ಇನ್ನು ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ (ಕೆಐಎ) ನಲ್ಲಿ ವಿಮಾನ ಹತ್ತುವರಿಗೆ ಅವರ ಮುಖವೇ ಬೋರ್ಡಿಂಗ್ ಪಾಸ್ ಆಗಲಿದ್ದು, ವಿಮಾನ ಏರುವವರು ಬೋರ್ಡಿಂಗ್ ಪಾಸ್ , ಪಾಸ್ ಪೋರ್ಟ್ ಅಥವಾ ಇತರೆ ವೈಯಕ್ತಿಕ ದಾಖಲೆಗಳನ್ನು ತೆಗೆದುಕೊಂಡು ಹೋಗುವ ಅವಶ್ಯಕತೆ ಇಲ್ಲ.
ಹೌದು, ಕೆಐಎನಲ್ಲಿ ಬಯೋ ಬಯೋಮೆಟ್ರಿಕ್ ತಂತ್ರಜ್ಞಾನ ಬಳಸಿಕೊಂಡು ಸ್ಕ್ಯಾನ್ ಮಾಡಲಾದ ನಿಮ್ಮ ಮುಖವನ್ನೇ ನಿಮ್ಮ ಬೋರ್ಡಿಂಗ್ ಪಾಸ್ ಆಗಿ ಮಾಡೋ ಯೋಜನೆ ಪರಿಚಯಿಸಲಾಗುತ್ತದೆ.
ತಡೆರಹಿತ ಸುಲಭ ಪ್ರಯಾಣಕ್ಕಾಗಿ ಈ ಯೋಜನೆ ರೂಪಿಸಲಾಗುತ್ತಿದೆ.
ಸ್ಪೈಸ್ ಜೆಟ್, ಜೆಟ್ ಏರ್ವೇಸ್ ಮತ್ತು ಏರ್ ಏಷ್ಯಾ ವಿಮಾನದ ದೇಶೀಯ ಪ್ರಯಾಣಿಕರು ಪ್ರಾರಂಭದಲ್ಲಿ ಇದರ ಪ್ರಯೋಜನ ಪಡೆಯುತ್ತಾರೆ.
ಬೆಂಗಳೂರು ಇಂಟರ್ ನ್ಯಾಷನಲ್ ಏರ್ಪೋರ್ಟ್ ಲಿಮಿಟೆಡ್ ನ ಸಿಇಒ ಹರಿ ಮರಾರ್ ಹಾಗು ಕೆಐಎಕಾರ್ಯನಿರ್ವಾಹಕ ಸಿಇಒ, ವಿಷನ್ ಬಾಕ್ಸ್ ನ ಸಿಇಒ ಮಿಗುಯೆಲ್ ಲಿಟ್ಮನ್ ನಡುವೆ ಗುರುವಾರ ಏರ್ಪಟ್ಟ ಒಪ್ಪಂದದಂತೆ ಎಲೆಕ್ಟ್ರಾನಿಕ್ ಐಡೆಂಟಿಟಿ ಸಿಸ್ಟಮ್ ಜಾರಿಗೆ ಬರಲಿದೆ. ಪೋರ್ಚುಗೀಸ್ ಪ್ರಧಾನಿ ಆಂಟೋನಿಯೋ ಕೋಸ್ಟಾ ಮತ್ತು ಪೋರ್ಚುಗಲ್ ನ ಭಾರತೀಯ ರಾಯಭಾರಿ ನಂದಿನಿ ಸಿಂಘಲಾ ಈ ಒಪ್ಪಂದಕ್ಕೆ ಸಹಿ ಹಾಕುವ ವೇಳೆ ಉಪಸ್ಥಿತರಿದ್ದರು.
“ಬೆಂಗಳೂರು ಅಂತರಾಷ್ಟ್ರೀಯ ವಿಮಾನ ನಿ;ಲ್ದಾಣವು ಕಾಗದ ರಹಿತ ವಿಮಾನ ಯಾನ ಸೇವೆ ಹೊಂದುವ ದೇಶದ ಮೊದಲ ನಿಲ್ದಾಣವಾಗಲಿದೆ” ಪ್ರಕಟಣೆಯಲ್ಲಿ ತಿಳಿಸಿದೆ.
