ಬೆಂಗಳೂರು: ಸಿಲಿಕಾನ್ ಸಿಟಿಯಲ್ಲಿ ವಸತಿ ಪ್ರದೇಶಗಳನ್ನೇ ಟಾರ್ಗೆಟ್ ಮಾಡಿ ಹೈಟೆಕ್ ನೆಟ್ವರ್ಕ್ ಮೂಲಕ ನಡೆಯುತ್ತಿದ್ದ ಕರಾಳ ದಂಧೆಯೊಂದನ್ನು ಸಿಸಿಬಿ (CCB) ಪೊಲೀಸರು ಬೇರು ಸಮೇತ ಕಿತ್ತೆಸೆದಿದ್ದಾರೆ. ಬೆಂಗಳೂರಿನ ಬೇರೆ ಬೇರೆ ಮೂರು ಕಡೆಗಳಲ್ಲಿ ಸದ್ದಿಲ್ಲದೆ ಬಾಡಿಗೆ ಮನೆಗಳನ್ನು ಪಡೆದು, ಮುಗ್ಧ ಹೆಣ್ಣುಮಕ್ಕಳನ್ನು ಬಲವಂತವಾಗಿ ದೆಹಲಿ ಮತ್ತು ಇತರ ಹೊರ ರಾಜ್ಯಗಳಿಂದ ತಂದು ವೇಶ್ಯಾವಾಟಿಕೆಗೆ ತಳ್ಳುತ್ತಿದ್ದ ಖತರ್ನಾಕ್ ಜಾಲವನ್ನು ಸೆಂಟ್ರಲ್ ಕ್ರೈಂ ಬ್ರಾಂಚ್ನ ಮಹಿಳಾ ಸಂರಕ್ಷಣಾ ದಳ ಪತ್ತೆ ಮಾಡಿದ್ದು, ಸಿಸಿಬಿ ಅಧಿಕಾರಿಗಳ ಈ ಭೀಕರ ಹಠಾತ್ ದಾಳಿಯಿಂದಾಗಿ ನರಕಕೂಪದಲ್ಲಿದ್ದ ಮೂವರು ಮಹಿಳೆಯರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ರಾಜಧಾನಿಯ ಪ್ರತಿಷ್ಠಿತ ಏರಿಯಾಗಳಾದ ಬಾಗಲಗುಂಟೆ ಪೊಲೀಸ್ ಠಾಣಾ ವ್ಯಾಪ್ತಿಯ ಟಿ.ದಾಸರಹಳ್ಳಿ, ಪುಟ್ಟೇನಹಳ್ಳಿಯ ಜರಗನಹಳ್ಳಿ ಮತ್ತು ಚಂದ್ರಾ ಲೇಔಟ್ನ ಮೂಡಲಪಾಳ್ಯ ಮುಖ್ಯ ರಸ್ತೆಯ ಜನವಸತಿ ಪ್ರದೇಶಗಳಲ್ಲೇ ಈ ದಂಧೆಕೋರರು ತಮ್ಮ ಅಡ್ಡಾಗಳನ್ನು ತೆರೆದಿದ್ದರು. ಯಾರೂ ಕೂಡ ಸುಲಭವಾಗಿ ಶಂಕಿಸದಂತೆ ಫ್ಯಾಮಿಲಿಗಳ ತರ ನಟಿಸಿ ಈ ಗ್ಯಾಂಗ್ ಬಾಡಿಗೆಗೆ ಮನೆಗಳನ್ನು ಪಡೆದುಕೊಂಡಿತ್ತು. ಈ ಏರಿಯಾಗಳಲ್ಲಿ ಹಗಲು ರಾತ್ರಿ ಎನ್ನದೆ ಅನುಮಾನಾಸ್ಪದವಾಗಿ ಐಷಾರಾಮಿ ಕಾರು ಮತ್ತು ಬೈಕ್ಗಳಲ್ಲಿ ಅಪರಿಚಿತ ಪುರುಷರು ಬಂದು ಹೋಗುತ್ತಿರುವ ಖಚಿತ ಮಾಹಿತಿ ಕಳೆದ ವಾರ ಸಿಸಿಬಿ ಮಹಿಳಾ ಸಂರಕ್ಷಣಾ ದಳಕ್ಕೆ ಸಿಕ್ಕಿತ್ತು.
ಖಚಿತ ಮಾಹಿತಿ ಸಿಗುತ್ತಿದ್ದಂತೆಯೇ ಅಲರ್ಟ್ ಆದ ಸಿಸಿಬಿ ಇನ್ಸ್ಪೆಕ್ಟರ್ ಮತ್ತು ಸ್ಟಾಫ್, ಕರಾರುವಾಕ್ ಸ್ಕೆಚ್ ಹಾಕಿ ಒಂದೇ ವಾರದಲ್ಲಿ ಬೇರೆ ಬೇರೆ ದಿನಾಂಕಗಳಂದು ಮೂರೂ ಬಾಡಿಗೆ ಮನೆಗಳ ಮೇಲೆ ಮಿಂಚಿನ ಸರಣಿ ದಾಳಿ ನಡೆಸಿದ್ದಾರೆ. ಪೊಲೀಸರು ಒಳ ನುಗ್ಗುತ್ತಿದ್ದಂತೆಯೇ ದಂಧೆಕೋರರು ಎಸ್ಕೇಪ್ ಆಗಲು ಯತ್ನಿಸಿದರಾದರೂ ಜಾಗೃತ ಖಾಕಿ ಪಡೆ ಸುತ್ತುವರಿದು ಲಾಕ್ ಮಾಡಿದೆ. ಈ ಭರ್ಜರಿ ಕಾರ್ಯಾಚರಣೆಯಲ್ಲಿ ವೇಶ್ಯಾವಾಟಿಕೆಗೆ ಏಜೆಂಟ್ಗಳಾಗಿ ಕೆಲಸ ಮಾಡುತ್ತಿದ್ದ ಓರ್ವ ಪುರುಷ ಮತ್ತು ಮೂವರು ಕಿಲಾಡಿ ಮಹಿಳೆಯರು ಸೇರಿದಂತೆ ಒಟ್ಟು ನಾಲ್ವರನ್ನು ಪೊಲೀಸರು ಸ್ಪಾಟ್ನಲ್ಲೇ ಕಂಬಿ ಹಿಂದೆ ತಳ್ಳಿದ್ದಾರೆ. ಆದರೆ, ಈ ಜಾಲದ ಮುಖ್ಯ ಸೂತ್ರಧಾರಿಯಾಗಿದ್ದ ಮತ್ತೊಬ್ಬಳು ಮಾತ್ರ ಪೊಲೀಸರಿಗೆ ಚಳ್ಳೆಹಣ್ಣು ತಿನ್ನಿಸಿ ಸದ್ಯಕ್ಕೆ ತಲೆಮರೆಸಿಕೊಂಡಿದ್ದಾಳೆ.
ಇನ್ನು ಈ ನರಕದ ಅಡ್ಡೆಯಿಂದ ರಕ್ಷಿಸಲ್ಪಟ್ಟ ಮೂವರು ಹೆಣ್ಣುಮಕ್ಕಳ ಕಥೆ ನಿಜಕ್ಕೂ ಕರುಣಾಜನಕವಾಗಿದೆ. ರಕ್ಷಿಸಲಾದವರಲ್ಲಿ ಇಬ್ಬರು ಹೆಣ್ಣುಮಕ್ಕಳು ಬೇರೆ ರಾಜ್ಯದವರಾಗಿದ್ದು, ಅವರಿಗೆ ಬೆಂಗಳೂರಿನಲ್ಲಿ ಒಳ್ಳೆಯ ಕೆಲಸ ಕೊಡಿಸುವುದಾಗಿ ನಂಬಿಸಿ ಕರೆತರಲಾಗಿತ್ತು. ಮತ್ತೊಬ್ಬಳು ಸ್ಥಳೀಯ ಹೆಣ್ಣುಮಗಳಾಗಿದ್ದಾಳೆ. ಈ ಮುಗ್ಧ ಒಂಟಿ ಮಹಿಳೆಯರ ಬಡತನ ಮತ್ತು ಅಸಹಾಯಕತೆಯನ್ನು ಬಂಡವಾಳ ಮಾಡಿಕೊಂಡಿದ್ದ ಈ ಖದೀಮರ ಗ್ಯಾಂಗ್, ಅವರಿಗೆ ರೂಂನಲ್ಲಿ ದಿಗ್ಬಂಧನ ವಿಧಿಸಿ ಬಲವಂತವಾಗಿ ವೇಶ್ಯಾವಾಟಿಕೆ ಕೂಪಕ್ಕೆ ತಳ್ಳಿ ವ್ಯಾಪಾರಕ್ಕಿಳಿದಿತ್ತು.
ಬಂಧಿತ ಆರೋಪಿಗಳನ್ನು ತಮ್ಮದೇ ಶೈಲಿಯಲ್ಲಿ ವಿಚಾರಣೆ ನಡೆಸಿದಾಗ ದಂಧೆಯ ಅಸಲಿ ಕರಾಳ ಮುಖ ಬಯಲಾಗಿದೆ. ನಮಗೆ ಶಾರ್ಟ್ಕಟ್ನಲ್ಲಿ ಕೋಟಿ ಕೋಟಿ ಹಣ ಗಳಿಸುವ ದುರಾಸೆ ಇತ್ತು. ಅದಕ್ಕಾಗಿ ಯಾರೂ ಕಂಡುಹಿಡಿಯದಂತೆ ಜನವಸತಿ ಏರಿಯಾಗಳಲ್ಲೇ ಮನೆ ಬಾಡಿಗೆಗೆ ಪಡೆದಿದ್ದೆವು. ವೇಶ್ಯಾವಾಟಿಕೆ ಬಯಸುವ ಶ್ರೀಮಂತ ಪುರುಷರನ್ನು ನಾವು ಯಾವುದೇ ಆನ್ಲೈನ್ ಆಪ್ ಬಳಸದೆ, ಕೇವಲ ಪರ್ಸನಲ್ ದೂರವಾಣಿ ನಂಬರ್ಗಳ ಮುಖಾಂತರ ರಹಸ್ಯವಾಗಿ ಸಂಪರ್ಕಿಸುತ್ತಿದ್ದೆವು. ರೇಟ್ ಫಿಕ್ಸ್ ಆದ ತಕ್ಷಣ ಅವರನ್ನೇ ನೇರವಾಗಿ ಈ ಬಾಡಿಗೆ ಮನೆಗಳಿಗೆ ಬರಮಾಡಿಕೊಳ್ಳುತ್ತಿದ್ದೆವು ಎಂದು ಆರೋಪಿಗಳು ಪೊಲೀಸರ ಮುಂದೆ ಒಪ್ಪಿಕೊಂಡಿದ್ದಾರೆ.
ಬೆಂಗಳೂರು ಪೊಲೀಸ್ ಆಯುಕ್ತರ ಕಚೇರಿಯಿಂದ ಬಿಡುಗಡೆಯಾಗಿರುವ ಅಧಿಕೃತ ಪ್ರಕಟಣೆಯ ಪ್ರಕಾರ, ಬಂಧಿತ ಆರೋಪಿಗಳ ವಿರುದ್ಧ ಬಾಗಲಗುಂಟೆ, ಪುಟ್ಟೇನಹಳ್ಳಿ ಮತ್ತು ಚಂದ್ರಾ ಲೇಔಟ್ ಪೊಲೀಸ್ ಠಾಣೆಗಳಲ್ಲಿ ಪ್ರತ್ಯೇಕವಾಗಿ ಗಂಭೀರ ಇಮ್ಮೊರಲ್ ಟ್ರಾಫಿಕಿಂಗ್ (ಅನೈತಿಕ ಕಳ್ಳಸಾಗಣೆ ತಡೆ ಕಾಯ್ದೆ) ಅಡಿಯಲ್ಲಿ ಎಫ್ಐಆರ್ ದಾಖಲಿಸಲಾಗಿದೆ. ಸದ್ಯ ತಲೆಮರೆಸಿಕೊಂಡಿರುವ ಆ ಕಿಲಾಡಿ ಮಹಿಳೆಗಾಗಿ ಪೊಲೀಸರು ಬಲೆ ಬೀಸಿದ್ದು, ನಗರದ ಇನ್ನು ಯಾವ ಯಾವ ಭಾಗಗಳಲ್ಲಿ ಇವರ ನೆಟ್ವರ್ಕ್ ಹರಡಿಕೊಂಡಿದೆ ಮತ್ತು ಇದರ ಹಿಂದೆ ಇರುವ ಅಸಲಿ ಬಿಗ್ ಬಾಸ್ಗಳು ಯಾರು ಅನ್ನೋದನ್ನು ಪತ್ತೆ ಹಚ್ಚಲು ಸಿಸಿಬಿ ತನಿಖೆ ಚುರುಕುಗೊಳಿಸಿದೆ.
