ಹಾವು ಅಂದ್ರೆ ಸಾಕು ಎದ್ನೋ-ಬಿದ್ನೋ ಎಂದು ಓಡುವ ಜನರೇ ಹೆಚ್ಚು. ಇನ್ನು ಮನೆಯೊಳಗೇ ಬುಸ್ ಬುಸ್ ಅಂದ್ರೆ ಹೇಗಾಗಬೇಡ?
ಇಲ್ಲೊಂದು ನಾಗರ ಹಾವು ಮನೆಯೊಂದರ ಟಾಯ್ಲೆಟ್ ರೂಮಿನಲ್ಲಿ ಸೇರಿಕೊಂಡು ಆ ಮನೆಯವರನ್ನೆಲ್ಲ ಬೆಚ್ಚಿಬೀಳಿಸಿದೆ.
ಕೊನೆಗೆ ಆ ಮನೆಯ ಮಹಿಳೆ ಆರತಿ ಬೆಳಗಿ ಪೂಜೆಯನ್ನೂ ಮಾಡಿದ್ದಾರೆ. ಇಂತಹ ಘಟನೆ ಶಿವಮೊಗ್ಗ ನಗರದ ಶಿವಪ್ಪನಾಯಕ ಬಡಾವಣೆಯ ಸಂಭವಿಸಿದೆ. ಮಂಗಳವಾರ ಬೆಳಗ್ಗೆ ಮನೆಯ ಒಡತಿ ಶಬರಿ ಎಂಬಾಕೆ ಟಾಯ್ಲೆಟ್ಗೆ ಹೋಗಲೆಂದು ಬಾಗಿಲು ತೆಗೆಯುತ್ತಿದ್ದಂತೆ ಟಾಯ್ಲೆಟ್ನ ಪಿಟ್ನಲ್ಲಿ ನಾಗರಹಾವು ಬುಸ್ ಅಂತ ಎಡೆ ಎತ್ತಿದೆ. ಹಾವನ್ನು ನೋಡುತ್ತಿದ್ದಂತೆ ಭಯದಿಂದ ಶಬರಿ ಹೊರ ಓಡಿದ್ದಾರೆ. ಸುಮಾರು 4 ಅಡಿ ಉದ್ದದ ನಾಗರಹಾವು ಟಾಯ್ಲೆಟ್ ಫಿಟ್ನ ನೀರಿನ ಪೈಪ್ನಲ್ಲಿ ಸಿಕ್ಕಿಹಾಕಿಕೊಂಡಿತ್ತು.
ಸುದ್ದಿ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ಬಂದ ಸ್ನೇಕ್ ಕಿರಣ್, ನಾಗರಹಾವನ್ನು ಸುರಕ್ಷಿತವಾಗಿ ಪಿಟ್ನಿಂದ ತೆಗೆದು ಹೊರಗೆ ತಂದರು. ಬಳಿಕ ಆ ಮನೆಯ ಒಡತಿ ನಾಗರಹಾವಿಗೆ ಮಂಗಳಾರತಿ ಬೆಳಗಿ ಪೂಜೆ ಸಲ್ಲಿಸಿದರು. ನಂತರ ಸ್ನೇಕ್ ಕಿರಣ್ ಅವರು ಹಾವನ್ನು ಸುರಕ್ಷಿತವಾಗಿ ಕಾಡಿಗೆ ಬಿಟ್ಟು ಬಂದರು.