ತೆರೆಮೇಲೆ ಖಳನಟನಾಗಿ ಅಭಿನಯಿಸಿದ್ದರೂ, ನಿಜಬದುಕಿನಲ್ಲಿ ಸೋನು ಸೂದ್ ‘ಹೀರೋ’ ಆಗಿದ್ದಾರೆ. ಕೋವಿಡ್‌ನಂತಹ ಆರೋಗ್ಯ ತುರ್ತು ಸಂದರ್ಭದಲ್ಲಿ ಅನೇಕರ ಜೀವ ಉಳಿಸಲು ಸೋನು ಸೂದ್ ಶ್ರಮಿಸುತ್ತಿದ್ದಾರೆ. ಕೊರೊನಾ ಸೋಂಕಿತರ ಚಿಕಿತ್ಸೆಗಾಗಿ ಆಸ್ಪತ್ರೆಯಲ್ಲಿ ಬೆಡ್ ಕೊಡಿಸುವುದರಿಂದ ಹಿಡಿದು, ಇಂಜೆಕ್ಷನ್ ಮತ್ತು ಆಕ್ಸಿಜನ್ ತಲುಪಿಸುವವರೆಗೂ ಜನರಿಗೆ ಸೋನು ಸೂದ್ ಸಹಾಯ ಮಾಡುತ್ತಿದ್ದಾರೆ.
ತಮ್ಮ ಆಸ್ತಿಯನ್ನು ಅಡವಿಟ್ಟು, ತುರ್ತು ಸನ್ನಿವೇಶದಲ್ಲಿ ಮಾನವೀಯತೆ ಮೆರೆಯುತ್ತಿರುವ ಸೋನು ಸೂದ್ ಅಕ್ಷರಶಃ ಭಾರತದ ರಿಯಲ್ ಹೀರೋ ಆಗಿದ್ದಾರೆ. ಇಂತಿಪ್ಪ ನಟ ಸೋನು ಸೂದ್ ಭಾರತದ ಪ್ರಧಾನಿ ಆಗಬೇಕು ಎಂದು ಬಾಲಿವುಡ್ ನಟಿ ಹುಮಾ ಖುರೇಶಿ ಅಭಿಪ್ರಾಯ ಪಟ್ಟಿದ್ದಾರೆ.
ಹುಮಾ ಖುರೇಶಿ ಅವರ ಈ ಅಭಿಪ್ರಾಯಕ್ಕೆ ನಟ ಸೋನು ಸೂದ್ ಪ್ರತಿಕ್ರಿಯೆ ನೀಡಿದ್ದಾರೆ. ”ಹುಮಾ ಖುರೇಶಿ ಹಾಗೆ ಯೋಚಿಸಿದ್ದಾರೆ ಅಂದರೆ ನಾನು ಏನೋ ಒಳ್ಳೆಯದ್ದನ್ನೇ ಮಾಡಿರಬೇಕು. ಆದರೂ, ಅವರ ಮಾತನ್ನು ನಾನು ಒಪ್ಪುವುದಿಲ್ಲ. ನಮ್ಮ ಈಗಿನ ಪ್ರಧಾನಿ ಬಹಳ ಸಮರ್ಥವಾಗಿದ್ದಾರೆ” ಎಂದು ನಟ ಸೋನು ಸೂದ್ ಸಂದರ್ಶನವೊಂದರಲ್ಲಿ ತಿಳಿಸಿದ್ದಾರೆ.
ಹಾಗೇ, ”ಅಂತಹ ಜವಾಬ್ದಾರಿ ಹೊರಲು ನಾನಿನ್ನೂ ತುಂಬಾ ಚಿಕ್ಕವನು” ಅಂತಲೂ ಸೋನು ಸೂದ್ ಹೇಳಿದ್ದಾರೆ. ಅಂದ್ಹಾಗೆ, ಸೋನು ಸೂದ್ ಪ್ರಧಾನಿ ಆಗಬೇಕು ಎಂಬ ಮಾತು ಕೇಳಿಬಂದಿರುವುದು ಇದೇ ಮೊದಲೇನಲ್ಲ. ಕೋವಿಡ್ ಪರಿಸ್ಥಿತಿಯಲ್ಲಿ ಸೋನು ಸೂದ್ ಅವರ ಹೃದಯವಂತಿಕೆ ಕಂಡ ಅನೇಕರು ಇದೇ ಬಯಕೆಯನ್ನು ಹೊರಹಾಕಿದ್ದರು.
