‘ರೌಡಿಫೆಲೋ’ ಆಗ್ತಿದ್ದಾರೆ ಆರ್ .ಜೆ ರೋಹಿತ್ ..! ಹೊಸ ಸಾಹಸಕ್ಕೆ ಕೈ ಹಾಕಿದ ‘ಬಕಾಸುರ’ ..!

ಆರ್ ಜೆ ರೋಹಿತ್ …ತಮ್ಮ ಖಡಕ್ ಧ್ವನಿಯಿಂದ ಜನಜನಿತರಾದವರು . ರೇಡಿಯೋ ಜಾಕಿಯಾಗಿ ಮನೆಮಾತಾದ ರಾಕ್ ಸ್ಟಾರ್ ರೋಹಿತ್ , ಬಿಗ್ ಬಾಸ್ ನಲ್ಲಿ ಸ್ಪರ್ಧಿಸಿ, ಬಳಿಕ ಸಿನಿಯಾನ ಶುರುಮಾಡಿದ್ರು. ನಟನಾಗಿ, ನಾಯಕ ನಟನಾಗಿ ಗುರುತಿಸಿಕೊಂಡ ಅವರು, ನಿರ್ಮಾಣದ ಹೊಣೆಯನ್ನೂ ನಿಭಾಯಿಸಿದ್ದಾರೆ. ಇದೀಗ ಸಿನಿಪಯಣದ ಹೊಸ ಸಾಹಸಕ್ಕೆ ಕೈ ಹಾಕುತ್ತಿದ್ದಾರೆ . ನಟನೆ, ‌ನಿರ್ಮಾಣದ ಜೊತೆಗೆ ಆ್ಯಕ್ಷನ್ ಕಟ್ ಹೇಳಲಿದ್ದಾರೆ ಆರ್ .ಜೆ ರೋಹಿತ್ .

ರೌಡಿ ಫೆಲೋ ಆದ ರೋಹಿತ್ ! : ಬಿಗ್ ಬಾಸ್ ಗೆ ಹೋಗಿಬಂದ ಬಳಿಕ ಬಾಂಬೆ ಮಿಠಾಯಿ ಅನ್ನೋ ಸಿನಿಮಾದಲ್ಲೊಂದು ಪುಟ್ಟ ಪಾತ್ರ ಮಾಡಿದ ರೋಹಿತ್ ನಂತರ 2016ರಲ್ಲಿ ತೆರೆಕಂಡ , ನವನೀತ್ ನಿರ್ದೇಶನದ ಕರ್ವ ಸಿನಿಮಾದಲ್ಲಿ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸಿದ್ರು. ಅದಾದ ನಂತರ ಕರ್ವ ಡೈರೆಕ್ಟರ್ ನವನೀತ್ ನಿರ್ದೇಶನದ ಬಕಾಸುರ ಸಿನಿಮಾದಲ್ಲಿ ನಾಯಕನಾಗಿ ನಟಿಸುವುದರ ಜೊತೆಗೆ ಚಿತ್ರ ನಿರ್ಮಾಣವನ್ನೂ ಮಾಡಿದರು . ಕರುನಾಡ ಚಕ್ರವರ್ತಿ ಶಿವರಾಜ್ ಕುಮಾರ್ ಅಭಿನಯದ ‘ರುಸ್ತುಂ’ನಲ್ಲಿ ಖಡಕ್ ಪೊಲೀಸ್ ಅಧಿಕಾರಿಯಾಗಿ ಸದ್ದು ಮಾಡಿದರು . ಹೀಗೆ ನಟನೆಯಲ್ಲಿ ಬ್ಯುಸಿ ಇರುವುದರ ಜೊತೆಗೆ ನಿರ್ಮಾಣದತ್ತವೂ ಮುಖಮಾಡಿರುವ ರೋಹಿತ್ ಇದೀಗ ನಿರ್ದೇಶನ ಮಾಡಲು ಹೊರಟಿದ್ದಾರೆ.

ರೌಡಿ ಫೆಲೋ ಎಂಬ ಸಿನಿಮಾಕ್ಕೆ ರೋಹಿತ್ ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ. ಈ ಸಿನಿಮಾಕ್ಕೆ ನಾಯಕಿಯಾಗಿ ವಿದ್ಯಾ ಪ್ರದೀಪ್ ಆಯ್ಕೆಯಾಗಿದ್ದಾರೆ. ತಾಯಿ – ಮಗನ ಸೆಂಟಿಮೆಂಟ್ , ಯುವಕನೊಬ್ಬನ ಕೋಪದಿಂದ ಸಂಭವಿಸುವ ಘಟನೆ ಚಿತ್ರದ ತಿರುಳಾಗಿದ್ದು, ತಾಯಿ ಪಾತ್ರದಲ್ಲಿ ಬಹುಭಾಷಾ ನಟಿ ಊರ್ವಶಿ ಅಭಿನಯಿಸಲಿದ್ದಾರೆ. ಬಹುಭಾಷಾ ನಟ ಪ್ರಕಾಶ್ ರಾಜ್ ಮುಖ್ಯಪಾತ್ರವೊಂದರಲ್ಲಿ ನಟಿಸುತ್ತಿದ್ದಾರೆ. ದಿಯಾ ಪ್ರೊಡ್ಯುಸರ್ ಕೃಷ್ಣ ಚೈತನ್ಯ ರೌಡಿಫೆಲೋಗೆ ಬಂಡವಾಳ ಹಾಕುತ್ತಿದ್ದಾರೆ.

ರಾಮಾ ರಾಮಾ ರೇ ಸಿನಿಮಾಟೋಗ್ರಾಫರ್ ಲವಿತ್ ಸಿನಿಮಾಟೋಗ್ರಫಿ ಹೊಣೆ ಹೊತ್ತಿದ್ದಾರೆ. ರವಿ ಬಸ್ರೂರ್ ಹಿನ್ನೆಲೆ ಸಂಗೀತವಿದೆ. ಹಾಡುಗಳಿಗೆ ನಕುಲ್ ಮ್ಯೂಸಿಕ್ ಕಂಪೋಸ್ ಮಾಡಲಿದ್ದಾರೆ ಎಂಬ ಮಾಹಿತಿ ಸಿಕ್ಕಿದೆ.

ಕೆಜಿಎಫ್ ಡೈರೆಕ್ಟರ್ ಪ್ರಶಾಂತ್ ನೀಲ್ 2018ರಲ್ಲಿ ತನ್ನನ್ನು ಕರೆದು ಪಾತ್ರ ಒಪ್ಪಿಕೊಳ್ಳುವ ಮುನ್ನ ನಾನು ಸ್ಕ್ರಿಪ್ಟ್ ನೋಡಿ ಹೇಳ್ತೀನಿ ಅಂದಿದ್ರು. ಅಂತೆಯೇ ನಾನು ಅವರಿಗೆ ನಾಲ್ಕೈದು ಸ್ಕ್ರಿಪ್ಟ್ ಗಳನ್ನು ಕಳುಹಿಸಿದ್ದೆ , ಅವರು ಈ ಸ್ಕ್ರಿಪ್ಟ್ ಚೆನ್ನಾಗಿದೆ ಮಾಡು ಅಂದ್ರು. ಕಾರಣಾಂತರಗಳಿಂದ ನಾನೇ ನಿರ್ದೇಶನ ಮಾಡುವಂತಾಯಿತು. ಕಥೆ ಕೇಳಿದ ಮೇಲೆ ಈ ಸಿನಿನಾಕ್ಕೆ ರೌಡಿಫೆಲೋ ಟೈಟಲ್ ಸೂಕ್ತ ಅನಿಸಿತು ಅಂತ ರೋಹಿತ್ ಹೇಳಿದ್ದಾರೆ.