ಪ್ರತಿದಿನ ಬೆಳಗ್ಗೆ 10 ನಿಮಿಷ ಓಂಕಾರ ಧ್ಯಾನ ಮಾಡಿದರೆ ಏನೆಲ್ಲಾ ಪ್ರಯೋಜನ ಗೊತ್ತೇ? ಒತ್ತಡದಿಂದ ಉತ್ತಮ ನಿದ್ರೆಯವರೆಗೆ!
ಇಂದಿನ ಒತ್ತಡದ ಜೀವನಶೈಲಿಯಲ್ಲಿ ಬೆಳಗ್ಗೆ ಎದ್ದ ತಕ್ಷಣವೇ ಕೆಲಸ, ಕುಟುಂಬ ಹಾಗೂ ದಿನದ ಜವಾಬ್ದಾರಿಗಳ ಬಗ್ಗೆ ಯೋಚಿಸುವುದು ಸಾಮಾನ್ಯವಾಗಿದೆ. ಕೆಲವರು ಕಣ್ಣು ತೆರೆದ ಕೂಡಲೇ ಮೊಬೈಲ್ ಕೈಗೆತ್ತಿಕೊಂಡು ಸಾಮಾಜಿಕ ಜಾಲತಾಣಗಳು, ಸಂದೇಶಗಳು ಹಾಗೂ ಇಂಟರ್ನೆಟ್ ನೋಡುವ ಅಭ್ಯಾಸ ಬೆಳೆಸಿಕೊಂಡಿದ್ದಾರೆ. ಇಂತಹ ಅಭ್ಯಾಸಗಳು ದಿನದ ಆರಂಭದಲ್ಲೇ ಮನಸ್ಸಿನ ಮೇಲೆ ಒತ್ತಡವನ್ನು ಹೆಚ್ಚಿಸಬಹುದು.
ಹೀಗಾಗಿ ಬೆಳಗ್ಗೆ ಎದ್ದ ತಕ್ಷಣ ಮೊಬೈಲ್ ನೋಡುವ ಬದಲು ಕೆಲ ನಿಮಿಷಗಳನ್ನು ಧ್ಯಾನಕ್ಕೆ ಮೀಸಲಿಡುವುದು ಉತ್ತಮ ಅಭ್ಯಾಸವಾಗಬಹುದು. ಅದರಲ್ಲೂ ಶಾಂತವಾದ ಸ್ಥಳದಲ್ಲಿ ಕುಳಿತು ‘ಓಂ’ ಮಂತ್ರವನ್ನು ಪಠಿಸುತ್ತಾ ಧ್ಯಾನ ಮಾಡುವ ಅಭ್ಯಾಸ ಮನಸ್ಸನ್ನು ಶಾಂತಗೊಳಿಸಲು ಸಹಾಯ ಮಾಡುತ್ತದೆ. ಪ್ರತಿದಿನ 10 ನಿಮಿಷಗಳ ಕಾಲ ಓಂಕಾರ ಧ್ಯಾನ ಮಾಡುವುದರಿಂದ ಒತ್ತಡ ನಿಯಂತ್ರಣ, ಏಕಾಗ್ರತೆ ಹಾಗೂ ನಿದ್ರೆಯ ಗುಣಮಟ್ಟ ಸೇರಿದಂತೆ ಹಲವು ವಿಚಾರಗಳಲ್ಲಿ ಪ್ರಯೋಜನ ಸಿಗಬಹುದು.
ಒತ್ತಡ ಮತ್ತು ಆತಂಕ ಕಡಿಮೆ ಮಾಡಲು ಸಹಕಾರಿ
ಇಂದಿನ ಜೀವನಶೈಲಿಯಲ್ಲಿ ಒತ್ತಡ ಮತ್ತು ಆತಂಕ ಬಹುತೇಕ ಎಲ್ಲರನ್ನೂ ಕಾಡುತ್ತಿದೆ. ಇಂತಹ ಸಂದರ್ಭದಲ್ಲಿ ಪ್ರತಿದಿನ ಕೆಲವು ನಿಮಿಷಗಳ ಕಾಲ ಶಾಂತವಾಗಿ ಕುಳಿತು ಓಂ ಮಂತ್ರವನ್ನು ಪಠಿಸುವುದು ಮನಸ್ಸನ್ನು ನೆಮ್ಮದಿಗೊಳಿಸಲು ಸಹಾಯ ಮಾಡಬಹುದು.
ಓಂಕಾರ ಜಪದ ಸಂದರ್ಭದಲ್ಲಿ ನಿಧಾನವಾಗಿ ಉಸಿರಾಡುವುದು ಮತ್ತು ಉಸಿರನ್ನು ನಿಯಂತ್ರಿಸುವುದರಿಂದ ದೇಹ ಹಾಗೂ ಮನಸ್ಸು ವಿಶ್ರಾಂತಿಯ ಸ್ಥಿತಿಗೆ ಬರಲು ನೆರವಾಗುತ್ತದೆ. ನಿಯಮಿತ ಧ್ಯಾನ ಮತ್ತು ಉಸಿರಾಟದ ಅಭ್ಯಾಸಗಳು ಒತ್ತಡವನ್ನು ನಿರ್ವಹಿಸಲು ಸಹಾಯಕವಾಗಬಹುದು.
ಶ್ವಾಸಕೋಶ ಮತ್ತು ಉಸಿರಾಟಕ್ಕೆ ಪ್ರಯೋಜನಕಾರಿ
ಓಂ ಮಂತ್ರವನ್ನು ಪಠಿಸುವಾಗ ಸಾಮಾನ್ಯವಾಗಿ ಆಳವಾಗಿ ಉಸಿರನ್ನು ತೆಗೆದುಕೊಂಡು, ನಿಧಾನವಾಗಿ ಉಸಿರನ್ನು ಹೊರಬಿಡಲಾಗುತ್ತದೆ. ಹೀಗಾಗಿ ಇದು ಒಂದು ರೀತಿಯ ನಿಯಂತ್ರಿತ ಉಸಿರಾಟದ ಅಭ್ಯಾಸವಾಗುತ್ತದೆ.
ಮುಂಜಾನೆ ಶಾಂತ ವಾತಾವರಣದಲ್ಲಿ ಧ್ಯಾನ ಮಾಡುವುದರಿಂದ ಉಸಿರಾಟದ ಮೇಲೆ ಗಮನ ಕೇಂದ್ರೀಕರಿಸಲು ಸಾಧ್ಯವಾಗುತ್ತದೆ. ನಿಯಮಿತ ಉಸಿರಾಟದ ಅಭ್ಯಾಸವು ಉಸಿರಾಟದ ನಿಯಂತ್ರಣ ಮತ್ತು ವಿಶ್ರಾಂತಿಗೆ ಸಹಾಯ ಮಾಡಬಹುದು.
ಏಕಾಗ್ರತೆ ಮತ್ತು ಗಮನ ಹೆಚ್ಚಿಸಲು ಸಹಕಾರಿ
ಬೆಳಗ್ಗೆ ಓಂಕಾರ ಧ್ಯಾನ ಮಾಡುವುದರಿಂದ ಮನಸ್ಸನ್ನು ಒಂದೇ ವಿಷಯದ ಮೇಲೆ ಕೇಂದ್ರೀಕರಿಸುವ ಅಭ್ಯಾಸ ಬೆಳೆಸಿಕೊಳ್ಳಬಹುದು. ಓಂ ಮಂತ್ರದ ಧ್ವನಿಯ ಮೇಲೆ ಗಮನ ಹರಿಸುವುದರಿಂದ ಅನಗತ್ಯ ಆಲೋಚನೆಗಳಿಂದ ಮನಸ್ಸನ್ನು ದೂರವಿಟ್ಟು ಏಕಾಗ್ರತೆಯನ್ನು ಹೆಚ್ಚಿಸಿಕೊಳ್ಳಲು ಸಹಾಯವಾಗುತ್ತದೆ.
ವಿದ್ಯಾರ್ಥಿಗಳು, ಉದ್ಯೋಗಿಗಳು ಸೇರಿದಂತೆ ದಿನವಿಡೀ ಹೆಚ್ಚಿನ ಮಾನಸಿಕ ಏಕಾಗ್ರತೆ ಅಗತ್ಯವಿರುವವರಿಗೆ ಧ್ಯಾನದ ಅಭ್ಯಾಸ ಉಪಯುಕ್ತವಾಗಬಹುದು.
ಉತ್ತಮ ನಿದ್ರೆಗೆ ನೆರವಾಗಬಹುದು
ಕೆಲವರಿಗೆ ರಾತ್ರಿ ಮಲಗಿದರೂ ಮನಸ್ಸಿನಲ್ಲಿ ಹಲವು ಆಲೋಚನೆಗಳು ಓಡಾಡುತ್ತಿರುತ್ತವೆ. ಇದರಿಂದ ನಿದ್ರೆ ಬರಲು ವಿಳಂಬವಾಗಬಹುದು. ಇಂತಹ ಸಂದರ್ಭದಲ್ಲಿ ಮಲಗುವ ಮುನ್ನ ಕೆಲವು ನಿಮಿಷಗಳ ಕಾಲ ನಿಧಾನವಾಗಿ ಉಸಿರಾಡುತ್ತಾ ಓಂ ಮಂತ್ರವನ್ನು ಪಠಿಸುವುದು ಮನಸ್ಸನ್ನು ಶಾಂತಗೊಳಿಸಲು ಸಹಾಯ ಮಾಡಬಹುದು.
ನಿಯಮಿತ ಧ್ಯಾನದ ಅಭ್ಯಾಸವು ವಿಶ್ರಾಂತಿಯ ಭಾವನೆಯನ್ನು ಹೆಚ್ಚಿಸಿ, ಉತ್ತಮ ನಿದ್ರೆಯ ಅಭ್ಯಾಸ ಬೆಳೆಸಿಕೊಳ್ಳಲು ನೆರವಾಗಬಹುದು.
ಓಂ ಮಂತ್ರವನ್ನು ಹೇಗೆ ಪಠಿಸಬೇಕು?
ಬೆಳಗಿನ ಸಮಯದಲ್ಲಿ ಶಾಂತವಾದ ಸ್ಥಳವನ್ನು ಆಯ್ಕೆ ಮಾಡಿಕೊಂಡು ಆರಾಮವಾಗಿ ಕುಳಿತುಕೊಳ್ಳಿ. ಪದ್ಮಾಸನ, ಅರ್ಧ ಪದ್ಮಾಸನ, ಸುಖಾಸನ ಅಥವಾ ನಿಮಗೆ ಆರಾಮದಾಯಕವಾದ ಯಾವುದೇ ಭಂಗಿಯಲ್ಲಿ ಕುಳಿತುಕೊಳ್ಳಬಹುದು.
ಕಣ್ಣುಗಳನ್ನು ಮುಚ್ಚಿ, ಕೆಲವು ಕ್ಷಣ ಸಾಮಾನ್ಯವಾಗಿ ಉಸಿರಾಡಿ. ನಂತರ ನಿಧಾನವಾಗಿ ಉಸಿರನ್ನು ತೆಗೆದುಕೊಂಡು, ಉಸಿರನ್ನು ಹೊರಬಿಡುವಾಗ ‘ಓಂ’ ಎಂದು ನಿಧಾನವಾಗಿ ಪಠಿಸಿ. ಆರಂಭದಲ್ಲಿ 5ರಿಂದ 10 ನಿಮಿಷಗಳ ಕಾಲ ಅಭ್ಯಾಸ ಮಾಡಬಹುದು. ನಂತರ ನಿಮ್ಮ ಅನುಕೂಲಕ್ಕೆ ಅನುಗುಣವಾಗಿ ಸಮಯವನ್ನು 10ರಿಂದ 15 ನಿಮಿಷಗಳವರೆಗೆ ಹೆಚ್ಚಿಸಿಕೊಳ್ಳಬಹುದು.
ಓಂ ಮಂತ್ರವನ್ನು ಜೋರಾಗಿ ಅಥವಾ ಮೃದುವಾಗಿ ಪಠಿಸಬಹುದು. ಜಪಮಾಲೆಯನ್ನು ಬಳಸಿಕೊಂಡು ಪಠಿಸುವವರೂ ಇದ್ದಾರೆ. ಧ್ಯಾನದ ಸಮಯದಲ್ಲಿ ನಿಮ್ಮ ಉಸಿರಾಟ ಮತ್ತು ಓಂ ಮಂತ್ರದ ಧ್ವನಿಯ ಮೇಲೆ ಮಾತ್ರ ಗಮನ ಕೇಂದ್ರೀಕರಿಸಲು ಪ್ರಯತ್ನಿಸಿ.
ಆರಂಭದಲ್ಲಿ ಮನಸ್ಸನ್ನು ಒಂದೇ ಕಡೆ ಕೇಂದ್ರೀಕರಿಸುವುದು ಕಷ್ಟವಾಗಬಹುದು. ಆದರೆ ನಿರಂತರ ಅಭ್ಯಾಸದಿಂದ ಧ್ಯಾನ ಮಾಡುವ ಅಭ್ಯಾಸ ಕ್ರಮೇಣ ಸುಲಭವಾಗುತ್ತದೆ.
