ಮೈಸೂರು : ಅರಮನೆ ನಗರಿ ಮೈಸೂರಿನಲ್ಲಿ ಕಳೆದ ಏಳು ವರ್ಷಗಳಿಂದ ಕುಟುಂಬವೊಂದು ಸಾರ್ವಜನಿಕ ಶೌಚಾಲಯದಲ್ಲೇ ವಾಸವಾಗಿರುವುದು ತಡವಾಗಿ ಬೆಳಕಿಗೆ ಬಂದಿದೆ.
ಮೈಸೂರು ನಗರವನ್ನು ಸ್ವಚ್ಛನಗರಿ, ಗುಡಿಸಲು ಮುಕ್ತ ನಗರವಾಗಿಸಲು ಕಳೆದ 10 ವರ್ಷಗಳಿಂದ ಕೋಟ್ಯಂತರ ರೂ ಖರ್ಚು ಮಾಡಲಾಗಿದ್ದರೂ ರಾಜೇಂದ್ರ ನಗರದ ಬಳಿಯ ಕುರಿಮಂಡಿ ಎ ಬ್ಲಾಕಲ್ಲಿ 13 ಮಂದಿ ಸಾರ್ವಜನಿಕ ಶೌಚಾಲಯದಲ್ಲಿಯೇ ವಾಸವಾಗಿದ್ದಾರೆ. ಈ ಬಗ್ಗೆ ಮಹಾನಗರ ಪಾಲಿಕೆ ಇಲ್ಲಿಯವರೆಗೆ ಗಮನಹರಿಸಿರಲಿಲ್ಲ.
ಈ ಕುಟುಂಬದ ಮಹಿಳೆ ಬೇಬಿ, ಅನೇಕರು ಸಮಸ್ಯೆ ಕೇಳಿಕೊಂಡು ಹೋಗ್ತಾರೆ. ನಾವು 7 ವರ್ಷದಿಂದ ಇದೇ ಶೌಚಾಲಯಲ್ಲಿ ವಾಸವಾಗಿದ್ದೇವೆ. ಆದರೆ ಯಾರು ಕಷ್ಟ ಬಗೆಹರಿಸಿಲ್ಲ. ನಮಗೆ ವಾಸಿಸಲು ಬದಲಿ ವ್ಯವಸ್ಥೆ ಮಾಡಿಕೊಡದಿದ್ದರೆ ಆತ್ಮಹತ್ಯೆಗೆ ಶರಣಾಗುತ್ತೇವೆ ಎಂದು ನೋವು ತೋಡಿಕೊಂಡಿದ್ದಾರೆ. ಈ ಬಗ್ಗೆ ಸುದ್ದಿ ಪ್ರಸಾರವಾಗುತ್ತಿದ್ದಂತೆ ಆಡಳಿತ ಎಚ್ಚೆತ್ತುಕೊಂಡಿದೆ ಎಂದು ತಿಳಿದುಬಂದಿದೆ.
