ಹಿಂದಿನ ಸ್ಮಶಾನ ಇಂದು ಕ್ರಿಕೆಟ್ ಮೈದಾನ..! ಅವತ್ತು ಶವಗಳಿಗಾಗಿ ಮೀಸಲಿದ್ದ ಜಾಗದಲ್ಲೀಗ ಕ್ರಿಕೆಟ್ ಕಲರವ..! ಪ್ರವಾಸಿ ಆಸ್ಟ್ರೇಲಿಯಾ ಮತ್ತು ಅತಿಥೇಯ ಭಾರತ ತಂಡದ ನಡುವಿನ ಎರಡನೇ ಟಿ20 ಸಮರಕ್ಕೆ ಈ ಇತಿಹಾಸದ ಸ್ಮಶಾನ ಸಾಕ್ಷಿಯಾಗಲಿದೆ..!
ಹೌದು, ಇವತ್ತು ವಿರಾಟ್ ಕೋಹ್ಲಿ ನಾಯಕತ್ವದ ಟೀಂ ಇಂಡಿಯಾ ಹಾಗೂ ಡೇವಿಡ್ ವಾರ್ನರ್ ಮುಂದಾಳತ್ವದ ಆಸ್ಟ್ರೇಲಿಯಾ ತಂಡಗಳ ನಡುವಿನ 3 ಪಂದ್ಯಗಳ ಟಿ-20 ಸರಣಿಯ 2ನೇ ಪಂದ್ಯಕ್ಕೆ ಗುವಾಹಟಿಯ ಬರ್ಸಪರ ಕ್ರೀಡಾಂಗಣ ಸಜ್ಜಾಗಿದೆ.
ನಿಮಗಿದು ಗೊತ್ತೇ..? 2012ಕ್ಕಿಂತ ಬರ್ಸಪರ ಕ್ರಿಕೆಟ್ ಕ್ರೀಡಾಂಗಣದ ಜಾಗ ಸ್ಮಶಾನವಾಗಿತ್ತು..! ಅಸ್ಸಾಂ ಕ್ರಿಕೆಟ್ ಸಂಸ್ಥೆ ತನ್ನ ಒಡೆತನದ ಕ್ರೀಡಾಂಗಣವನ್ನು ಹೊಂದುವ ಉದ್ದೇಶದಿಂದ 2012ರಲ್ಲಿ ಸ್ಮಶಾನವಾಗಿದ್ದ ಪ್ರದೇಶವನ್ನು ಖರೀದಿಸಿ ಕ್ರೀಡಾಂಗಣ ನಿರ್ಮಿಸಿತು. ಇವತ್ತು ಈ ಕ್ರೀಡಾಂಗಣದ ಭಾರತದಲ್ಲಿಯೇ ಅತ್ಯಂತ ದೊಡ್ಡ ಡ್ರೆಸಿಂಗ್ ರೂಂ ಹೊಂದಿರೋ ಕ್ರೀಡಾಂಗಣ ಎಂಬ ಖ್ಯಾತಿಗೆ ಪಾತ್ರವಾಗಿದೆ.
ಇಂದು ಭಾರತ-ಆಸೀಸ್ ನಡುವೆ ನಡೆಯುವ ಪಂದ್ಯ ಈ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಮೊದಲ ಅಂತಾರಾಷ್ಟ್ರೀಯ ಪಂದ್ಯವಾಗಿದೆ. ಈಗಾಗಲೇ ಮೊದಲ ಟಿ-20 ಪಂದ್ಯವನ್ನು ಗೆದ್ದಿರುವ ಭಾರತ ಗೆಲುವಿನ ಅಭಿಯಾನ ಮುಂದುವರೆಸುವ ಉತ್ಸಾಹದಲ್ಲಿದೆ. ಭಾರತಕ್ಕೆ ಬಂದಲ್ಲಿಂದ ಕೇವಲ ಒಂದು ಪಂದ್ಯದ ಗೆಲುವಿಗೆ ತೃಪ್ತಿಪಟ್ಟಿರುವ ಆಸೀಸ್ ಈ ಪಂದ್ಯವನ್ನು ಗೆಲ್ಲಲೇ ಬೇಕೆಂಬ ಹಠದಲ್ಲಿದೆ. ಯಾರಿಗೆ ವಿಜಯಲಕ್ಷ್ಮೀ ಒಲಿಯುತ್ತಾಳೆ ಕಾದುನೋಡ್ಬೇಕು.
