ಕ್ರಿಕೆಟ್ ಅದರಲ್ಲಿಯೂ ಐಪಿಎಲ್ ಅಂದರೆ ಪ್ರತಿ ಪಂದ್ಯ ಹೈ-ವೋಲ್ಟೇಜ್ ಡ್ರಾಮಾ. ಇನ್ನೂ ಆರ್ಸಿಬಿ ಮತ್ತು ಮುಂಬೈ ಇಂಡಿಯನ್ಸ್ ಮುಖಾಮುಖಿ ಅಂದ್ರೆ ಅಲ್ಲಿ ಕಿಚ್ಚು ಹತ್ತಿಕೊಳ್ಳೋದು ಗ್ಯಾರಂಟಿ. ಭಾನುವಾರ ರಾಯ್ಪುರದಲ್ಲಿ ನಡೆದ ಪಂದ್ಯವೂ ಇದಕ್ಕೆ ಹೊರತಾಗಿರಲಿಲ್ಲ. ಆರ್ಸಿಬಿ ಗೆದ್ದು ಬೀಗಿತು ಅನ್ನೋ ಸಂಭ್ರಮದ ನಡುವೆಯೇ, ಕಾಮೆಂಟರಿ ಬಾಕ್ಸ್ನಿಂದ ಬಂದ ಒಂದು ಹೇಳಿಕೆ ಈಗ ಇಡೀ ದೇಶದ ಕ್ರಿಕೆಟ್ ಅಭಿಮಾನಿಗಳ ಕೆಂಗಣ್ಣಿಗೆ ಗುರಿಯಾಗಿದೆ. ಟೀಮ್ ಇಂಡಿಯಾದ ಮಾಜಿ ಆಟಗಾರ ಎಸ್. ಬದ್ರಿನಾಥ್ ನೀಡಿದ ಒಂದು ಕಾಮೆಂಟ್ ಈಗ ‘ಸಾಯೋ’ ಹಂತಕ್ಕೆ ಬಂದು ನಿಂತಿದೆ.
ಅಸಲಿಗೆ ಪಂದ್ಯದ ವೇಳೆ ನಡೆದಿದ್ದೇನು ಅಂದ್ರೆ, ಆರ್ಸಿಬಿ ಸಂಕಷ್ಟದಲ್ಲಿದ್ದಾಗ ಆಪತ್ಬಾಂಧವನಂತೆ ಕ್ರೀಸ್ಗೆ ಬಂದ ಕೃನಾಲ್ ಪಾಂಡ್ಯ ಮುಂಬೈ ಬೌಲರ್ಗಳ ಬೆವರಿಳಿಸುತ್ತಿದ್ದರು. ಬ್ಯಾಟಿಂಗ್ ಮಾಡುವಾಗಲೇ ಕೃನಾಲ್ಗೆ ತೀವ್ರವಾದ ಸ್ನಾಯು ಸೆಳೆತ (Cramps) ಕಾಣಿಸಿಕೊಂಡಿತು. ನೋವಿನಿಂದ ಅವರು ಮೈದಾನದಲ್ಲೇ ಕುಸಿದು ಬಿದ್ದಾಗ, ಎದುರಾಳಿ ತಂಡದ ವಿಕೆಟ್ ಕೀಪರ್ ರಿಯಾನ್ ರಿಕೆಲ್ಟನ್ ಮಾನವೀಯತೆ ಮೆರೆದು ಕೃನಾಲ್ ಸಹಾಯಕ್ಕೆ ಧಾವಿಸಿದರು. ಮೈದಾನದಲ್ಲಿ ಇಂತಹ ಕ್ರೀಡಾ ಮನೋಭಾವ ಕಂಡಾಗ ಅಭಿಮಾನಿಗಳು ಚಪ್ಪಾಳೆ ತಟ್ಟೋದು ಸಾಮಾನ್ಯ. ಆದರೆ, ತಮಿಳು ಕಾಮೆಂಟರಿ ಮಾಡುತ್ತಿದ್ದ ಬದ್ರಿನಾಥ್ ಮಾತ್ರ ಬೇರೆಯದೇ ರಾಗ ಹಾಡಿದ್ದರು.
“ಕೃನಾಲ್ ಪಾಂಡ್ಯ ಎದುರಾಳಿ ಆಟಗಾರ, ಆತನಿಗೆ ರಿಕೆಲ್ಟನ್ ಸಹಾಯ ಮಾಡಬಾರದು. ಆತ ಅಲ್ಲೇ ಸಾಯಲಿ ಬಿಡಿ…” ಎಂಬರ್ಥದಲ್ಲಿ ಬದ್ರಿನಾಥ್ ಮಾತನಾಡಿದ್ದಾರೆ ಎನ್ನಲಾದ ವಿಡಿಯೋ ತುಣುಕು ಸೋಷಿಯಲ್ ಮೀಡಿಯಾದಲ್ಲಿ ಕಾಡ್ಗಿಚ್ಚಿನಂತೆ ಹಬ್ಬಿತು. ಒಬ್ಬ ಮಾಜಿ ಅಂತರಾಷ್ಟ್ರೀಯ ಆಟಗಾರನ ಬಾಯಲ್ಲಿ ಇಂತಹ ಕೀಳು ಮಟ್ಟದ ಮಾತುಗಳೇ? ಎಂದು ನೆಟ್ಟಿಗರು ಬದ್ರಿನಾಥ್ ವಿರುದ್ಧ ಮುಗಿಬಿದ್ದರು. “ಇಂತಹವರನ್ನು ಮೊದಲು ಕಾಮೆಂಟರಿ ಪ್ಯಾನಲ್ನಿಂದ ಕಿತ್ತೆಸೆಯಿರಿ” ಅನ್ನೋ ಆಕ್ರೋಶದ ಕಟ್ಟೆ ಒಡೆಯಿತು.
ವಿವಾದ ಮಿತಿ ಮೀರುತ್ತಿದ್ದಂತೆ ಎಚ್ಚೆತ್ತುಕೊಂಡ ಬದ್ರಿನಾಥ್ ಸೋಮವಾರ ಎಕ್ಸ್ (X) ಖಾತೆಯಲ್ಲಿ ಸ್ಪಷ್ಟನೆ ನೀಡಿದ್ದಾರೆ. “ನಾನು ಆ ಮಾತನ್ನು ಆ ಅರ್ಥದಲ್ಲಿ ಹೇಳಿಲ್ಲ. ತಮಿಳು ಆಡುಭಾಷೆ ಅರ್ಥವಾಗದವರು ಈ ರೀತಿ ಗೊಂದಲ ಸೃಷ್ಟಿಸಿದ್ದಾರೆ. ವಾಸ್ತವವಾಗಿ ನಾನು ರಿಕೆಲ್ಟನ್ ಅವರ ಕ್ರೀಡಾ ಮನೋಭಾವವನ್ನು ಕೊಂಡಾಡಿದ್ದೆ. ಪಂದ್ಯ ಎಷ್ಟೇ ಕುತೂಹಲದಲ್ಲಿದ್ದರೂ ಎದುರಾಳಿ ಆಟಗಾರನಿಗೆ ನೆರವಾದ ಮುಂಬೈ ತಂಡಕ್ಕೆ ‘ಫೇರ್ ಪ್ಲೇ’ ಅಂಕ ಕೊಡಬೇಕು ಅಂದಿದ್ದೆ” ಎಂದು ಸಮಜಾಯಿಷಿ ನೀಡಿದ್ದಾರೆ. ಆದರೆ ಅಭಿಮಾನಿಗಳು ಮಾತ್ರ “ಸಾಯಲಿ ಬಿಡಿ ಅನ್ನೋ ಪದಕ್ಕೆ ಬೇರೆ ಅರ್ಥ ಇರೋಕೆ ಹೇಗೆ ಸಾಧ್ಯ?” ಅಂತ ಬಿಟ್ಟುಬಿಡದೆ ಕಾಲೆಳೆಯುತ್ತಿದ್ದಾರೆ.
ಇನ್ನು ಪಂದ್ಯದ ವಿಚಾರಕ್ಕೆ ಬಂದರೆ, ಇದು ಕೃನಾಲ್ ಪಾಂಡ್ಯ ಅವರ ಕೆರಿಯರ್ನಲ್ಲೇ ನೆನಪಿಟ್ಟುಕೊಳ್ಳುವಂತಹ ಇನ್ನಿಂಗ್ಸ್. ಪವರ್ ಪ್ಲೇನಲ್ಲೇ ವಿಕೆಟ್ ಕಳೆದುಕೊಂಡು ಕಂಗೆಟ್ಟಿದ್ದ ಆರ್ಸಿಬಿಗೆ ಕೃನಾಲ್ 46 ಎಸೆತಗಳಲ್ಲಿ 73 ರನ್ ಚಚ್ಚುವ ಮೂಲಕ ಜೀವ ತುಂಬಿದರು. ಅವರ ಬ್ಯಾಟ್ನಿಂದ ಬಂದ 5 ಸಿಕ್ಸರ್ ಮತ್ತು 4 ಬೌಂಡರಿಗಳು ಮುಂಬೈ ಇಂಡಿಯನ್ಸ್ ಪ್ಲೇಆಫ್ ಕನಸನ್ನೇ ಭಸ್ಮ ಮಾಡಿದವು. ಕೃನಾಲ್ ಅವರ ಈ ವೀರಾವೇಶದ ಆಟದಿಂದ ಆರ್ಸಿಬಿ 2 ವಿಕೆಟ್ಗಳ ರೋಚಕ ಜಯ ಸಾಧಿಸಿ ಅಂಕಪಟ್ಟಿಯಲ್ಲಿ ಟಾಪ್ ಸೀಟ್ ಅಲಂಕರಿಸಿದೆ.
ಮುಂಬೈ ಇಂಡಿಯನ್ಸ್ ಪಾಲಿಗೆ ಇದು ಕರಾಳ ರಾತ್ರಿ. ತಿಲಕ್ ವರ್ಮಾ ಅವರ 57 ರನ್ಗಳ ಹೋರಾಟದ ಹೊರತಾಗಿಯೂ ರೋಹಿತ್ ಶರ್ಮಾ ಪಡೆಗೆ ಗೆಲುವು ದಕ್ಕಲಿಲ್ಲ. ಈ ಸೋಲಿನೊಂದಿಗೆ ಐದು ಬಾರಿಯ ಚಾಂಪಿಯನ್ ಮುಂಬೈ ಈ ಸಲದ ಐಪಿಎಲ್ ರೇಸ್ನಿಂದ ಅಧಿಕೃತವಾಗಿ ಹೊರಬಿದ್ದಿದೆ. ಆರ್ಸಿಬಿ ಪರ ಭುವನೇಶ್ವರ್ ಕುಮಾರ್ 4 ವಿಕೆಟ್ ಕಿತ್ತು ಮುಂಬೈ ಬ್ಯಾಟಿಂಗ್ ಬೆನ್ನೆಲುಬು ಮುರಿದರು. ಒಂದು ಕಡೆ ಆರ್ಸಿಬಿ ಅಭಿಮಾನಿಗಳು ‘ಈ ಸಲ ಕಪ್ ನಮ್ದೇ’ ಅಂತ ಸಂಭ್ರಮಿಸುತ್ತಿದ್ದರೆ, ಮುಂಬೈ ಫ್ಯಾನ್ಸ್ ಮಾತ್ರ ಪ್ಲೇಆಫ್ ಹಂತಕ್ಕೇರಲಾಗದ ಬೇಸರದಲ್ಲಿದ್ದಾರೆ.
ಒಟ್ಟಿನಲ್ಲಿ, ಮೈದಾನದಲ್ಲಿ ನಡೆದ ಕೃನಾಲ್ ಅವರ ಕ್ಲಾಸಿಕ್ ಬ್ಯಾಟಿಂಗ್ಗಿಂತ ಹೆಚ್ಚಾಗಿ ಬದ್ರಿನಾಥ್ ಅವರ ವಿವಾದಾತ್ಮಕ ಹೇಳಿಕೆಯೇ ಹೆಚ್ಚು ಸೌಂಡ್ ಮಾಡುತ್ತಿದೆ. ಕಾಮೆಂಟರಿ ಬಾಕ್ಸ್ನಲ್ಲಿ ಕುಳಿತು ಲಕ್ಷಾಂತರ ಜನರು ಕೇಳಿಸಿಕೊಳ್ಳುವಾಗ ಆಟಗಾರರು ಎಷ್ಟು ಜಾಗರೂಕತೆಯಿಂದ ಇರಬೇಕು ಅನ್ನೋದಕ್ಕೆ ಈ ಘಟನೆ ಸಾಕ್ಷಿ. ಬದ್ರಿನಾಥ್ ಎಷ್ಟೇ ಸ್ಪಷ್ಟನೆ ನೀಡಿದರೂ, ಅವರ ಆ ಒಂದು ‘ತಮಾಷೆಯ ಮಾತು’ ಅವರ ವ್ಯಕ್ತಿತ್ವಕ್ಕೆ ಸಣ್ಣ ಮಸಿ ಬಳಿದಿದ್ದಂತೂ ಸುಳ್ಳಲ್ಲ.
ಕ್ರಿಕೆಟ್ ಅಂದ್ರೆ ಬರೀ ಗೆಲುವು ಸೋಲಲ್ಲ, ಅದಕ್ಕಿಂತ ಮಿಗಿಲಾದ ಕ್ರೀಡಾ ಮನೋಭಾವ ಮೈದಾನದಲ್ಲಿ ಇರಬೇಕು. ರಿಕೆಲ್ಟನ್ ಆ ಕೆಲಸವನ್ನು ಅಚ್ಚುಕಟ್ಟಾಗಿ ಮಾಡಿದ್ದಾರೆ. ಆದರೆ ಅದನ್ನು ಬಣ್ಣಿಸುವ ಭರದಲ್ಲಿ ಬದ್ರಿನಾಥ್ ಎಡವಿದ್ದು ಮಾತ್ರ ದುರದೃಷ್ಟಕರ.
