ಐಪಿಎಲ್ನಲ್ಲಿ ಎದುರಾಳಿ ಬೌಲರ್ಗಳನ್ನು ಚೆಂಡಾಡುತ್ತಿದ್ದ ಯುವ ಓಪನರ್ ಅಭಿಷೇಕ್ ಶರ್ಮಾ, ಜಿಂಬಾಬ್ವೆ ಪ್ರವಾಸದಲ್ಲಿ ಸಂಪೂರ್ಣವಾಗಿ ಹಳಿ ತಪ್ಪಿದ್ದಾರೆ. ಆಕ್ರಮಣಕಾರಿ ಬ್ಯಾಟಿಂಗ್ಗೆ ಹೆಸರಾಗಿದ್ದ ಈ ಯುವ ಆಟಗಾರ, ಜಿಂಬಾಬ್ವೆ ವಿರುದ್ಧದ ಸರಣಿಯಲ್ಲಿ ರನ್ ಗಳಿಸಲು ಅಕ್ಷರಶಃ ಪರದಾಡಿದ್ದಾರೆ. ಮೂರನೇ ಟಿ20 ಪಂದ್ಯದಲ್ಲೂ ಅವರ ಕಳಪೆ ಫಾರ್ಮ್ ಮುಂದುವರಿದಿದ್ದು, ಹೀರೋ ಆಗಬೇಕಿದ್ದ ಅಭಿಷೇಕ್ ಶರ್ಮಾ ಜೀರೋ ಆಗಿದ್ದಾರೆ. ತೀವ್ರ ಅಸಮಾಧಾನಕ್ಕೆ ಕಾರಣರಾಗಿದ್ದಾರೆ.
ಮೂರನೇ ಪಂದ್ಯದಲ್ಲೂ ಫ್ಲಾಪ್: ಒಂದಂಕಿ ಗಡಿ ದಾಟಲು ಹರಸಾಹಸ
ಜಿಂಬಾಬ್ವೆ ವಿರುದ್ಧದ ಟಿ20 ಸರಣಿಯಲ್ಲಿ ಅಭಿಷೇಕ್ ಶರ್ಮಾ ಬ್ಯಾಟ್ನಿಂದ ಒಂದೇ ಒಂದು ಬಿಗ್ ಇನ್ನಿಂಗ್ಸ್ ಬಂದಿಲ್ಲ. ಸರಣಿಯ ಆರಂಭದಿಂದಲೂ ಸಿಂಗಲ್ ಡಿಜಿಟ್ಗೆ ವಿಕೆಟ್ ಒಪ್ಪಿಸುತ್ತಿರುವ ಅವರು, ಮೂರನೇ ಪಂದ್ಯದಲ್ಲೂ ಕೇವಲ 2 ರನ್ ಗಳಿಸಿ ಪೆವಿಲಿಯನ್ ಹಾದಿ ಹಿಡಿದರು. ಒಂದೇ ಒಂದು ಪಂದ್ಯದಲ್ಲೂ ಕ್ರೀಸ್ನಲ್ಲಿ ನಿಂತು ತಂಡಕ್ಕೆ ಆಸರೆಯಾಗಲು ಸಾಧ್ಯವಾಗದೇ ಇರುವುದು ಅಭಿಮಾನಿಗಳಲ್ಲಿ ಭಾರೀ ನಿರಾಶೆ ಮೂಡಿಸಿದೆ.
ಮೂರು ಪಂದ್ಯ, ಒಬ್ಬನೇ ಬೌಲರ್: ಮುಜರಬಾನಿ ಬಲೆಯಲ್ಲಿ ಸಿಲುಕಿದ ಭಾರತೀಯ ಓಪನರ್
ವಿಶೇಷವೆಂದರೆ ಈ ಮೂರೂ ಪಂದ್ಯಗಳಲ್ಲೂ ಅಭಿಷೇಕ್ ಶರ್ಮಾ ಒಂದೇ ಬೌಲರ್ಗೆ ವಿಕೆಟ್ ಒಪ್ಪಿಸಿ ನಿರ್ಗಮಿಸಿದ್ದಾರೆ. ಜಿಂಬಾಬ್ವೆ ತಂಡದ ಎತ್ತರದ ವೇಗಿ ಬ್ಲೆಸಿಂಗ್ ಮುಜರಬಾನಿ ಎಸೆತಗಳನ್ನು ಕಣ್ಮುಚ್ಚಿ ಸ್ವೀಪ್ ಅಥವಾ ಶಾರ್ಟ್ ಪಿಚ್ ಯತ್ನಕ್ಕೆ ಕೈಹಾಕಿ ವಿಕೆಟ್ ಚೆಲ್ಲುತ್ತಿದ್ದಾರೆ. ಮುಜರಬಾನಿ ಅವರ ಲೈನ್ ಅಂಡ್ ಲೆಂಗ್ತ್ ಗ್ರಹಿಸುವಲ್ಲಿ ಸಂಪೂರ್ಣವಾಗಿ ವಿಫಲವಾಗಿರುವ ಅಭಿಷೇಕ್, ಅವರ ವಿರುದ್ಧವೇ ಸತತ ಮೂರು ಬಾರಿ ಔಟಾಗಿ ಹ್ಯಾಟ್ರಿಕ್ ನೆರಳು ಅನುಭವಿಸಿದ್ದಾರೆ.
ಸರಣಿಯುದ್ದಕ್ಕೂ ಒಂದಂಕಿ ರನ್ : ಕೇವಲ 11 ರನ್ಗಳಿಗೆ ಕಥೆ ಮುಕ್ತಾಯ
ಅಭಿಷೇಕ್ ಶರ್ಮಾ ಅವರ ಈ ಸರಣಿಯ ಸ್ಕೋರ್ ಕಾರ್ಡ್ ನೋಡಿದರೆ ನಿಜಕ್ಕೂ ಅಚ್ಚರಿಯಾಗುತ್ತದೆ. ಮೊದಲ ಪಂದ್ಯದಲ್ಲಿ 8 ಎಸೆತ ಎದುರಿಸಿ ಕೇವಲ 1 ರನ್ ಗಳಿಸಿದ್ದ ಅವರು, ಎರಡನೇ ಪಂದ್ಯದಲ್ಲೂ 8 ಎಸೆತಗಳಲ್ಲಿ 8 ರನ್ ಗಳಿಸಿ ಔಟಾಗಿದ್ದರು. ಇದೀಗ ಮೂರನೇ ಪಂದ್ಯದಲ್ಲಿ 2 ರನ್ ಬಾರಿಸಿ ಪೆವಿಲಿಯನ್ ಸೇರಿದ್ದಾರೆ. ಒಟ್ಟಾರೆಯಾಗಿ ಸರಣಿಯ ಮೂರು ಇನ್ನಿಂಗ್ಸ್ಗಳಿಂದ ಬಂದಿರುವುದು ಕೇವಲ 11 ರನ್ ಮಾತ್ರ.
ಕೆಎಲ್ ರಾಹುಲ್, ಶ್ರೇಯಸ್ ಐಯ್ಯರ್, ಹಾರ್ದಿಕ್ ಪಾಂಡ್ಯ ನಂತರ ಬೇಡದ ದಾಖಲೆ ಈಗ ಅಭಿಷೇಕ್ ಪಾಲು
ಈ ಕಳಪೆ ಪ್ರದರ್ಶನದ ಮೂಲಕ ಅಭಿಷೇಕ್ ಶರ್ಮಾ ಟೀಮ್ ಇಂಡಿಯಾದ ಹಿರಿಯ ಆಟಗಾರರೊಬ್ಬರ ಹೆಸರಲ್ಲಿದ್ದ ಅತ್ಯಂತ ಕೆಟ್ಟ ದಾಖಲೆಯೊಂದನ್ನು ತಮ್ಮ ಹೆಸರಿಗೆ ಬರೆಸಿಕೊಂಡಿದ್ದಾರೆ. ಮೂರು ಅಥವಾ ಅದಕ್ಕಿಂತ ಹೆಚ್ಚು ಪಂದ್ಯಗಳ ದ್ವಿಪಕ್ಷೀಯ ಟಿ20 ಸರಣಿಯಲ್ಲಿ ಆರಂಭಿಕ ಆಟಗಾರನಾಗಿ ಅತಿ ಕಡಿಮೆ ರನ್ ಗಳಿಸಿದ ಭಾರತೀಯ ಬ್ಯಾಟ್ಸ್ಮನ್ ಎಂಬ ಶಾಪಗ್ರಸ್ಥ ದಾಖಲೆ ಈಗ ಅಭಿಷೇಕ್ ಪಾಲಾಗಿದೆ. ಅಭಿಷೇಕ್ ಶರ್ಮಾ ಮುನ್ನ ಶ್ರೇಯಸ್ ಐಯ್ಯರ್, ಹಾರ್ದಿಕ್ ಪಾಂಡ್ಯ ಮತ್ತು ಕೆ.ಎಲ್.ರಾಹುಲ್ ಈ ಬೇಡದ ದಾಖಲೆ ಬರೆದಿದ್ದರು.
ಮುಂದಿನ ಸರಣಿಗೆ ಟೀಮ್ನಿಂದ ಡ್ರಾಪ್ ಭೀತಿ: ಯುವ ಆಟಗಾರನಿಗೆ ಕಾದಿದೆಯಾ ಕಠಿಣ ಹಾದಿ?
ಐಪಿಎಲ್ನಲ್ಲಿ ಬೌಂಡರಿ, ಸಿಕ್ಸರ್ಗಳ ಸುರಿಮಳೆ ಗೈದು ರಾಷ್ಟ್ರೀಯ ತಂಡಕ್ಕೆ ಭರ್ಜರಿಯಾಗಿ ಎಂಟ್ರಿ ಕೊಟ್ಟಿದ್ದ ಅಭಿಷೇಕ್, ಅಂತಾರಾಷ್ಟ್ರೀಯ ಮಟ್ಟದ ಒತ್ತಡವನ್ನು ತಡೆಯಲು ವಿಫಲರಾಗುತ್ತಿದ್ದಾರೆ. ಸಾಲು ಸಾಲು ಅವಕಾಶ ಸಿಕ್ಕರೂ ಅದನ್ನು ಬಳಸಿಕೊಳ್ಳುವಲ್ಲಿ ಎಡವುತ್ತಿರುವ ಹಿನ್ನೆಲೆ, ಮುಂಬರುವ ಸರಣಿಗಳಲ್ಲಿ ಇವರಿಗೆ ಭಾರತೀಯ ತಂಡದ ಪ್ಲೇಯಿಂಗ್ 11ನಲ್ಲಿ ಜಾಗ ಸಿಗುವುದು ಅನುಮಾನ ಎನ್ನಲಾಗುತ್ತಿದೆ. ರೇಸ್ನಲ್ಲಿ ಹಲವು ಆಟಗಾರರು ಕಾಯುತ್ತಿರುವುದರಿಂದ ಅಭಿಷೇಕ್ ಶರ್ಮಾಗೆ ಮುಂದಿನ ದಿನಗಳಲ್ಲಿ ಕಠಿಣ ಸವಾಲು ಎದುರಾಗುವುದು ಖಚಿತ.
