ಅತೀ ಸಣ್ಣ ವಯಸ್ಸಿನಲ್ಲೇ ವಯಸ್ಸಾದವರಂತೆ ಕಾಣಲು ಕಾರಣವೇನು?

ಅತೀ ಸಣ್ಣ ವಯಸ್ಸಿನಲ್ಲೇ ವಯಸ್ಸಾದವರಂತೆ ಕಾಣಲು ಕಾರಣವೇನು?

ಎಲ್ಲರಿಗೂ ವಯಸ್ಸಾಗುವುದು ಸಹಜ. ಆದರೆ ಕೆಲವರಲ್ಲಿ ಜೀವನಶೈಲಿ ಮತ್ತು ಆಹಾರ ಪದ್ಧತಿಯ ಪರಿಣಾಮವಾಗಿ ವಯಸ್ಸಿಗಿಂತ ಬೇಗನೆ ವಯಸ್ಸಾದಂತೆ ಕಾಣಿಸುತ್ತಾರೆ. 35 ವರ್ಷ ವಯಸ್ಸು ಇದ್ದರೂ, 50 ವರ್ಷದವರಂತೆ ಕಾಣುವ ಸ್ಥಿತಿ ಉಂಟಾಗುತ್ತದೆ. ವಿಶೇಷವಾಗಿ ಮಹಿಳೆಯರಲ್ಲಿ ಈ ಸಮಸ್ಯೆ ಹೆಚ್ಚಾಗಿ ಕಂಡುಬರುತ್ತಿದೆ ಎಂದು ತಜ್ಞರು ತಿಳಿಸಿದ್ದಾರೆ.

ತಜ್ಞರ ಪ್ರಕಾರ, ಮುಖದಲ್ಲಿ ಸುಕ್ಕುಗಳು, ಕೂದಲು ಉದುರುವುದು, ಆಯಾಸ ಮತ್ತು ಆತ್ಮವಿಶ್ವಾಸದ ಕೊರತೆ ಮುಂತಾದವು ಅಕಾಲಿಕ ವಯಸ್ಸಾಗುವಿಕೆಯ ಸಾಮಾನ್ಯ ಲಕ್ಷಣಗಳಾಗಿವೆ. ಇದಕ್ಕೆ ಕಾರಣವಾಗಿ ಆಹಾರ ಪದ್ಧತಿ, ಧೂಮಪಾನ, ಮದ್ಯಪಾನ, ಸೂರ್ಯನ ಹಾನಿಕಾರಕ ಕಿರಣಗಳು ಹಾಗೂ ಜಡ ಜೀವನಶೈಲಿಯನ್ನು ಅವರು ಉಲ್ಲೇಖಿಸಿದ್ದಾರೆ.

ಫಾಸ್ಟ್ ಫುಡ್ ಮತ್ತು ಪ್ಯಾಕ್ ಮಾಡಿದ ಆಹಾರ ಸೇವನೆಯು ದೇಹದ ಜೀವಕೋಶಗಳಿಗೆ ಹಾನಿ ಮಾಡುತ್ತದೆ. ಇದರ ಪರಿಣಾಮ ಚರ್ಮ ಮತ್ತು ಕೂದಲಿನ ಮೇಲೆ ಮೊದಲು ಕಾಣಿಸುತ್ತದೆ. ಆದ್ದರಿಂದ ಹಸಿರು ತರಕಾರಿಗಳು, ಹಣ್ಣುಗಳು, ಬೀಜಗಳು ಮತ್ತು ಸಾಕಷ್ಟು ಪ್ರಮಾಣದ ನೀರನ್ನು ಸೇವಿಸುವುದು ಮುಖ್ಯ.

ಧೂಮಪಾನ ಮತ್ತು ಮದ್ಯಪಾನವು ಚರ್ಮವನ್ನು ಮಂದಗೊಳಿಸಿ ಸುಕ್ಕು ಹೆಚ್ಚಿಸುತ್ತದೆ. ಇವುಗಳಿಂದ ಸಂಪೂರ್ಣ ದೂರವಿರುವುದು ಅತ್ಯಂತ ಪರಿಣಾಮಕಾರಿ ಪರಿಹಾರ.

ಸನ್‌ಸ್ಕ್ರೀನ್ ಬಳಸದೇ ಬಿಸಿಲಿಗೆ ಹೋಗುವುದು ಚರ್ಮಕ್ಕೆ ಹಾನಿ ಉಂಟುಮಾಡುತ್ತದೆ. ಯುವಿ ಕಿರಣಗಳು ನಸುಕಂದು ಮಚ್ಚೆಗಳು ಹಾಗೂ ವಯಸ್ಸಾದ ಕಲೆಗಳನ್ನು ಹೆಚ್ಚಿಸುತ್ತವೆ.

ವ್ಯಾಯಾಮದ ಕೊರತೆ ಮತ್ತು ಕಡಿಮೆ ನಿದ್ರೆ ದೇಹದ ಶಕ್ತಿಯನ್ನು ಕುಗ್ಗಿಸಿ ಚರ್ಮದ ಹೊಳಪನ್ನು ಹಾಳು ಮಾಡುತ್ತದೆ. ಪ್ರತಿದಿನ ಕನಿಷ್ಠ 30 ನಿಮಿಷ ವ್ಯಾಯಾಮ, 7–8 ಗಂಟೆಗಳ ನಿದ್ರೆ ಹಾಗೂ ಯೋಗ–ಧ್ಯಾನ ಮಾಡುವಂತೆ ತಜ್ಞರು ಸಲಹೆ ನೀಡಿದ್ದಾರೆ.

ತಜ್ಞರ ಅಭಿಪ್ರಾಯದಲ್ಲಿ, ಆರೋಗ್ಯಕರ ಜೀವನಶೈಲಿ, ಸರಿಯಾದ ಆಹಾರ ಮತ್ತು ನಿದ್ರೆಯ ಮೂಲಕ ಮಹಿಳೆಯರು ಅಕಾಲಿಕ ವಯಸ್ಸಾಗುವಿಕೆಯನ್ನು ತಡೆಯಲು ಸಾಧ್ಯ.