ಹೀಗೆ ಆಡಿದ್ರೆ ಖಂಡಿತಾ ಕಪ್ ಯಾರದ್ದೋ..!

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಎಷ್ಟೇ ಕಳಪೆ ಪ್ರದರ್ಶನ ನೀಡಿದ್ರೂ ಅಭಿಮಾನಿಗಳು ಪ್ರೋತ್ಸಾಹಿಸುವುದನ್ನು ನಿಲ್ಲಿಸಲ್ಲ. ಸೋಲಲಿ, ಗೆಲ್ಲಲಿ ನಮ್ಮ ಟೀಮ್ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ. ಎದುರಾಳಿ ಎಷ್ಟೇ ಪ್ರಬಲವಾಗಿದ್ದರೂ ಆರ್​ಸಿಬಿ ಗೆಲ್ಲುತ್ತೆ ಎನ್ನುವುದು ಎಲ್ಲಾ ಅಭಿಮಾನಿಗಳ ನಿರೀಕ್ಷೆ.
ಒಂದು ಪಂದ್ಯ ಸೋತಾಗ ಬೇಸರದಿಂದ ನಾಲ್ಕು ಮಾತು ಬೈಯುವ ಅಭಿಮಾನಿಗಳು. ಮುಂದಿನ ಪಂದ್ಯದಲ್ಲಿ ಮತ್ತಷ್ಟೇ ಅದಕ್ಕಿಂತ ಹೆಚ್ಚಾಗಿ ಬೆಂಬಲ ನೀಡುತ್ತಾರೆ. ಕಳೆದ ಬಾರಿ ಈ ಸಲ ಕಪ್ ನಮ್ದೇ ಎನ್ನುವ ದೊಡ್ಡ ಅಭಿಯಾನವನ್ನು ಆರ್​ಸಿಬಿ ಫ್ಯಾನ್ಸ್ ನಡೆಸಿದ್ದರು. ಆದರೆ, ಆರ್​​ಸಿಬಿ ಕಳೆದ ವರ್ಷ ಕಳಪೆ ಪ್ರದರ್ಶನ ನೀಡಿ ಅಭಿಮಾನಿಗಳಿಗೆ ನಿರಾಸೆಯುಂಟು ಮಾಡಿತ್ತು. ಈ ಬಾರಿ ಮತ್ತೆ ತನ್ನ ಕಳಪೆ ಪ್ರದರ್ಶನವನ್ನೇ ಮುಂದುವರೆಸಿದೆ.
ಇಂದು ಬೆಂಗಳೂರಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ 4 ವಿಕೆಟ್​ ಗಳ ಸೋಲನುಭವಿಸಿತು. ಟಾಸ್​ ಗೆದ್ದ ಡೆಲ್ಲಿ ಕ್ಯಾಪ್ಟನ್ ಶ್ರೇಯಸ್ ಅಯ್ಯರ್, ವಿರಾಟ್​ ಕೊಹ್ಲಿ ನೇತೃತ್ವದ ಆರ್​ಸಿಬಿಗೆ ಮೊದಲು ಬ್ಯಾಟಿಂಗ್ ಮಾಡಲು ಬಿಟ್ಟು ಕೊಟ್ಟರು. ಮೊದಲು ಬ್ಯಾಟಿಂಗ್ ಮಾಡಿದ ಆರ್​ಸಿಬಿ 149ರನ್ ಮಾಡಿತು. ಬಳಿಕ ಬ್ಯಾಟಿಂಗ್ ಮಾಡಿದ ಡೆಲ್ಲಿ ನಿರಾಯಾಸವಾಗಿ ಗೆದ್ದು ಬೀಗಿತು. ಇದರಿಂದ ಆರ್​ಸಿಬಿ ಫ್ಯಾನ್ಸ್​ಗೆ ಬೇಸರವಾಗಿದೆ. ಆರ್​ಸಿಬಿ ಇನ್ನುಳಿದ ಎಲ್ಲಾ 8 ಪಂದ್ಯಗಳನ್ನೂ ಸಹ ಗೆಲ್ಲಲ್ಲೇ ಬೇಕಿದೆ. ಇಲ್ಲದಿದ್ದರೆ ಈ ಬಾರಿಯ ಕಪ್​ ಕನಸು ಕೂಡ ಭಗ್ನ..! ಹಿಂಗೇ ಆಡ್ತಾ ಇದ್ರೆ ಈ ಸಲ ಕಪ್ ಯಾರದ್ದೋ ಎಂದು ಬೇಜಾರಿಂದ ಮಾತಾಡಿಕೊಳ್ಳುತ್ತಿದ್ದಾರೆ ಅಭಿಮಾನಿಗಳು.