ಹೈದರಾಬಾದ್: ಇತ್ತೀಚಿನ ದಿನಗಳಲ್ಲಿ ಟ್ರಾಫಿಕ್ ಕಿರಿಕಿರಿ ಇಲ್ಲದೆ ಆರಾಮವಾಗಿ ಪ್ರಯಾಣ ಮಾಡಬಹುದು ಅಂತ ಜನ ಮೆಟ್ರೋ ರೈಲುಗಳನ್ನು ಹೆಚ್ಚಾಗಿ ನೆಚ್ಚಿಕೊಳ್ಳುತ್ತಿದ್ದಾರೆ. ಆದರೆ, ಸೌಕರ್ಯ ಸಿಕ್ಕರೂ ಕೆಲವರಲ್ಲಿ ಕನಿಷ್ಠ ನಾಗರಿಕ ಪ್ರಜ್ಞೆ ಮಾತ್ರ ಇನ್ನು ಬಂದಿಲ್ಲ ಅನ್ನೋದು ಪದೇ ಪದೇ ಸಾಬೀತಾಗುತ್ತಿದೆ. ಇಲ್ಲೊಬ್ಬ ಗಡ್ಡಧಾರಿ ಮೆಟ್ರೋ ರೈಲನ್ನು ತನ್ನಪ್ಪನ ಮನೆ ಆಸ್ತಿ ಅಂದುಕೊಂಡಂತೆ ಸೊಕ್ಕಿನಿಂದ ವರ್ತಿಸಿ, ಎರಡು ಸೀಟುಗಳನ್ನು ಆಕ್ರಮಿಸಿಕೊಂಡು ಕಿಟಕಿಯವರೆಗೆ ಕಾಲು ಚಾಚಿ ಕುಳಿತಿರುವ ಅಹಂಕಾರದ ವಿಡಿಯೋ ಮತ್ತು ಫೋಟೋಗಳು ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಸಾರ್ವಜನಿಕರ ಕೆಂಗಣ್ಣಿಗೆ ಗುರಿಯಾಗಿದೆ.
ಅಸಲಿಗೆ ಈ ಹೈಡ್ರಾಮಾ ನಡೆದಿರುವುದು ಹೈದರಾಬಾದ್ ಮೆಟ್ರೋ ರೈಲಿನಲ್ಲಿ. ವೈರಲ್ ಆಗಿರುವ ಫೋಟೋ ಮತ್ತು ವಿಡಿಯೋದಲ್ಲಿ ಸ್ಪಷ್ಟವಾಗಿ ಕಾಣುವಂತೆ, ಕನ್ನಡಕ ಧರಿಸಿರುವ ಈ ಗಡ್ಡಧಾರಿ ಪ್ರಯಾಣಿಕನಿಗೆ ಮೆಟ್ರೋದಲ್ಲಿ ಕೂರಲು ಸಾಕಷ್ಟು ಜಾಗವಿದ್ದರೂ ದೌಲತ್ತಿನಿಂದ ಸಹಪ್ರಯಾಣಿಕರಿಗೆ ತೊಂದರೆ ನೀಡಿದ್ದಾನೆ. ತನ್ನ ಒಂದು ಕಾಲನ್ನು ಪಕ್ಕದ ಸೀಟಿನ ಮೇಲೆ ಚಾಚಿ, ಪಾದಗಳನ್ನು ಸೀಟಿನ ಮೇಲಿಟ್ಟು ಇತರರು ಅಲ್ಲಿ ಕೂರಲು ಜಾಗವಿಲ್ಲದಂತೆ ಪರಿಣಾಮಕಾರಿಯಾಗಿ ಎರಡು ಆಸನಗಳನ್ನು ಲಾಕ್ ಮಾಡಿಕೊಂಡು ರೌಡಿಸಂ ತೋರಿದ್ದಾನೆ.
ರೈಲಿನಲ್ಲಿ ಜನ ಜಂಗುಳಿ ಇದ್ದರೂ ಈತನ ಈ ಅಸಭ್ಯ ಮತ್ತು ಅನಾಗರಿಕ ನಡವಳಿಕೆಯನ್ನು ಗಮನಿಸಿದ ಪಕ್ಕದಲ್ಲೇ ಇದ್ದ ಯುವಕನೊಬ್ಬ ತಕ್ಷಣವೇ ಆತನನ್ನು ತರಾಟೆಗೆ ತೆಗೆದುಕೊಂಡಿದ್ದಾನೆ. ಸಾರ್, ಇದು ಸಾರ್ವಜನಿಕ ಸಾರಿಗೆ, ಬೇರೆಯವರಿಗೂ ತೊಂದರೆ ಆಗುತ್ತೆ, ಮೊದಲು ಸೀಟಿನಿಂದ ಪಾದಗಳನ್ನು ಕೆಳಗೆ ಇಳಿಸಿ ಎಲ್ಲರಂತೆ ಶಿಸ್ತಿನಿಂದ ಕೂತ್ಕೊಳ್ಳಿ ಎಂದು ಮನವಿ ಮಾಡಿದ್ದಾನೆ. ಆದರೆ, ಆ ಗಡ್ಡಧಾರಿ ಮಾತ್ರ ತನ್ನ ತಪ್ಪು ಒಪ್ಪಿಕೊಳ್ಳುವ ಬದಲು ಅಹಂಕಾರದಿಂದ, ನಾನು ಸುಮ್ಮನೆ ಕೂತಿದ್ದೀನಿ, ಇದ್ರಿಂದ ನಿಮಗೇನು ತೊಂದರೆ? ಅಂತ ಉಲ್ಟಾ ಜಗಳಕ್ಕೆ ನಿಂತು ತನ್ನ ಸೊಕ್ಕಿನ ವರ್ತನೆಯನ್ನು ಸಮರ್ಥಿಸಿಕೊಂಡಿದ್ದಾನೆ.
ಗಲಾಟೆ ಜೋರಾಗುತ್ತಿದ್ದಂತೆ ಮೆಟ್ರೋ ಕೋಚ್ನಲ್ಲಿದ್ದ ಇನ್ನುಳಿದ ಸಹಪ್ರಯಾಣಿಕರು ಆತನ ಸುತ್ತುವರಿದು ತೀವ್ರ ಆಕ್ಷೇಪ ವ್ಯಕ್ತಪಡಿಸಿ ಕ್ಲಾಸ್ ತಗೊಂಡಿದ್ದಾರೆ. ಆದರೆ ಯಾರೇ ಹೇಳಿದರು ಕ್ಯಾರೇ ಎನ್ನದ ಈ ಅಸಂವೇದನಾಶೀಲ ವ್ಯಕ್ತಿ, ಎಲ್ಲರ ವಿರುದ್ಧವೂ ಆಕ್ರೋಶದ ಮಾತುಗಳನ್ನಾಡುತ್ತಾ ಉದ್ಧಟತನ ಪ್ರದರ್ಶಿಸಿದ್ದಾನೆ. ಸ್ಥಳೀಯ ಪತ್ರಕರ್ತೆ ರೇವತಿ ಮತ್ತು ಇತರರು ಈತನ ಫೋಟೋ ಹಾಗೂ ವಿಡಿಯೋವನ್ನು ತಮ್ಮ ಅಧಿಕೃತ ಸಾಮಾಜಿಕ ಜಾಲತಾಣದ ಹ್ಯಾಂಡಲ್ಗಳಲ್ಲಿ ಶೇರ್ ಮಾಡುತ್ತಿದ್ದಂತೆಯೇ ಇಡೀ ನೆಟ್ವರ್ಕ್ನಲ್ಲಿ ಈತನ ವಿರುದ್ಧ ಭಾರಿ ಆಕ್ರೋಶದ ಬಿರುಗಾಳಿಯೇ ಎದ್ದಿದೆ.\
ಸಾಮಾಜಿಕ ಮಾಧ್ಯಮಗಳಲ್ಲಿ ನೆಟ್ಟಿಗರು ಈತನ ಅನಾಗರಿಕ ನಡವಳಿಕೆಯನ್ನು ಕಟುವಾಗಿ ಟೀಕಿಸುತ್ತಿದ್ದಾರೆ. ಇಂತಹ ವ್ಯಕ್ತಿಗಳಿಗೆ ಸಾರ್ವಜನಿಕ ಸ್ಥಳಗಳಲ್ಲಿ ಹೇಗೆ ನಡೆದುಕೊಳ್ಳಬೇಕು ಎಂಬ ಕನಿಷ್ಠ ಶಿಕ್ಷಣವಾಗಲಿ, ಸಂಸ್ಕಾರವಾಗಲಿ ಇರುವುದಿಲ್ಲ. ಮೆಟ್ರೋದಂತಹ ಸಾರ್ವಜನಿಕ ಆಸ್ತಿಯಲ್ಲಿ ಶಿಷ್ಟಾಚಾರ ಅತ್ಯಗತ್ಯ. ಆಸನಗಳ ಮೇಲೆ ಪಾದಗಳನ್ನು ಇಟ್ಟು ಇತರ ಪ್ರಯಾಣಿಕರನ್ನು ನಿರ್ಲಕ್ಷಿಸುವುದು ಅತ್ಯಂತ ಬೇಜವಾಬ್ದಾರಿತನ ಎಂದು ನೆಟ್ಟಿಗರು ಕಾಮೆಂಟ್ ಬಾಕ್ಸ್ನಲ್ಲಿ ಕಿಡಿ ಕಾರುತ್ತಿದ್ದಾರೆ.
ಇನ್ನು ಕೆಲವರಂತೂ, ಇಂತಹ ಅಶಿಸ್ತಿನ ಮತ್ತು ಸೊಕ್ಕಿನ ವ್ಯಕ್ತಿಗಳಿಂದಲೇ ನಿತ್ಯ ಓಡಾಡುವ ಪ್ರಾಮಾಣಿಕ ಮೆಟ್ರೋ ಪ್ರಯಾಣಿಕರು ನೆಮ್ಮದಿಯಾಗಿ ಪ್ರಯಾಣ ಮಾಡಲು ಸಾಧ್ಯವಾಗುತ್ತಿಲ್ಲ. ಇಂತಹವರಿಂದಲೇ ಇಡೀ ಭಾರತಕ್ಕೆ ಕೆಟ್ಟ ಹೆಸರು ಬರುತ್ತದೆ. ಈತನಿಗೆ ಇನ್ಮುಂದೆ ಮೆಟ್ರೋದಲ್ಲಿ ಪ್ರಯಾಣ ಮಾಡದಂತೆ ಶಾಶ್ವತವಾಗಿ ನಿಷೇಧ ಹೇರಬೇಕು ಎಂದು ಹೈದರಾಬಾದ್ ಮೆಟ್ರೋ ನಿಗಮದ (HMRL) ಅಧಿಕಾರಿಗಳನ್ನು ಟ್ಯಾಗ್ ಮಾಡಿ ಕಠಿಣ ಕ್ರಮ ಮತ್ತು ಭಾರಿ ದಂಡ ವಿಧಿಸುವಂತೆ ಭೀಕರವಾಗಿ ಒತ್ತಾಯಿಸುತ್ತಿದ್ದಾರೆ.
ನಿಜ ಹೇಳಬೇಕೆಂದರೆ ಸಾರ್ವಜನಿಕ ಸ್ಥಳಗಳಲ್ಲಿ ಸ್ವಚ್ಛತೆ ಕಾಪಾಡದೆ, ಬಳಸಿದ ಕಪ್ ಮತ್ತು ತಿಂಡಿ ಪ್ಯಾಕೆಟ್ಗಳನ್ನು ಎಲ್ಲೆಂದರಲ್ಲಿ ಎಸೆಯುವ, ಸೀಟುಗಳ ಮೇಲೆ ಕಾಲಿಟ್ಟು ಕುಳಿತುಕೊಳ್ಳುವ ಇಂತಹ ಅಶಿಸ್ತಿನ ಘಟನೆಗಳು ಮೆಟ್ರೋದಲ್ಲಿ ದಿನನಿತ್ಯದ ಕತೆಯಾಗುತ್ತಿವೆ. ಹೈದರಾಬಾದ್ ಮೆಟ್ರೋ ಅಧಿಕಾರಿಗಳು ಇಂತಹ ಉದ್ಧಟತನ ತೋರುವ ಖದೀಮರ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸದೇ ಇದ್ದರೆ, ಸಾರ್ವಜನಿಕ ಸಾರಿಗೆಯಲ್ಲಿ ಸಾಮಾನ್ಯ ಜನರ ಸುರಕ್ಷತೆ ಮತ್ತು ನೆಮ್ಮದಿಗೆ ಭಂಗ ಬರುವುದಂತೂ ಗ್ಯಾರಂಟಿ.
