ಮೇ 26ರಂದು (ಬುಧವಾರ) ( ಇಂದು) ಸಂಪೂರ್ಣ ಚಂದ್ರ ಗ್ರಹಣ ಸಂಭವಿಸುತ್ತಿದೆ. ಆದರೆ ಇದು ಈಶಾನ್ಯ ಭಾರತ, ಪಶ್ಚಿಮ ಬಂಗಾಳದ ಕೆಲವು ಭಾಗಗಳು, ಒಡಿಶಾದ ಕರಾವಳಿ ಪ್ರದೇಶಗಳು ಮತ್ತು ಅಂಡಮಾನ್ ನಿಕೋಬಾರ್ ದ್ವೀಪಗಳಲ್ಲಿ ಮಾತ್ರ ಕೆಲವೇ ಸಮಯ ಗೋಚರಿಸಲಿದೆ.
ದಕ್ಷಿಣ ಅಮೆರಿಕ, ಉತ್ತರ ಅಮೆರಿಕ, ಏಷ್ಯಾ, ಆಸ್ಟ್ರೇಲಿಯಾ, ಅಂಟಾರ್ಟಿಕಾ, ಪೆಸಿಫಿಕ್ ಸಮುದ್ರ ಮತ್ತು ಹಿಂದೂ ಮಹಾಸಾಗರದ ವಿವಿಧ ಭಾಗಗಳಲ್ಲಿ ಚಂದ್ರಗ್ರಹಣ ಕಾಣಿಸಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ತಿಳಿಸಿದೆ.
ಮಧ್ಯಾಹ್ನ 3.15ಕ್ಕೆ ಚಂದ್ರಗ್ರಹಣದ ಭಾಗಶಃ ಹಂತ ಆರಂಭವಾಗಲಿದ್ದು, ಸಂಪೂರ್ಣ ಚಂದ್ರಗ್ರಹಣವು ಸಂಜೆ 4.39ಕ್ಕೆ ಸಂಭವಿಸಲಿದೆ. ಸಂಪೂರ್ಣ ಗ್ರಹಣದ ಹಂತವು ಸಂಜೆ 4.58ಕ್ಕೆ ಮುಕ್ತಾಯವಾಗಲಿದ್ದು, ಭಾಗಶಃ ಗ್ರಹಣ ಸಂಜೆ 6.23ಕ್ಕೆ ಅಂತ್ಯಗೊಳ್ಳಲಿದೆ.
ಭಾರತದ ಕೆಲವೇ ಭಾಗಗಳಲ್ಲಿ ಚಂದ್ರಗ್ರಹಣ ಗೋಚರಿಸಲಿದ್ದರೂ, ಆ ಭಾಗಗಳಲ್ಲಿನ ಜನರಿಗೂ ಗ್ರಹಣ ವೀಕ್ಷಣೆ ಸಾಧ್ಯವಾಗಲಾರದು. ಏಕೆಂದರೆ ಒಡಿಶಾ ಹಾಗೂ ಪಶ್ಚಿಮ ಬಂಗಾಳಗಳಲ್ಲಿ ಚಂಡಮಾರುತದ ಅಬ್ಬರ ಶುರುವಾಗಿದ್ದು, ಸೂರ್ಯ ಹಾಗೂ ಚಂದ್ರನ ದರ್ಶನವೇ ಅಸಾಧ್ಯವಾಗಿದೆ.
ಭಾರತದಲ್ಲಿ ಮುಂದಿನ ಚಂದ್ರಗ್ರಹಣ ಗೋಚರವಾಗುವುದು ನವೆಂಬರ್ 19ರಂದು. ಇದು ಭಾಗಶಃ ಚಂದ್ರಗ್ರಹಣವಾಗಿರಲಿದೆ. ಈ ಚಂದ್ರಗ್ರಹಣ ಕೂಡ ಕೆಲವೇ ನಿಮಿಷಗಳ ಕಾಲ, ಈಶಾನ್ಯ ಭಾರತದಲ್ಲಿ ಕಾಣಿಸಲಿದೆ.
ಇದು ಸೂಪರ್ ಮೂನ್, ಅಂದರೆ ಚಂದ್ರ ಗ್ರಹಣದ ಜತೆಗೆ ಕೆಂಪು ರಕ್ತ ಚಂದ್ರ ಕೂಡ ಒಮ್ಮೆಲೆ ಉಂಟಾಗುವುದರಿಂದ ಇದು ಬಹು ಅಪರೂಪದ ಚಂದ್ರಗ್ರಹಣ ಎನಿಸಿದೆ.
