ಕನ್ನಡ ಚಿತ್ರರಂಗದ ‘ಅಭಿನಯ ಚಕ್ರವರ್ತಿ’ ಕಿಚ್ಚ ಸುದೀಪ್ ಕೇವಲ ಬೆಳ್ಳಿಪರದೆಗೆ ಸೀಮಿತವಾದವರಲ್ಲ. ಸಿನಿಮಾದಾಚೆ ಸುದೀಪ್ ಅದ್ಭುತ ಕ್ರೀಡಾಪಟು ಮತ್ತು ಕ್ರೀಡಾಪ್ರೇಮಿ ಎನ್ನುವುದು ಇಡೀ ದೇಶಕ್ಕೇ ಗೊತ್ತಿರುವ ವಿಚಾರ. ಪ್ರತಿ ವರ್ಷವೂ ಕ್ರಿಕೆಟ್ ಅಂಗಳಕ್ಕೆ ಇಳಿದು ಬ್ಯಾಟ್ ಬೀಸುತ್ತಾ, ಕ್ರೀಡಾಭಿಮಾನಿಗಳನ್ನು ರಂಜಿಸುವ ಸುದೀಪ್ ಅವರಿಗೆ ಕ್ರೀಡೆಯ ಮೇಲೆ ವಿಶೇಷ ಒಲವು. ಹಾಗಂಥ ಕೇವಲ ಕ್ರಿಕೆಟ್ಗೆ ಇವರ ಈ ಪ್ರೀತಿ ಸೀಮಿತವಾಗಿಲ್ಲ. ಯಾವುದೇ ರಂಗದ ಕ್ರೀಡಾಪಟುವಾಗಲಿ, ಅವರು ದೇಶಕ್ಕೆ ಕೀರ್ತಿ ತಂದರೆ ಸುದೀಪ್ ಮುಕ್ತಕಂಠದಿಂದ ಶ್ಲಾಘಿಸುತ್ತಾರೆ.ಇದಕ್ಕೆ ಇನ್ನೊಂದು ಪುರಾವೆ ಎಂಬಂತೆ, ಭಾರತದ ಹೆಮ್ಮೆಯ ಬ್ಯಾಡ್ಮಿಂಟನ್ ತಾರೆ, ಒಲಿಂಪಿಕ್ ಪದಕ ವಿಜೇತೆ ಪಿ.ವಿ. ಸಿಂಧು ಅವರ ಐತಿಹಾಸಿಕ ಸಾಧನೆಗೆ ಕಿಚ್ಚ ಸುದೀಪ್ ಗೌರವ ಸಲ್ಲಿಸಿರುವ ರೀತಿ ಈಗ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಜಪಾನ್ ಅಂಗಳದಲ್ಲಿ ಪಿ.ವಿ. ಸಿಂಧು ಬರೆದ ಐತಿಹಾಸಿಕ ದಾಖಲೆ
ಇತ್ತೀಚೆಗಷ್ಟೇ ನಡೆದ ‘ಜಪಾನ್ ಓಪನ್ ಸೂಪರ್ 750’ ಟೂರ್ನಿಯಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಪಿ.ವಿ. ಸಿಂಧು, ಈ ಪ್ರತಿಷ್ಠಿತ ಟೂರ್ನಿ ಗೆದ್ದ ಮೊಟ್ಟಮೊದಲ ಭಾರತೀಯ ಆಟಗಾರ್ತಿ ಎಂಬ ಐತಿಹಾಸಿಕ ದಾಖಲೆ ಬರೆದು ದೇಶದ ಪತಾಕೆಯನ್ನು ವಿದೇಶಿ ನೆಲದಲ್ಲಿ ಹಾರಿಸಿದ್ದರು.ವಿಶೇಷವೆಂದರೆ, ದೇಶಕ್ಕೆ ಇಷ್ಟೊಂದು ದೊಡ್ಡ ಕೀರ್ತಿ ತಂದುಕೊಟ್ಟ ಸಿಂಧು ಅವರ ಈ ಸಾಧನೆಯನ್ನು ಹಲವರು ಸೂಕ್ತವಾಗಿ ಗಮನಿಸದೇ ಹೋದಾಗ, ಕಿಚ್ಚ ಸುದೀಪ್ ಮಾತ್ರ ಸೈಲೆಂಟ್ ಆಗಿ ನಿಂತು ಅವರ ಶ್ರಮವನ್ನು ಗುರುತಿಸಿದ್ದಾರೆ. ಕೇವಲ ಟ್ವಿಟರ್ ಅಥವಾ ಇನ್ಸ್ಟಾಗ್ರಾಮ್ನಲ್ಲಿ ಶುಭಾಶಯದ ಪೋಸ್ಟ್ ಹಾಕಿ ಸುಮ್ಮನಾಗದ ಸುದೀಪ್ , ಸಿಂಧು ಅವರ ಸಾಧನೆಗೆ ತಮ್ಮದೇ ಶೈಲಿಯಲ್ಲಿ ಸಲಾಂ ಹೊಡೆದಿದ್ದಾರೆ.
ನೀವು ನಮಗೆಲ್ಲ ಪ್ರೇರಣೆ: ಸುದೀಪ್ ಮನದಾಳ
ಜಪಾನ್ನಲ್ಲಿ ಮಹತ್ತರ ಗೆಲುವು ಸಾಧಿಸಿದ ಸಿಂಧು ಅವರಿಗೆ ಸುದೀಪ್ ಕಡೆಯಿಂದ ಒಂದು ‘ವಿಶೇಷ ಸರ್ಪ್ರೈಸ್’ ತಲುಪಿದೆ. ಅದ್ಧೂರಿಯಾದ ಗಿಫ್ಟ್ ಹ್ಯಾಂಪರ್ ಜೊತೆಗೆ, ಸ್ವತಃ ಕಿಚ್ಚ ಸುದೀಪ್ ತಮ್ಮದೇ ಕೈಬರಹದಲ್ಲಿ ಬರೆದ ಪ್ರೀತಿಯ ಅಭಿನಂದನಾ ಪತ್ರವೊಂದನ್ನು ಕಳುಹಿಸಿಕೊಟ್ಟಿದ್ದಾರೆ. ಈ ಪತ್ರದಲ್ಲಿ ಪ್ರತಿಯೊಬ್ಬ ಕನ್ನಡಿಗನ ಪರವಾಗಿ ಸಿಂಧು ಅವರಿಗೆ ಧನ್ಯವಾದ ಅರ್ಪಿಸಿರುವ ಸುದೀಪ್, ಕ್ರೀಡಾಲೋಕದಲ್ಲಿ ಅವರು ತೋರುತ್ತಿರುವ ನಿರಂತರ ಶ್ರಮವನ್ನು ಮನಸಾರೆ ಹೊಗಳಿದ್ದಾರೆ.
ಜಪಾನ್ ಓಪನ್ನಲ್ಲಿ ದಾಖಲೆ ಮುರಿಯುವಂತಹ ಅದ್ಭುತ ಗೆಲುವು ಸಾಧಿಸಿದ್ದಕ್ಕಾಗಿ ನಿಮಗೆ ಹೃದಯಪೂರ್ವಕ ಅಭಿನಂದನೆಗಳು. ನಮ್ಮ ಪ್ರೀತಿಯ ಭಾರತವನ್ನು ಮತ್ತೊಮ್ಮೆ ವಿಶ್ವ ಭೂಪಟದಲ್ಲಿ ಉನ್ನತ ಮಟ್ಟದಲ್ಲಿ ಎತ್ತಿ ಹಿಡಿದಿದ್ದಕ್ಕಾಗಿ ಪ್ರತಿಯೊಬ್ಬ ಕನ್ನಡಿಗರ ಪರವಾಗಿ ನಿಮಗೆ ಧನ್ಯವಾದಗಳು. ನೀವು ಎಂದೆಂದಿಗೂ ನಮಗೆಲ್ಲ ದೊಡ್ಡ ಪ್ರೇರಣೆ ಎಂದು ಕಿಚ್ಚ ಸುದೀಪ್ ಆ ಪತ್ರದಲ್ಲಿ ಬರೆದು ತಮ್ಮ ಗೌರವ ಸಲ್ಲಿಸಿದ್ದಾರೆ.
ಸುದೀಪ್ ಗಿಫ್ಟ್ ಕಂಡು ಭಾವುಕರಾದ ಬ್ಯಾಡ್ಮಿಂಟನ್ ತಾರೆ
ಅಭಿನಯ ಚಕ್ರವರ್ತಿಯಿಂದ ಬಂದ ಈ ಅನಿರೀಕ್ಷಿತ ಹಾಗೂ ಅಪರೂಪದ ಗೌರವವನ್ನು ಕಂಡು ಪಿ.ವಿ. ಸಿಂಧು ತೀವ್ರ ಭಾವುಕರಾಗಿದ್ದಾರೆ. ಸುದೀಪ್ ಕಳುಹಿಸಿದ ಸ್ಪೆಷಲ್ ಗಿಫ್ಟ್ ಹ್ಯಾಂಪರ್ ಹಾಗೂ ಕೈಬರಹದ ಲೇಖನಿಯನ್ನು ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಹಂಚಿಕೊಂಡಿರುವ ಸಿಂಧು, ಬಹಳ ಧನ್ಯವಾದಗಳು ಸುದೀಪ್ ಸರ್ (Thank you so much Sudeep sir) ಎಂದು ಬರೆದುಕೊಂಡು ತಮ್ಮ ಕೃತಜ್ಞತೆಯನ್ನು ಸಲ್ಲಿಸಿದ್ದಾರೆ.
ಕ್ರೀಡಾಪಟುಗಳ ಜೊತೆ ಅಪರೂಪದ ಬಾಂಧವ್ಯ ಹೊಂದಿರುವ ಅಭಿನಯ ಚಕ್ರವರ್ತಿ
ವಾಸ್ತವದಲ್ಲಿ, ಕ್ರೀಡಾರಂಗದ ಜೊತೆ ಸುದೀಪ್ ಅವರಿಗೆ ವರ್ಷಗಳ ನಿಕಟ ಬಾಂಧವ್ಯವಿದೆ. ಪ್ರಸ್ತುತ ಭಾರತೀಯ ಕ್ರಿಕೆಟ್ ತಂಡದಲ್ಲಿರುವ ಪ್ರಮುಖ ಆಟಗಾರರು, ಐಪಿಎಲ್ ಸ್ಟಾರ್ಗಳು, ಕರ್ನಾಟಕದ ರಣಜಿ ಆಟಗಾರರು ಮಾತ್ರವಲ್ಲದೆ, ಹಲವು ಅಂತಾರಾಷ್ಟ್ರೀಯ ಕ್ರೀಡಾಪಟುಗಳ ಜೊತೆಗೂ ಸುದೀಪ್ ಆತ್ಮೀಯ ಗೆಳೆತನ ಹೊಂದಿದ್ದಾರೆ. ಮೈದಾನದಲ್ಲಿ ಬೇರೆ ಬೇರೆ ಕ್ರೀಡೆಗಳನ್ನು ಆಡಿದರೂ, ಕ್ರೀಡಾಪಟುಗಳ ಕಷ್ಟ ಮತ್ತು ಶ್ರಮವನ್ನು ಅರ್ಥೈಸಿಕೊಳ್ಳುವ ಗುಣ ಸುದೀಪ್ ಅವರಿಗಿದೆ.
