ದೇಶದಲ್ಲಿ ನೀಟ್ (NEET) ಪರೀಕ್ಷಾ ಅಕ್ರಮ ಹಾಗೂ ಪ್ರಶ್ನೆ ಪತ್ರಿಕೆ ಸೋರಿಕೆ ತಡೆಯಲು ಕೇಂದ್ರ ಸರ್ಕಾರ ತಂದಿರುವ ಕಠಿಣ ಕಾನೂನುಗಳ ಕುರಿತು ಪ್ರಧಾನಿ ನರೇಂದ್ರ ಮೋದಿ ಅವರು ಮಾಡಿದ್ದ ಪೋಸ್ಟ್ ಅನ್ನು ಫೇಸ್ಬುಕ್ (ಮೆಟಾ) ಭಾರತದಲ್ಲಿ ಬ್ಲಾಕ್ ಮಾಡಿರುವುದು ಭಾರೀ ವಿವಾದಕ್ಕೆ ಕಾರಣವಾಗಿದೆ. ಸ್ವತಃ ದೇಶದ ಪ್ರಧಾನ ಮಂತ್ರಿಯವರ ಅಧಿಕೃತ ಪೋಸ್ಟ್ ಅನ್ನೇ ಭಾರತೀಯರು ನೋಡದಂತೆ ತಡೆಹಿಡಿದ ಫೇಸ್ಬುಕ್ ಸಂಸ್ಥೆಯ ಈ ನಡೆ ಸದ್ಯ ಸಂಚಲನ ಸೃಷ್ಟಿಸಿದೆ.
ಫೇಸ್ಬುಕ್ಗೆ ಈ ಅಧಿಕಾರ ಕೊಟ್ಟವರು ಯಾರು? : ಬಿಜೆಪಿ ನಾಯಕ ತಜಿಂದರ್ ಬಗ್ಗಾ ಗಂಭೀರ ಆರೋಪ
ಈ ಅನಿರೀಕ್ಷಿತ ಬೆಳವಣಿಗೆಯ ಕುರಿತು ಬಿಜೆಪಿ ನಾಯಕ ತಜಿಂದರ್ ಪಾಲ್ ಸಿಂಗ್ ಬಗ್ಗಾ ತಮ್ಮ ‘ಎಕ್ಸ್’ (ಟ್ವಿಟರ್) ಖಾತೆಯಲ್ಲಿ ಬರೆದುಕೊಂಡು ತೀವ್ರ ಆಕ್ರೋಶ ಹೊರಹಾಕಿದ್ದಾರೆ. ಫೇಸ್ಬುಕ್ ತನ್ನ ಎಲ್ಲಾ ಮಿತಿಗಳನ್ನು ಮೀರಿದೆ. ಭಾರತದ ಪ್ರಧಾನ ಮಂತ್ರಿಯವರ ಪೋಸ್ಟ್ ಅನ್ನು ಭಾರತೀಯರೇ ನೋಡದಂತೆ ತಡೆಯಲು ಈ ವಿದೇಶಿ ವೇದಿಕೆಗೆ ಹಕ್ಕು ಕೊಟ್ಟವರು ಯಾರು? ಎಂದು ಬಗ್ಗಾ ನೇರವಾಗಿ ಪ್ರಶ್ನಿಸಿದ್ದಾರೆ. ಅವರ ಈ ಟ್ವೀಟ್ ಗಂಟೆಗಳಲ್ಲೇ ಸಾವಿರಾರು ಬಾರಿಗೆ ಶೇರ್ ಆಗಿ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಭಾರತೀಯರು ಏನು ಓದಬೇಕು ಎಂಬುದನ್ನು ವಿದೇಶಿ ಕಂಪನಿ ನಿರ್ಧರಿಸಬೇಕಾ?
ಮೆಟಾ ಸಂಸ್ಥೆಯ ಈ ನಡೆಯನ್ನು ಕೇವಲ ಕಂಟೆಂಟ್ ನಿಯಂತ್ರಣ ಎಂದು ನೋಡಲು ಸಾಧ್ಯವಿಲ್ಲ, ಇದು ಭಾರತದ ಪ್ರಜಾಪ್ರಭುತ್ವ ಮತ್ತು ಡಿಜಿಟಲ್ ಸಾರ್ವಭೌಮತ್ವದ ಮೇಲಿನ ನೇರ ಹಸ್ತಕ್ಷೇಪ ಎಂದು ಬಗ್ಗಾ ಆರೋಪಿಸಿದ್ದಾರೆ. ವಿದೇಶಿ ಸಾಮಾಜಿಕ ಮಾಧ್ಯಮ ವೇದಿಕೆಯೊಂದು ಭಾರತೀಯರು ಏನು ಓದಬೇಕು ಮತ್ತು ಏನು ಓದಬಾರದು ಎಂಬುದನ್ನು ನಿರ್ಧರಿಸಲು ಹೇಗೆ ಸಾಧ್ಯ? ಯಾರ ಕಾನೂನುಬದ್ಧ ವಿನಂತಿಯನ್ನು ಆಧರಿಸಿ ಈ ಪೋಸ್ಟ್ ಬ್ಲಾಕ್ ಮಾಡಲಾಗಿದೆ ಎಂಬುದನ್ನು ಫೇಸ್ಬುಕ್ ತಕ್ಷಣ ದೇಶದ ಜನರಿಗೆ ಬಹಿರಂಗಪಡಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.
ಜೆನ್-ಜಿ ಮತ್ತು ನೀಟ್ ಅಭ್ಯರ್ಥಿಗಳಿಗೆ ಧೈರ್ಯ ತುಂಬಿದ್ದ ಮೋದಿ ಪೋಸ್ಟ್
ಪ್ರಶ್ನೆ ಪತ್ರಿಕೆ ಸೋರಿಕೆ ಮಾಫಿಯಾಗೆ ಮುಕ್ತಿ ಹಾಡಲು ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಸಾರ್ವಜನಿಕ ಪರೀಕ್ಷೆಗಳ ತಿದ್ದುಪಡಿ ಮಸೂದೆ-2026 ಹಾಗೂ ನಂದನ್ ನಿಲೇಕಣಿ ನೇತೃತ್ವದ ಉನ್ನತಾಧಿಕಾರದ ಕಾರ್ಯಪಡೆ ರಚನೆಯ ಕುರಿತು ಪ್ರಧಾನಿ ಮೋದಿ ಪೋಸ್ಟ್ ಹಂಚಿಕೊಂಡಿದ್ದರು. ವಿಶೇಷವಾಗಿ ‘ಜೆನ್-ಜಿ’ (Gen-Z) ಯುವಜನತೆ ಹಾಗೂ ನೀಟ್ ಅಭ್ಯರ್ಥಿಗಳಿಗೆ ಧೈರ್ಯ ತುಂಬುವ ನಿಟ್ಟಿನಲ್ಲಿ ಪ್ರಧಾನಿ ಈ ಸಂದೇಶ ನೀಡಿದ್ದರು. ಆದರೆ ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆಯೇ ಭಾರತೀಯ ಬಳಕೆದಾರರಿಗೆ ಕಾಣಿಸದಂತೆ ಜಿಯೋ-ಬ್ಲಾಕ್ (Geo-block) ಮಾಡಲಾಗಿತ್ತು.
ಕಾವೇರಿದ ರಾಜಕೀಯ ಚರ್ಚೆ: ಬ್ಲಾಕ್ ಬ್ಲಾಕ್ ಸ್ಕ್ರೀನ್ಶಾಟ್ ಹಂಚಿಕೊಂಡ ಬಗ್ಗಾ
ಫೇಸ್ಬುಕ್ನಲ್ಲಿ ಪ್ರಧಾನಿ ಪೋಸ್ಟ್ ಕಾಣಿಸುತ್ತಿಲ್ಲ ಎಂಬುದಕ್ಕೆ ಸಾಕ್ಷಿಯಾಗಿ ತಜಿಂದರ್ ಬಗ್ಗಾ ಅವರು ಬ್ಲಾಕ್ ಮಾಡಲಾದ ಲಿಂಕ್ ಹಾಗೂ ಸ್ಕ್ರೀನ್ಶಾಟ್ಗಳನ್ನು ಎಕ್ಸ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಐಟಿ ಕಾಯ್ದೆಯಡಿ ಸರ್ಕಾರಿ ನಿಯಂತ್ರಕರ ವಿನಂತಿಯ ಮೇರೆಗೆ ನಿರ್ದಿಷ್ಟ ಪೋಸ್ಟ್ಗಳನ್ನು ನಿಯಂತ್ರಿಸುವ ಅವಕಾಶವಿದ್ದರೂ, ಸ್ವತಃ ದೇಶದ ಪ್ರಧಾನಿಯವರ ಅಧಿಕೃತ ಹೇಳಿಕೆಯನ್ನೇ ವಿದೇಶಿ ಪ್ಲಾಟ್ಫಾರ್ಮ್ ಸೆನ್ಸಾರ್ ಮಾಡಿರುವುದು ಈಗ ದೇಶದ ರಾಜಕೀಯ ಮತ್ತು ಕಾನೂನು ವಲಯದಲ್ಲಿ ಹೊಸ ಕ್ರಾಂತಿಯನ್ನೇ ಎಬ್ಬಿಸಿದೆ.
ನಿರ್ಬಂಧ ತೆರವುಗೊಳಿಸಿದ ಮೆಟಾ: ಆದರೂ ಸಿಗಲಿಲ್ಲ ಸ್ಪಷ್ಟನೆ
ವಿವಾದ ಬೃಹದಾಕಾರವಾಗಿ ಬೆಳೆಯುತ್ತಿದ್ದಂತೆ ಹಾಗೂ ಕೇಂದ್ರ ಸರ್ಕಾರದ ಹಂತದಲ್ಲೂ ಚರ್ಚೆಯಾಗುತ್ತಿದ್ದಂತೆ ಎಚ್ಚೆತ್ತುಕೊಂಡಿರುವ ಫೇಸ್ಬುಕ್ (ಮೆಟಾ), ಪ್ರಧಾನಿ ಮೋದಿ ಅವರ ಪೋಸ್ಟ್ ಮೇಲಿದ್ದ ತಾಂತ್ರಿಕ ನಿರ್ಬಂಧವನ್ನು ತೆರವುಗೊಳಿಸಿದೆ. ಪ್ರಸ್ತುತ ಭಾರತೀಯ ಬಳಕೆದಾರರಿಗೆ ಈ ಪೋಸ್ಟ್ ವೀಕ್ಷಣೆಗೆ ಸಿಗುತ್ತಿದೆಯಾದರೂ, ಇಷ್ಟೊಂದು ಗಂಭೀರ ಸ್ವರೂಪದ ಪೋಸ್ಟ್ ಅನ್ನು ಯಾವುದೇ ಮುನ್ಸೂಚನೆ ಇಲ್ಲದೇ ಯಾಕೆ ಬ್ಲಾಕ್ ಮಾಡಲಾಗಿತ್ತು ಎಂಬುದರ ಕುರಿತು ಮೆಟಾ ಸಂಸ್ಥೆ ಇದುವರೆಗೂ ಯಾವುದೇ ಅಧಿಕೃತ ಸ್ಪಷ್ಟನೆ ನೀಡಿಲ್ಲ.
ಕೇಂದ್ರ ಸರ್ಕಾರ vs ವಿದೇಶಿ ಸೋಶಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ಸ್: ತಾರಕಕ್ಕೇರಿದ ಸಂಘರ್ಷ
ಇತ್ತೀಚಿನ ದಿನಗಳಲ್ಲಿ ಪರೀಕ್ಷಾ ಅಕ್ರಮ ಹಾಗೂ ವಿದ್ಯಾರ್ಥಿಗಳ ಪ್ರತಿಭಟನೆಗೆ ಸಂಬಂಧಿಸಿದಂತೆ ಸೋಷಿಯಲ್ ಮೀಡಿಯಾಗಳಲ್ಲಿ ಭಾರೀ ಚರ್ಚೆಗಳು ನಡೆಯುತ್ತಿವೆ. ಈ ನಡುವೆ ವಿದೇಶಿ ಸಾಮಾಜಿಕ ಜಾಲತಾಣ ಸಂಸ್ಥೆಗಳು ಭಾರತದ ನಿಯಮಗಳನ್ನು ಮೀರಿ ವರ್ತಿಸುತ್ತಿವೆಯೇ ಎಂಬ ಅನುಮಾನ ಮತ್ತೆ ವ್ಯಕ್ತವಾಗಿದೆ. ಪ್ರಧಾನಿ ಪೋಸ್ಟ್ ಸೆನ್ಸಾರ್ ಆಗಿರುವ ಈ ಘಟನೆಯು ಕೇಂದ್ರ ಸರ್ಕಾರ ಹಾಗೂ ವಿದೇಶಿ ಟೆಕ್ ದೈತ್ಯರ ನಡುವಿನ ಡಿಜಿಟಲ್ ನೀತಿ-ನಿಯಮಗಳ ಸಂಘರ್ಷವನ್ನು ಮತ್ತಷ್ಟು ಕಾವೇರುವಂತೆ ಮಾಡಿದೆ.
