ಭಾರತೀಯ ಕ್ರಿಕೆಟ್ನ ಅತ್ಯಂತ ಶಾಂತ, ಸಂಯಮ ಹಾಗೂ ಕಠಿಣ ಪರಿಸ್ಥಿತಿಗಳಲ್ಲಿ ತಂಡದ ಆಪತ್ಬಾಂಧವನಂತೆ ನಿಲ್ಲುತ್ತಿದ್ದ ಅಜಿಂಕ್ಯ ರಹಾನೆ, ತಮ್ಮ ಸುದೀರ್ಘ ಕ್ರಿಕೆಟ್ ಪ್ರಯಾಣಕ್ಕೆ ಅಧಿಕೃತವಾಗಿ ತೆರೆ ಎಳೆದಿದ್ದಾರೆ. ಗುರುವಾರ (ಜುಲೈ 30, 2026) ಸೋಶಿಯಲ್ ಮೀಡಿಯಾದಲ್ಲಿ ಭಾವನಾತ್ಮಕ ವಿಡಿಯೋ ಹಾಗೂ ಪೋಸ್ಟ್ ಹಂಚಿಕೊಳ್ಳುವ ಮೂಲಕ, ಎಲ್ಲಾ ಮಾದರಿಯ ಕ್ರಿಕೆಟ್ಗೆ ವಿದಾಯ ಘೋಷಿಸಿದ್ದಾರೆ. ಮೈದಾನದಲ್ಲಿ ಆರ್ಭಟಿಸದೇ, ತಮ್ಮ ಬ್ಯಾಟ್ ಮೂಲಕವೇ ಎದುರಾಳಿಗಳಿಗೆ ಉತ್ತರ ನೀಡುತ್ತಿದ್ದ ಈ ‘ಮುಂಬೈ ಕರ’ನ ನಿವೃತ್ತಿಯೊಂದಿಗೆ ಟೀಮ್ ಇಂಡಿಯಾದ ಸುವರ್ಣ ಅಧ್ಯಾಯವೊಂದು ಅಂತ್ಯಗೊಂಡಂತಾಗಿದೆ.
ತಮ್ಮ ನಿವೃತ್ತಿ ಕುರಿತು ಇನ್ಸ್ಟಾಗ್ರಾಮ್ನಲ್ಲಿ ಬರೆದುಕೊಂಡಿರುವ ರಹಾನೆ, ಕ್ಯಾಪ್ 278 ಸೈನಿಂಗ್ ಆಫ್. ಇಷ್ಟೂ ವರ್ಷಗಳ ಕಾಲ ನೀವು ನೀಡಿದ ಪ್ರೀತಿ ಮತ್ತು ಬೆಂಬಲಕ್ಕೆ ಧನ್ಯವಾದಗಳು, ಎಂದೆಂದಿಗೂ ಚಿರಋಣಿ ಎಂದು ಭಾವುಕರಾಗಿದ್ದಾರೆ. ಸಾಧಾರಣ ಹಿನ್ನೆಲೆಯಿಂದ ಬಂದು ಜಗತ್ತಿನ ಬೃಹತ್ ವೇದಿಕೆಗಳಲ್ಲಿ ದೇಶವನ್ನು ಪ್ರತಿನಿಧಿಸುವ ಹಂತಕ್ಕೆ ಬೆಳೆದದ್ದು ನನ್ನ ಪಾಲಿಗೆ ಸಿಕ್ಕ ಅತ್ಯಂತ ದೊಡ್ಡ ಸೌಭಾಗ್ಯ ಎಂದು ನೆನೆದಿರುವ ಅವರು, ತಮ್ಮ ಬೆಳವಣಿಗೆಗೆ ಕಾರಣರಾದ ತರಬೇತುದಾರರು, ಮಾರ್ಗದರ್ಶಕರು, ಸಹ ಆಟಗಾರರು ಹಾಗೂ ಕ್ರಿಕೆಟ್ ಪ್ರೇಮಿಗಳಿಗೆ ಕೃತಜ್ಞತೆ ಸಲ್ಲಿಸಿದ್ದಾರೆ.
ಮೆಲ್ಬೋರ್ನ್ ವೀರಾವೇಶ: ಆಸ್ಟ್ರೇಲಿಯಾ ನೆಲದಲ್ಲೇ ಅಹಂಕಾರ ಮುರಿದ ನಾಯಕ
ರಹಾನೆ ಕ್ರಿಕೆಟ್ ಕೆರಿಯರ್ ಎಂದ ತಕ್ಷಣ ಪ್ರತಿಯೊಬ್ಬ ಭಾರತೀಯ ಅಭಿಮಾನಿಗೂ ನೆನಪಾಗುವುದು 2020-21ರ ಐತಿಹಾಸಿಕ ‘ಬಾರ್ಡರ್-ಗವಾಸ್ಕರ್’ ಟ್ರೋಫಿ. ಅಡಿಲೇಡ್ ಟೆಸ್ಟ್ನಲ್ಲಿ ಭಾರತ ತಂಡ ಕೇವಲ 36 ರನ್ಗಳಿಗೆ ಆಲೌಟ್ ಆಗಿ, ವಿರಾಟ್ ಕೊಹ್ಲಿ ಕೂಡ ತಾಯ್ನಾಡಿಗೆ ಮರಳಿದ್ದಾಗ, ಇಡೀ ಜಗತ್ತು ಭಾರತ ಸರಣಿ ಸೋಲುವುದು ಖಚಿತ ಎಂದೇ ಲೆಕ್ಕಾಚಾರ ಹಾಕಿತ್ತು. ಆದರೆ, ಗಾಯಗಳಿಂದ ಜರ್ಜರಿತವಾಗಿದ್ದ ಯುವ ಪಡೆಗೆ ನಾಯಕನಾಗಿ ಧೈರ್ಯ ತುಂಬಿದ ರಹಾನೆ, ಮೆಲ್ಬೋರ್ನ್ನಲ್ಲಿ ಸಿಡಿಸಿದ ಆ ಭರ್ಜರಿ ಶತಕ ಭಾರತೀಯ ಕ್ರಿಕೆಟ್ ಚರಿತ್ರೆಯಲ್ಲೇ ಸುವರ್ಣ ಅಕ್ಷರಗಳಲ್ಲಿ ಬರೆದಿಡುವಂತಹದ್ದು.
ವಿಶೇಷವೆಂದರೆ, ರಹಾನೆ ನಾಯಕತ್ವ ವಹಿಸಿದ ಯಾವುದೇ ಟೆಸ್ಟ್ ಪಂದ್ಯದಲ್ಲೂ ಭಾರತ ಸೋಲನ್ನೇ ಕಂಡಿಲ್ಲ. ಆಸ್ಟ್ರೇಲಿಯಾದ ಕ್ರಿಕೆಟ್ ಗರ್ವವನ್ನು ಅವರದ್ದೇ ನೆಲದಲ್ಲಿ ಮುರಿದು 2-1 ಅಂತರದಲ್ಲಿ ಸರಣಿ ಗೆಲ್ಲಿಸಿಕೊಟ್ಟಿದ್ದು ರಹಾನೆ ಅವರ ಶ್ರೇಷ್ಠ ನಾಯಕತ್ವ ಹಾಗೂ ಸೈಲೆಂಟ್ ತಂತ್ರಗಾರಿಕೆಗೆ ಸಾಕ್ಷಿಯಾಗಿದೆ.
ವಿದೇಶಿ ಅಖಾಡದ ಆಪತ್ಬಾಂಧವ, ಅಂಕಿ-ಅಂಶಗಳ ಸರದಾರ
ಟೀಮ್ ಇಂಡಿಯಾದ ಮಧ್ಯಮ ಕ್ರಮಾಂಕದ ಆಧಾರಸ್ತಂಭವಾಗಿದ್ದ ರಹಾನೆ, ಮೂರೂ ಮಾದರಿಯ ಕ್ರಿಕೆಟ್ನಲ್ಲಿ ದೇಶಕ್ಕಾಗಿ ಅದ್ಭುತ ಕೊಡುಗೆ ನೀಡಿದ್ದಾರೆ. ಇಂಗ್ಲೆಂಡ್ನ ಲಾರ್ಡ್ಸ್, ಸೌತ್ ಆಫ್ರಿಕಾದ ವೇಗದ ಪಿಚ್ಗಳು ಹಾಗೂ ಆಸ್ಟ್ರೇಲಿಯಾದ ಕಠಿಣ ಸನ್ನಿವೇಶಗಳಲ್ಲಿ ರಹಾನೆ ಬ್ಯಾಟ್ನಿಂದ ಬಂದ ರನ್ಗಳು ಭಾರತಕ್ಕೆ ಅಪರೂಪದ ಗೆಲುವುಗಳನ್ನು ತಂದಿಟ್ಟಿವೆ.
ರಹಾನೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಅಂಕಿ-ಅಂಶಗಳು:
- ಟೆಸ್ಟ್ ಕ್ರಿಕೆಟ್: 85 ಪಂದ್ಯಗಳು | 5,077 ರನ್ಗಳು | 12 ಶತಕ / 26 ಅರ್ಧಶತಕ
- ಏಕದಿನ (ODI): 90 ಪಂದ್ಯಗಳು | 2,962 ರನ್ಗಳು | 3 ಶತಕ / 24 ಅರ್ಧಶತಕ
- ಟಿ20 ಅಂತಾರಾಷ್ಟ್ರೀಯ: 20 ಪಂದ್ಯಗಳು | 375 ರನ್ಗಳು
ಐಪಿಎಲ್ ಮತ್ತು ದೇಶೀಯ ಅಖಾಡದಲ್ಲೂ ಮಿಂಚಿದ್ದ ‘ಕ್ಲಾಸ್’ ಬ್ಯಾಟರ್
ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಕೊನೆಯ ಬಾರಿಗೆ 2023ರ ಜುಲೈನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಟೆಸ್ಟ್ ಆಡಿದ್ದ ರಹಾನೆ, ತದನಂತರ ದೇಶೀಯ ಹಾಗೂ ಐಪಿಎಲ್ ಕ್ರಿಕೆಟ್ನಲ್ಲಿ ಸಕ್ರಿಯರಾಗಿದ್ದರು. ಕಳೆದ ಕೆಲವು ಸೀಸನ್ಗಳಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ತಂಡದ ನಾಯಕತ್ವ ವಹಿಸಿಕೊಂಡು ಯುವ ಆಟಗಾರರಿಗೆ ಮಾರ್ಗದರ್ಶನ ನೀಡಿದ್ದರು. ಮುಂಬೈ ದೇಶೀಯ ತಂಡದ ಪರ ರೆಡ್-ಬಾಲ್ ಕ್ರಿಕೆಟ್ನಲ್ಲೂ ನಿರಂತರವಾಗಿ ಆಡುವ ಮೂಲಕ ತಮ್ಮ ಕ್ರಿಕೆಟ್ ಪ್ರೇಮವನ್ನು ಜೀವಂತವಾಗಿರಿಸಿದ್ದರು. ಆದರೆ, ಇದೀಗ ಐಪಿಎಲ್ ಸೇರಿದಂತೆ ಎಲ್ಲಾ ಮಾದರಿಯ ಕ್ರಿಕೆಟ್ಗೆ ವಿದಾಯ ಹೇಳುವ ಮೂಲಕ ಅಭಿಮಾನಿಗಳಿಗೆ ದಿಢೀರ್ ನಿರಾಸೆ ಮೂಡಿಸಿದ್ದಾರೆ.
ಬ್ಯಾಟಿಂಗ್ ಹೊರತಾಗಿ, ಸ್ಲಿಪ್ ಫೀಲ್ಡಿಂಗ್ನಲ್ಲಿ ರಹಾನೆಗೆ ಅವರೇ ಸಾಟಿ. ಅವರು ಹಿಡಿಯುತ್ತಿದ್ದ ಅದ್ಭುತ ಕ್ಯಾಚ್ಗಳು ಭಾರತೀಯ ಟೆಸ್ಟ್ ತಂಡದ ಬೌಲಿಂಗ್ ವಿಭಾಗಕ್ಕೆ ದೊಡ್ಡ ಬಲ ತುಂಬುತ್ತಿದ್ದವು.
ಮುಂಬೈ ಕ್ರಿಕೆಟ್ ಸಂಸ್ಥೆಯಿಂದ ಭಾವಪೂರ್ಣ ವಿದಾಯ
ರಹಾನೆ ನಿವೃತ್ತಿಯ ನಿರ್ಧಾರ ಹೊರಬೀಳುತ್ತಿದ್ದಂತೆ ಮುಂಬೈ ಕ್ರಿಕೆಟ್ ಸಂಸ್ಥೆಯ (MCA) ಅಧ್ಯಕ್ಷ ಅಜಿಂಕ್ಯ ನಾಯಕ್ ಗೌರವ ಸಲ್ಲಿಸಿದ್ದು, ಅಜಿಂಕ್ಯ ರಹಾನೆ ಅವರ ನಿವೃತ್ತಿಯು ಭಾರತೀಯ ಕ್ರಿಕೆಟ್ನ ಅತ್ಯುತ್ತಮ ಅಧ್ಯಾಯವೊಂದಕ್ಕೆ ತೆರೆ ಎಳೆದಿದೆ. ಒತ್ತಡದ ಸಮಯದಲ್ಲಿ ಅವರ ನಿಷ್ಠೆ, ತಾಳ್ಮೆ ಮತ್ತು ಆಟದ ಮೇಲಿದ್ದ ಕಮಿಟ್ಮೆಂಟ್ ಅವರನ್ನು ಮುಂಬೈ ಕ್ರಿಕೆಟ್ನ ಶ್ರೇಷ್ಠ ರಾಯಭಾರಿಯನ್ನಾಗಿ ಮಾಡಿದೆ. ಅವರ ಈ ಪಯಣ ಮುಂಬರುವ ಪೀಳಿಗೆಗೆ ಸದಾ ಪ್ರೇರಣೆಯಾಗಿರಲಿದೆ, ಎಂದು ಕೊಂಡಾಡಿದ್ದಾರೆ.
ಯಾವುದೇ ಆರ್ಭಟವಿಲ್ಲದೆ, ಕೇವಲ ಶ್ರಮ, ತಾಳ್ಮೆ ಹಾಗೂ ನಿಸ್ವಾರ್ಥ ಆಟದಿಂದ ಭಾರತೀಯ ಕ್ರಿಕೆಟ್ ಪ್ರೇಮಿಗಳ ಹೃದಯ ಗೆದ್ದ ಅಜಿಂಕ್ಯ ರಹಾನೆ ಅವರ ಈ ಎರಡನೇ ಇನ್ನಿಂಗ್ಸ್ ಸುಖಕರವಾಗಿರಲಿ ಎಂಬುದೇ ಪ್ರತಿಯೊಬ್ಬ ಕ್ರಿಕೆಟ್ ಅಭಿಮಾನಿಯ ಹಾರೈಕೆ. ಗುಡ್ ಲಕ್ ಅಜಿಂಕ್ಯ …
