಳಿಗೆ ನೀಡಿದ್ದರು. ಆದ್ರೆ ಈಗ ಪಾಕ್ ತನಿಖಾ ತಂಡ ಹೊಸ ರಾಗ ತೆಗೆದಿದೆ. ವಾಯುನೆಲೆ ಮೇಲಿನ ದಾಳಿಯನ್ನು ಭಾರತವೇ ಆಯೋಜಿಸಿದ್ದು ಎಂದು ವರದಿಯನ್ನು ಸಿದ್ಧಪಡಿಸಿದೆಯಂತೆ. ವ್ಯವಸ್ಥಿತವಾಗಿ ಪಾಕಿಸ್ತಾನದ ಮೇಲೆ ಅಪಪ್ರಚಾರಕ್ಕೆ ಭಾರತವು ಇದನ್ನು ಬಳಸಿಕೊಳ್ಳುತ್ತಿದೆ ಎಂಬುದಾಗಿ ಅಧಿಕಾರಿಗಳು ಪಾಕ್ ಪ್ರಧಾನಿ ನವಾಜ್ ಷರೀಫ್ ಅವರಿಗೆ ವರದಿಯನ್ನು ಸಲ್ಲಿಸಲು ಸಜ್ಜಾಗಿದೆ ಎಂದು ಪಾಕಿಸ್ತಾನದ ಮಾಧ್ಯಮಗಳು ವರದಿ ಮಾಡಿವೆ. ಚೆಲ್ಲಿದ ರಕ್ತದ ಮೇಲೆ ನೀಟಾಗಿ ಪಾಕಿಸ್ತಾನದ ಅಚ್ಚಿದ್ದರೂ ತಮ್ಮನ್ನೂ ಸಾಚಾ ಎಂದೇ ನುಣುಚಿಕೊಳ್ಳುವ ಪಾಕಿಸ್ತಾನಿಗಳ, ಈ ತೆರನಾದ ಪಲಾಯನವಾದ ಹೊಸತೇನಲ್ಲ.