ದೇಶದ ಲಕ್ಷಾಂತರ ವಿದ್ಯಾರ್ಥಿಗಳ ಭವಿಷ್ಯಕ್ಕೆ ಕೊಳ್ಳಿ ಇಟ್ಟ ‘ನೀಟ್’ (NEET) ಹಗರಣ ಹಾಗೂ ಶಾಂತಿಯುತವಾಗಿ ಪ್ರತಿಭಟಿಸುತ್ತಿದ್ದ ವಿದ್ಯಾರ್ಥಿಗಳ ಮೇಲೆ ಪೊಲೀಸರು ನಡೆಸಿದ ಲಾಠಿಚಾರ್ಜ್ಗೆ ದೆಹಲಿ ಬೀದಿಗಳು ಅಕ್ಷರಶಃ ಹೊತ್ತಿ ಉರಿದಿವೆ. ಇದರ ಕಾವು ನೇರವಾಗಿ ಪ್ರಧಾನಿ ನರೇಂದ್ರ ಮೋದಿ ಅವರ ನಿವಾಸದ ಹೊಸ್ತಿಲಿಗೆ ತಟ್ಟಿದೆ. ವಿದ್ಯಾರ್ಥಿಗಳ ಮೇಲಿನ ದೌರ್ಜನ್ಯ ಖಂಡಿಸಿ, ಲೋಕಸಭೆ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ನೇತೃತ್ವದಲ್ಲಿ ವಿಪಕ್ಷ ನಾಯಕರು ಮಂಗಳವಾರ ಪ್ರಧಾನಿ ನಿವಾಸಕ್ಕೆ ದಿಢೀರ್ ಮುತ್ತಿಗೆ ಹಾಕಿ ರಸ್ತೆಯಲ್ಲೇ ಬಿಡು ಬಿಟ್ಟಿದ್ದರು.
ಪ್ರಧಾನಿ ಮನೆ ಬಾಗಿಲಲ್ಲೇ ಅಹೋರಾತ್ರಿ ಧರಣಿ ; ಅಲುಗಾಡಿದ ದೆಹಲಿ ಗದ್ದುಗೆ
‘ನೀಟ್’ ಅಕ್ರಮದ ರೂವಾರಿ ಎನ್ನಲಾದ ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ತಕ್ಷಣ ರಾಜೀನಾಮೆ ನೀಡಲೇಬೇಕು ಎಂದು ಪಟ್ಟು ಹಿಡಿದ ವಿಪಕ್ಷಗಳು, ಪ್ರಧಾನಿ ನಿವಾಸ ‘7, ಲೋಕ ಕಲ್ಯಾಣ ಮಾರ್ಗ’ದ ಹೈ-ಸೆಕ್ಯುರಿಟಿ ಝೋನ್ನಲ್ಲೇ ನೆಲದ ಮೇಲೆ ಕುಳಿತು ಭಾರಿ ಪ್ರತಿಭಟನೆ ನಡೆಸಿದವು. ಯುವಕರ ಭವಿಷ್ಯ ಹಾಳುಮಾಡಿದ ಸರ್ಕಾರಕ್ಕೆ ದಿಕ್ಕಾರ ಎಂದು ಕಾಂಗ್ರೆಸ್ ಹಾಗೂ ವಿಪಕ್ಷಗಳ ನಾಯಕರು ಕೂಗಿದ ಘೋಷಣೆಗಳು ದೆಹಲಿಯ ರಾಜಕೀಯ ಗಲ್ಲಿಗಳಲ್ಲಿ ಕಂಪನ ಸೃಷ್ಟಿಸಿದವು.
ದೆಹಲಿ ಬೀದಿಯಲ್ಲಿ ‘ಇಂಡಿ’ ಒಕ್ಕೂಟದ ಪವರ್ ಶೋ ; ಒಗ್ಗಟ್ಟು ಪ್ರದರ್ಶಿಸಿದ ನಾಯಕರು
ಈ ಹೈ-ವೋಲ್ಟೇಜ್ ಪ್ರತಿಭಟನೆಗೆ ಕೇವಲ ಕಾಂಗ್ರೆಸ್ ಮಾತ್ರ ಸೀಮಿತವಾಗಿರಲಿಲ್ಲ. ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ, ಪ್ರಿಯಾಂಕಾ ಗಾಂಧಿ, ಸಮಾಜವಾದಿ ಪಕ್ಷದ ಬಾಸ್ ಅಖಿಲೇಶ್ ಯಾದವ್, ಕರ್ನಾಟಕದ ಸಿಎಂ ಡಿಕೆ ಶಿವಕುಮಾರ್ ಹಾಗೂ ಮಾಜಿ ಸಿಎಂ ಸಿದ್ದರಾಮಯ್ಯ ಸೇರಿದಂತೆ ‘ಇಂಡಿ’ ಒಕ್ಕೂಟದ ದಂಡೇ ಪ್ರಧಾನಿ ಮನೆ ಮುಂದೆ ಜಮಾಯಿಸಿತ್ತು. ರಸ್ತೆಯಲ್ಲೇ ಕುಳಿತು ಮೋದಿಗೆ ಸವಾಲ್ ಎಸೆದ ನಾಯಕರ ಪಡೆ, ಕೇಂದ್ರ ಸರ್ಕಾರದ ಎದೆಯಲ್ಲಿ ನಡುಕ ಹುಟ್ಟಿಸಿತು.
ಮೋದಿ-ಅಮಿತ್ ಶಾ ರಾಜೀನಾಮೆ ಕೊಡಿ ; ಗರ್ಜಿಸಿದ ರಾಹುಲ್ ಗಾಂಧಿ
ಧರಣಿ ಮಧ್ಯೆಯೇ ಕೇಂದ್ರ ಸರ್ಕಾರದ ವಿರುದ್ಧ ಆಕ್ರೋಶದ ಬೆಂಕಿ ಉಗುಳಿದ ರಾಹುಲ್ ಗಾಂಧಿ, ದೇಶದ ಭವಿಷ್ಯವಾಗಿರುವ ಅಮಾಯಕರ ಮೇಲೆ ಪೊಲೀಸರನ್ನು ಬಿಟ್ಟು ದೌರ್ಜನ್ಯ ಎಸಗಿದ್ದಕ್ಕೆ ಪ್ರಧಾನಿ ಮೋದಿ ಉತ್ತರಿಸಲೇಬೇಕು. ಕೋಟ್ಯಂತರ ವಿದ್ಯಾರ್ಥಿಗಳ ಲೈಫ್ ಜೊತೆ ಚೆಲ್ಲಾಟವಾಡುತ್ತಿರುವ ಪ್ರಧಾನಿ ಮೋದಿ, ಗೃಹ ಸಚಿವ ಅಮಿತ್ ಶಾ ಹಾಗೂ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ಬಳಿ ಅಧಿಕಾರದಲ್ಲಿರಲು ಯಾವುದೇ ಹಕ್ಕಿಲ್ಲ. ಇವರೆಲ್ಲರೂ ತಕ್ಷಣವೇ ತಮ್ಮ ಹುದ್ದೆಗಳಿಗೆ ರಾಜೀನಾಮೆ ಬಿಸಾಕಿ ತೊಲಗಬೇಕು ಎಂದು ನೇರವಾಗಿ ವಾಗ್ದಾಳಿ ನಡೆಸಿದರು.
‘ಎಕ್ಸ್’ನಲ್ಲಿ ಪೋಸ್ಟ್ ವಾರ್ ; ಪ್ರಧಾನಿ ಉತ್ತರಿಸಲೇಬೇಕೆಂದ ವಿಪಕ್ಷ ನಾಯಕ
ಪ್ರತಿಭಟನಾ ಅಖಾಡದಲ್ಲಿದ್ದುಕೊಂಡೇ ‘ಎಕ್ಸ್’ (X) ಖಾತೆಯಲ್ಲಿ ಖಾರವಾದ ಪೋಸ್ಟ್ ಹಾಕಿದ ರಾಹುಲ್ ಗಾಂಧಿ, ಸೋಮವಾರ ಸಂಸತ್ ಚಲೋ ನಡೆಸಿದ ಮುಗ್ಧ ವಿದ್ಯಾರ್ಥಿಗಳ ಮೇಲೆ ಪೊಲೀಸರು ಕ್ರೂರವಾಗಿ ಹಲ್ಲೆ ನಡೆಸಿದ್ದಾರೆ. ಈ ರೌಡಿಸಂಗೆ ಪ್ರಧಾನಿ ಮೋದಿ ಅವರಿಂದ ಸ್ಪಷ್ಟ ಉತ್ತರ ಕೇಳಲು ನಾವಿಲ್ಲಿಗೆ ಬಂದಿದ್ದೇವೆ. ದೇಶದ ಯುವಜನತೆಯನ್ನು ಬೀದಿಗೆ ತಳ್ಳಿದ ಈ ಕಮಿಷನ್ ಸರ್ಕಾರ ತಕ್ಷಣವೇ ತೊಲಗಬೇಕು ಎಂದು ದೇಶದ ಜನರ ಗಮನವನ್ನು ಸೆಳೆದರು.
ಜಾಗ ಖಾಲಿ ಮಾಡದ ನಾಯಕರು ; ರಂಗಕ್ಕಿಳಿದ ದೆಹಲಿ ಖಾಕಿ ಪಡೆ
ಅದು ದೇಶದ ಅತ್ಯಂತ ಹೈ-ಪ್ರೊಫೈಲ್ ಭದ್ರತಾ ವಲಯವಾಗಿದ್ದರಿಂದ, ಪ್ರತಿಭಟನೆ ಕೈಬಿಟ್ಟು ಜಾಗ ಖಾಲಿ ಮಾಡುವಂತೆ ದೆಹಲಿ ಪೊಲೀಸರು ಪದೇ ಪದೇ ಮನವಿ ಮಾಡಿದರು. ಆದರೆ ವಿದ್ಯಾರ್ಥಿಗಳಿಗೆ ನ್ಯಾಯ ಸಿಗುವವರೆಗೂ ಜಾಗದಿಂದ ಕದಲುವುದಿಲ್ಲ ಎಂದು ನಾಯಕರು ಭೀಷ್ಮ ಪ್ರತಿಜ್ಞೆ ಮಾಡಿದ್ದರು. ಕೊನೆಗೆ ಪರಿಸ್ಥಿತಿ ಕೈಮೀರುತ್ತಿದ್ದಂತೆ, ರಂಗಕ್ಕಿಳಿದ ಖಾಕಿ ಪಡೆ ವಿಪಕ್ಷ ನಾಯಕರನ್ನು ಬಲವಂತವಾಗಿ ತೆರವುಗೊಳಿಸಲು ರಣತಂತ್ರ ರೂಪಿಸಿತು.
ಕೈ-ಕಾಲು ಹಿಡಿದು ಎಳೆದೊಯ್ದ ಪೊಲೀಸರು ; ಸೋಶಿಯಲ್ ಮೀಡಿಯಾದಲ್ಲಿ ವಿಡಿಯೋ ವೈರಲ್!
ಪೊಲೀಸರ ಮನವಿಗೆ ಕಿವಿಕೊಡದೆ ಪ್ರತಿಭಟನಾ ಸ್ಥಳದಲ್ಲೇ ಪಟ್ಟು ಹಿಡಿದು ಕುಳಿತಾಗ, ಅಲ್ಲಿ ಅಕ್ಷರಶಃ ಭಾರೀ ಹೈಡ್ರಾಮಾವೇ ಸೃಷ್ಟಿಯಾಯಿತು. ದೆಹಲಿ ಪೊಲೀಸರು ರಾಹುಲ್ ಗಾಂಧಿ ಅವರ ಕೈ ಮತ್ತು ಕಾಲುಗಳನ್ನು ಹಿಡಿದು, ಬಲವಂತವಾಗಿ ಪ್ರತಿಭಟನಾ ಸ್ಥಳದಿಂದ ಎತ್ತಿಕೊಂಡು ಕರೆದೊಯ್ದಿದ್ದಾರೆ. ಪೊಲೀಸರು ರಾಹುಲ್ ಗಾಂಧಿ ಅವರನ್ನು ಈ ರೀತಿ ಬಲವಂತವಾಗಿ ಕರೆದೊಯ್ಯುತ್ತಿರುವ ದೃಶ್ಯಗಳು ಹಾಗೂ ವಿಡಿಯೋಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ದೇಶಾದ್ಯಂತ ಭಾರಿ ಚರ್ಚೆಗೆ ಗ್ರಾಸವಾಗಿವೆ.
ಪ್ರಿಯಾಂಕಾ, ಅಖಿಲೇಶ್ ಯಾದವ್ ಅರೆಸ್ಟ್
ರಾಹುಲ್ ಗಾಂಧಿ ಅವರ ಜೊತೆಗೆ ರಸ್ತೆಯಲ್ಲೇ ಧರಣಿ ಕುಳಿತಿದ್ದ ವಯನಾಡ್ ಸಂಸದೆ ಪ್ರಿಯಾಂಕಾ ಗಾಂಧಿ ಹಾಗೂ ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಸೇರಿದಂತೆ ಪ್ರಮುಖ ವಿಪಕ್ಷ ನಾಯಕರನ್ನೂ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ವಿದ್ಯಾರ್ಥಿಗಳ ಮೇಲಿನ ದೌರ್ಜನ್ಯ ಹಾಗೂ ಪ್ರಧಾನಿ ನಿವಾಸದ ಮುಂಭಾಗದಲ್ಲೇ ನಡೆದ ಈ ಬಲವಂತದ ಬಂಧನ, ಈಗ ಉರಿಯುವ ಬೆಂಕಿಗೆ ತುಪ್ಪ ಸುರಿದಂತಾಗಿದ್ದು, ಮೋದಿ ಸರ್ಕಾರದ ವಿರುದ್ಧ ವಿಪಕ್ಷಗಳ ಸಮರ ತೀವ್ರಗೊಳ್ಳುವ ಲಕ್ಷಣಗಳು ಎದ್ದು ಕಾಣುತ್ತಿವೆ.
ಮೋದಿ ಸರ್ಕಾರಕ್ಕೆ ‘ನೀಟ್’ ಕಂಟಕ ; ದೇಶಾದ್ಯಂತ ಕಾವೇರಿದ ರಾಜಕೀಯ ಸಮರ
ವಿದ್ಯಾರ್ಥಿಗಳ ಮೇಲಿನ ಹಲ್ಲೆ ಹಾಗೂ ಪ್ರಧಾನಿ ನಿವಾಸದ ಮುಂದೆ ರಾಹುಲ್ ಗಾಂಧಿ ಅವರ ಅರೆಸ್ಟ್, ಈಗ ಉರಿಯುವ ಬೆಂಕಿಗೆ ತುಪ್ಪ ಸುರಿದಂತಾಗಿದೆ. ದೇಶದಾದ್ಯಂತ ಮೋದಿ ಸರ್ಕಾರದ ವಿರುದ್ಧ ವಿದ್ಯಾರ್ಥಿ ಪಡೆ ಹಾಗೂ ವಿಪಕ್ಷಗಳು ಬೀದಿಗಿಳಿದು ಹೋರಾಟಕ್ಕೆ ಕರೆ ನೀಡಿವೆ. ರಾಷ್ಟ್ರ ರಾಜಧಾನಿಯಲ್ಲಿ ನಡೆದ ಈ ಬಲಪ್ರಯೋಗದ ಘಟನೆ, ಮುಂಬರುವ ದಿನಗಳಲ್ಲಿ ಕೇಂದ್ರ ಸರ್ಕಾರಕ್ಕೆ ಅತಿ ದೊಡ್ಡ ಕಂಟಕವಾಗುವುದರಲ್ಲಿ ಯಾವುದೇ ಅನುಮಾನವಿಲ್ಲ
