ರಾಜ್ಯದಲ್ಲಿ ದಿನನಿತ್ಯದ ಅಗತ್ಯ ವಸ್ತುಗಳ ಬೆಲೆ ಗಗನಕ್ಕೇರುತ್ತಿರೋದು ಬರೀ ಸಾರ್ವಜನಿಕರ ಜೇಬಿಗೆ ಮಾತ್ರವಲ್ಲ, ಬೇಕರಿ ಉದ್ಯಮಕ್ಕೂ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಕಚ್ಚಾ ವಸ್ತುಗಳ ಬೆಲೆ ನಿರಂತರವಾಗಿ ಹೆಚ್ಚುತ್ತಿರೋದ್ರಿಂದ ಬೇಕರಿ ಉದ್ಯಮಿಗಳು ವ್ಯಾಪಾರ ನಡೆಸುವುದು ಕಷ್ಟವಾಗಿ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಹಳೆ ದರದಲ್ಲೇ ಬೇಕರಿ ಐಟಂಗಳನ್ನು ಮಾರಾಟ ಮಾಡಿದರೆ ಲಾಭದ ಮಾತು ಹಾಗಿರಲಿ, ಅಸಲು ವೆಚ್ಚವೂ ಕೈಗೆ ಸಿಗದೆ ಬೇಕರಿ ಮಾಲೀಕರು ನಷ್ಟ ಅನುಭವಿಸುವ ಸ್ಥಿತಿ ನಿರ್ಮಾಣವಾಗಿದೆ.
ಕಚ್ಚಾ ವಸ್ತುಗಳ ಬೆಲೆ ಏರಿಕೆ, ಬೇಕರಿ ಮಾಲೀಕರು ಕಂಗಾಲು
ಕಳೆದ ಕೆಲವು ತಿಂಗಳುಗಳಿಂದ ಬೇಕರಿ ಉತ್ಪನ್ನಗಳಿಗೆ ಮುಖ್ಯವಾಗಿ ಬೇಕಾಗುವ ತುಪ್ಪ, ಬೆಣ್ಣೆ, ಹಾಲಿನ ಉತ್ಪನ್ನಗಳು, ಅಡುಗೆ ಎಣ್ಣೆ, ಮೈದಾ ಹಾಗೂ ಸಕ್ಕರೆ ಬೆಲೆ ಏರಿಕೆಯಾಗಿದೆ. ಇದರ ಜೊತೆಗೆ ಕರೆಂಟ್ ಬಿಲ್, ಕಮರ್ಷಿಯಲ್ ಗ್ಯಾಸ್ ಸಿಲಿಂಡರ್ ದರ, ಕೆಲಸಗಾರರ ಸಂಬಳ, ಟ್ರಾನ್ಸ್ಪೋರ್ಟ್ ವೆಚ್ಚ ಹಾಗೂ ಅಂಗಡಿಗಳ ಬಾಡಿಗೆ ಕೂಡ ಜಾಸ್ತಿಯಾಗಿದೆ. ಹೀಗಾಗಿ ದಿನನಿತ್ಯ ಅಂಗಡಿ ಬಾಗಿಲು ತೆಗೆದು ವ್ಯಾಪಾರ ಮಾಡುವುದೇ ಬೇಕರಿ ಮಾಲೀಕರಿಗೆ ಭಾರಿ ಸವಾಲಾಗಿ ಪರಿಣಮಿಸಿದೆ.
ತುಪ್ಪದ ಸ್ವೀಟ್ಸ್, ಪ್ರೀಮಿಯಂ ಕೇಕ್ಗಳಿಗೆ ದರದ ಬಿಸಿ
ವಿಶೇಷವಾಗಿ ಉತ್ತಮ ಗುಣಮಟ್ಟದ ತುಪ್ಪ ಬಳಸಿ ತಯಾರಿಸುವ ಮೈಸೂರು ಪಾಕ್, ತುಪ್ಪದ ಲಡ್ಡು, ಬಾದೂಷಾ, ಕಾಜು ಸ್ವೀಟ್ಸ್, ಡ್ರೈಫ್ರೂಟ್ ಐಟಂಗಳು ಹಾಗೂ ಪ್ರೀಮಿಯಂ ಕೇಕ್ಗಳ ಪ್ರೊಡಕ್ಷನ್ ಕಾಸ್ಟ್ ವಿಪರೀತ ಜಾಸ್ತಿಯಾಗಿದೆ. ಕ್ವಾಲಿಟಿ ವಿಷಯದಲ್ಲಿ ಯಾವುದೇ ಕಾಂಪ್ರಮೈಸ್ ಆಗದೆ ಒರಿಜಿನಲ್ ತುಪ್ಪ ಬಳಸುವ ಪ್ರಸಿದ್ಧ ಬೇಕರಿಗಳಿಗಂತೂ ಈ ವೆಚ್ಚ ಭರಿಸುವುದು ಸಾಕುಬೇಕಾಗಿದೆ. ಬಿಸಿನೆಸ್ನಲ್ಲಿ ಕ್ವಾಲಿಟಿ ಉಳಿಸಿಕೊಳ್ಳಬೇಕಂದರೆ ದರ ಹೆಚ್ಚು ಮಾಡುವುದು ಬಿಟ್ಟು ಬೇರೆ ದಾರಿಯೇ ಇಲ್ಲ ಎಂಬ ಸ್ಥಿತಿಗೆ ಬೇಕರಿ ಮಾಲೀಕರು ಬಂದಿದ್ದಾರೆ.
ಕೋವಿಡ್ ಚೇತರಿಕೆ ಬೆನ್ನಲ್ಲೇ ಉದ್ಯಮಕ್ಕೆ ಮತ್ತೊಂದು ದೊಡ್ಡ ಪೆಟ್ಟು
ಕೊರೊನಾ ಕಷ್ಟಕಾಲದ ನಂತರ ಈಗಷ್ಟೇ ಚೇತರಿಸಿಕೊಳ್ಳುತ್ತಿದ್ದ ಬೇಕರಿ ರಂಗಕ್ಕೆ ಈ ಬೆಲೆ ಏರಿಕೆ ಮತ್ತೊಂದು ದೊಡ್ಡ ಏಟು ನೀಡಿದೆ. ದಿಢೀರ್ ದರ ಹೆಚ್ಚಿಸಿದರೆ ದಿನನಿತ್ಯ ಬರುವ ರೆಗ್ಯುಲರ್ ಕಸ್ಟಮರ್ಗಳನ್ನು ಕಳೆದುಕೊಳ್ಳಬೇಕಾಗುತ್ತದೆ ಎಂಬ ಭಯದಿಂದ ಹಲವು ಬೇಕರಿ ಮಾಲೀಕರು ಇದುವರೆಗೆ ನಷ್ಟ ಸಹಿಸಿಕೊಂಡೇ ಹಳೆ ದರದಲ್ಲಿ ವ್ಯಾಪಾರ ನಡೆಸುತ್ತಿದ್ದಾರೆ. ಆದರೆ, ಈ ನಷ್ಟವನ್ನು ದಿನವೂ ಭರಿಸಲು ಸಾಧ್ಯವಾಗದೆ ಈಗ ದರ ಪರಿಷ್ಕರಣೆಗೆ ಸಜ್ಜಾಗುತ್ತಿದ್ದಾರೆ.
ಕರ್ನಾಟಕ ರಾಜ್ಯ ಬೇಕರಿ ಅಸೋಸಿಯೇಷನ್ ಶೀಘ್ರದಲ್ಲೇ ಮಹತ್ವದ ಸಭೆ
ಈ ಎಲ್ಲ ಸಮಸ್ಯೆಗೆ ಸೂಕ್ತ ಪರಿಹಾರ ಕಂಡುಕೊಳ್ಳಲು ಕರ್ನಾಟಕ ರಾಜ್ಯ ಬೇಕರಿ ಅಸೋಸಿಯೇಷನ್ ಈಗ ಅಖಾಡಕ್ಕಿಳಿದಿದೆ. ಶೀಘ್ರದಲ್ಲೇ ರಾಜ್ಯಮಟ್ಟದ ಪ್ರಮುಖ ಸಭೆಯೊಂದನ್ನು ಕರೆದು, ಎಲ್ಲಾ ಜಿಲ್ಲೆಗಳ ಬೇಕರಿ ಸಂಘಗಳ ಪ್ರತಿನಿಧಿಗಳು ಹಾಗೂ ಉದ್ಯಮಿಗಳ ಜೊತೆ ಮಾತುಕತೆ ನಡೆಸಲು ಪ್ಲಾನ್ ಮಾಡಲಾಗಿದೆ. ಈ ಸಭೆಯಲ್ಲಿ ಇಡೀ ರಾಜ್ಯಾದ್ಯಂತ ಬೇಕರಿ ಐಟಂಗಳ ದರ ಏರಿಕೆ ಮಾಡುವ ಕುರಿತು ಅಂತಿಮ ನಿರ್ಧಾರ ಹೊರಬೀಳುವ ಸಾಧ್ಯತೆ ದಟ್ಟವಾಗಿದೆ.
ಪ್ರತಿ ಐಟಂ ಮೇಲೆ 3 ರಿಂದ 5 ರೂಪಾಯಿ ಹೆಚ್ಚಳ ಸಾಧ್ಯತೆ!
ಪ್ರಾಥಮಿಕ ಮಾಹಿತಿಗಳ ಪ್ರಕಾರ, ಬೇಕರಿಯಲ್ಲಿ ಸಿಗುವ ಪ್ರತಿಯೊಂದು ಉತ್ಪನ್ನದ ಮೇಲೆಯೂ ಕನಿಷ್ಠ 3 ರೂಪಾಯಿಯಿಂದ 5 ರೂಪಾಯಿ ವರೆಗೆ ಬೆಲೆ ಹೆಚ್ಚಳವಾಗುವ ಸಾಧ್ಯತೆಯಿದೆ. ಸಾಮಾನ್ಯ ಬಿಸ್ಕೇಟ್, ಪಫ್ಸ್ನಿಂದ ಹಿಡಿದು ದಿನನಿತ್ಯದ ಬ್ರೆಡ್ಗಳ ಮೇಲೆಯೂ ಈ ಬೆಲೆ ಏರಿಕೆ ಜಾರಿಯಾಗುವ ಸೂಚನೆ ಸಿಕ್ಕಿದೆ.
ಸ್ವೀಟ್ಸ್ ಪ್ರಿಯರಿಗೆ ಶಾಕ್, ಸಾಮಾನ್ಯರ ಜೇಬಿಗೆ ಬೀಳಲಿದೆ ಕತ್ತರಿ!
ಇನ್ನು ಹೆಚ್ಚು ತುಪ್ಪ ಮತ್ತು ಒಣಹಣ್ಣುಗಳನ್ನು ಬಳಸಿ ತಯಾರಿಸುವ ಪ್ರೀಮಿಯಂ ಸ್ವೀಟ್ಸ್ ಹಾಗೂ ಸ್ಪೆಷಲ್ ಕೇಕ್ಗಳ ಬೆಲೆ ಇನ್ನಷ್ಟು ಹೆಚ್ಚಾಗಲಿದೆ. ಸಭೆಯ ನಂತರ ಅಧಿಕೃತವಾಗಿ ಹೊಸ ದರ ಜಾರಿಯಾದರೆ, ಟೀ ಜೊತೆ ಬಿಸ್ಕೇಟ್, ಪಫ್ಸ್ ತಿನ್ನುವ ಹಾಗೂ ವೀಕೆಂಡ್ನಲ್ಲಿ ಸ್ವೀಟ್ಸ್-ಕೇಕ್ ಖರೀದಿಸುವ ಸಾಮಾನ್ಯ ಗ್ರಾಹಕರ ಜೇಬಿಗೆ ಹೆಚ್ಚುವರಿ ಹೊರೆ ಬೀಳುವುದು ಗ್ಯಾರಂಟಿ.
